“ئامادەین هەماهەنگی لەگەڵ حكومەتی هەرێمی كوردستان بكەین بۆ زانینی سەرچاوەی هاوردەكردنی ئەو بەرهەمە”
مەهدی محەممەد – زاری كرمانجی :
دوای نەخۆش كەوتنی هاووڵاتییەك بەهۆی بەكارهێنانی شامپۆیەكی قژ ڕەشكردنەوەی دروستكراوی چین، كونسوڵخانەی گشتی چین لە هەولێر هاتە دەنگ و ڕادەگەیەنێت كە هەماهەنگ دەبن لەگەڵ حكومەتی هەرێمی كوردستان بۆ دۆزینەوەی سەرچاوەی هاوردەكردنی ئەو بەرهەمە.
شەوی ڕابردوو گوتەبێژی كونسوڵخانەی گشتی چین لە هەولێر، لە تۆڕی كۆمەڵایەتی فەیسبووك نیگەرانی خۆی لە تێكچوونی تەندروستیی هاووڵاتییەك بەهۆی بەكارهێنانی شامپۆیەكی چینییەوە دەربڕی و ڕاگەیاند “ئێمە سەرنجمان بەو ڕاپۆرتانە داوە كە لەلایەن هەندێك لە دەزگاكانی ڕاگەیاندن لە هەرێمی كوردستانی عێراق بڵاو كراونەتەوە، سەبارەت بە بەرهەمێكی شامپۆ بە ناوی “Brimles Herbal-Bubble”، بۆیە لێرەدا دەمانەوێت هاوسۆزی خۆمان بۆ بەكارهێنەرانی ئەو بەرهەمە بگەیەنین. ئێمە نیگەرانی خۆمان بەم ڕووداوە دەردەبڕین و ئامادەین هەماهەنگی لەگەڵ لایەنە پەیوەندیدارەكانی حكومەتی هەرێمی كوردستان بكەین بەمەبەستی زانینی سەرچاوە و كەناڵی هاوردەكردنی ئەو بەرهەمە و زانیاری سەبارەت بە ئەنجامی پشكنینی كوالێتی.”
دەشڵێت “حكومەتی چین گرنگییەكی زۆر بە كوالێتی و سەلامەتی كاڵاكانی هەناردەكردنی چین دەدات. فەرمانگەكانی ڕێكخستنی بازاڕ و گومرگ بە توندی بڕگە پەیوەندیدارەكانی یاسای كۆماری میللی چین سەبارەت بە كوالێتی بەرهەم و یاسای كۆماری میللی چین سەبارەت بە پشكنینی كاڵای هاوردە و هەناردەكردن جێبەجێ دەكەن. بەگوێرەی ئەمانە، پشكنین و چاودێری كوالێتی كاڵا بەرهەم هێنراوەكانی چین ئەنجام دەدەن و كوالێتی ئەو كاڵایانە دەپشكنن كە هەناردەی دەرەوەی وڵات دەكرێن.”
ئاشكراشی دەكات كە هەماهەنگ دەبن لەگەڵ لایەنە پەیوەندیدارەكانی حكومەتی هەرێمی كوردستان “بۆ ئەوەی وردەكاری تەواوی ئەم ڕووداوە وەربگرین بە مەبەستی ڕووبەڕووبوونەوەی هەر كێشەیەك كە لەوانەیە لە پرۆسەی هاوردەكردنی كاڵاكەدا هەبێت. ئێمە پێمان وایە كە هەر بەرهەمێكی ساختە و خراپ، كاتێك پشتڕاست كرایەوە، پێویستە بە خێرایی لە بازاڕ دەربكرێت و بەرژەوەندی و مافی بەكارهێنەران لە پلەی یەكەمدا بپارێزین.”
