مه‌هدى محه‌ممه‌د – زاری كرمانجی :
ڕێكخراوی ئەمەریكایی CPT ڕاگەیاندراوێكی بڵاو كردەوە و ئاشكرای دەكات كە لەم بەهارەدا سوپای توركیا نیازی ئەنجامدانی ئۆپەراسیۆنی سەربازی هەیە بۆ سەر چیای گارا و هۆشداریش دەدات كە ئەم ئۆپەراسیۆنە مەترسی لە سەر گیانی گوندنشینانی 39 گوندی دەوروبەری چیاكە دروست دەكات.
سی پی تی ئەمەریكایی ڕادەگەیەنێت توركیا لە ماوەی 70 ڕۆژی سەرەتای ئەمساڵ، 141 جار بۆردوومانی سنووری پارێزگای دهۆكی كردووە و 75 یان بۆ سەر گوندەكانی دەوروبەری چیای گارا بووە كە بەو هۆیەوە 4 هاووڵاتی مەدەنی گیانیان لە دەستداوە.
ڕێكخراوی ئەمەریكایی CPTساڵانێكە چاودێری بۆردوومان و لەشكركێشییەكانی وڵاتانی توركیا و ئێران دەكات بۆ سەر خاكی هەرێمی كوردستان و لە ڕاگەیاندراوەكەیدا ئاماژە بەوە دەكات كە “ئۆپەراسیۆنی ئەمجارەی سوپای توركیا بە پێی زانیارییەكانمان بۆ سەر زنجیرە چیای گارا دەبێت كە بە درێژایی 38.9 كیلۆمەتر هەر دوو پارێزگای هەولێر و دهۆك بەیەكەوە دەبەستێتەوە و ناوەندی بەیەكەوە بەستنەوەی هەر چوار قەزای مێرگەسۆر و ئاكرێ و ئامێدی و زاخۆیە.”
یەكێك لە بەرپرسانی بەشی مافی مرۆڤی ڕێكخراوەكە، لەسەر ئۆپەراسیۆنی توركیا بۆ دەنگی ئەمەریكا قسەی كردووە و دەڵێ “لە ئۆپەراسیۆنی ئەمجارە دا، سوپای توركیا چاوی لە چیای گارایە و ئامانجی قوفڵ كردنی تەواوی سنووری نێوان هەرێمی كوردستانی عێراق- توركیایە و كۆتای هێنانە بە جموجۆڵی چەكدارانی پەكەكە و قەڵاچۆكردنیانە بە درێژایی زنجیرە چیای گارا.”
بە پێی ئامارێكی ڕێكخراوەكە لە ساڵی 2023، توركیا 1548 جار بۆردوومانی ناوچە سنوورییەكانی هەرێمی كوردستانی كردووە، بە جۆرێك زۆرینەی بۆردوومانەكان لە ڕێگای فڕۆكەی جەنگییەوە بووە كە ژمارەیان 1159 هێرش بووە، هەروەها 228 جاریش بۆردوومانەكان بە فڕۆكەی بێفڕۆكەوان بووە، ئەوانی دیكەی بە هەلیكۆپتەر و تۆپباران و تەقەكردنەوە بووە، وڵاتی ئێرانیش 101 جار بۆردوومانی خاكی هەرێمی كوردستانی كردووە.
