مەهدی محەممەد – زاری كرمانجی :
بڕیارێكی وەزارەتی دادی توركیا، بە ڕادەست نەكردنی پۆستی شارەوانیی وان بە بەربژێری سەركەوتووی دەم پارتی و دانانی بەربژێرێكی دەرنەچووی ئاكپارتی، ناڕەزایی و تووڕەیی كوردانی بە دوای خۆیدا هێنا.
دوێنێ سێشەممە لە چەندین شاری گەورەی باكووری كوردستان، كوردان دژ بەو بڕیارە خۆپیشاندانیان ئەنجامدا، لە شاره‌كانى وان و جۆلەمێرگ و شرناخ و ئیزمیر، گرژی لە نێوان خۆپیشاندەرانی كورد و دەزگا ئەمنییەكان ڕوویدا و چەند هاونیشتمانییەك بە هۆی تەقەی ڕاستەوخۆی هێزە ئەمنییەكانی توركیا بریندار بوون.
ئەندام و لایەنگرانی دەم پارتی ئەم برِياره بە كوودەتای ئاكپارتی ناو دەبن و ترسیان لەوە هەیە سیناریۆی دانانەوەی قیوم لە تەواوی شارەوانییەكانی كوردستان دووبارە ببێتەوە.
عەلی یەرلیكایا، وەزیری ناوخۆی توركیا لە تۆڕی كۆمەڵایەتیی ئێكس (تویتەری پێشوو) دەستگیركردنی 89 خۆپیشاندەری كوردی لە خۆپیشاندانەكانی تایبەت بە پشتگیریكردن لە (عەبدوڵڵا زێدان) لە شارەكانی وان و شەش پارێزگای دیكەی ڕاگەیاند.
بڕیارە ئەمڕۆ چەندین سیاسەتمەداری كورد لە نێویاندا لەیلا زانا خانمە سیاسەتمەداری كورد و پەرلەمانتاری پێشووی توركیا و شاندێكی پەرلەمانتارانی جەهەپە بە جیا بگەنە شاری وان بۆ پشتیوانیكردن لە عەبدوڵڵا زەیدان كاندیدی سەركەوتووی دەم پارتی.
دەوڵەتی توركیا لە ترسی فراوانبوونی خۆپیشاندان، بۆ ماوەی 15 ڕۆژ تەواوی چالاكییەكانی لە پارێزگای وان قەدەخە كرد.
كوردان بۆ پشتگیری لە خۆپیشاندەرانی وان، لە باتمان، گەڤەر، جۆلەمێرگ، شرناخ، مێردین، ئامەد، سێرت، فارقین، ئیزمیر، مانیسا و ئیستەنبوڵ، خۆپیشاندانیان كرد .
لە هەڵبژاردنی شارەوانییەكانی توركیا (31ی ئاداری 2024) عەبدوڵڵا زێدان، بەربژێری دەم پارتی بە ڕێژەی 55.4% بەرامبەر 27.14%ی بەربژێری ئاكپارتی پۆستی گەورە شارەوانیی وانی بردەوە، بەڵام دواتر ئەرڤاس چووە دادگا و داوای كرد پۆستی سەرۆكی شارەوانی نەدرێت بە زێدان و لقی وانی كۆمیسیۆنی هەڵبژاردنەكانی توركیا پۆستی سەرۆكی شارەوانیی وانی ڕادەستی عەبدولحەت ئەرڤاس، بەربژێری ئاكپارتی كرد.
