”بافل دەبێ ئەو ڕاستییە بزانێ کە مافە نەتەوایەتییەکانی گەلی کورد لە چوارچێوەی عێراقی ژێر دەسەڵاتی ئێران نایەنه دی”.
”دەرچوونی هەر بڕیارێک لە دژی قەوارەی هەرێم، دەبێ لەلایەن هەمووانەوە شەرمەزار بکرێ”
زارى کرمانجى-سۆران:
لەبارەى بڕیارەکانى دادگاى فیدراڵى و پەیامەکەى بافل تالەبانى بۆ پشتگیریکردن لە بڕیارەکانى دادگە. نووسەر رۆژنامەنووسێک دەڵێت: ” پەیامەکەی بافڵ تاڵەبانی بۆ پشتیوانیی لە دادگای فیدرالی بەشێکە لە سیناریۆیەکانى ئێران”.
جەمال نەجاڕى، نووسەرو رۆژنامەنووس، لە وڵاتى فەڕەنسا بۆ زارى کرمانجى گووتى: ”بڕیارەکانی ئەم دواییەی دادگای فیدڕالی عێراق لە دژی بەرژەوەندییەکانی خەڵک و دەسەڵات و قەوارەی هەرێمی کوردستانن. پاش هەوڵە بێ ئاکامەکانی بەرپرسانی بەغدا لە دژی هەرێمی کوردستان، ئێستا دەیانەوێ لە ڕێی یاساو دادگە هەرێم لاواز بکەن و دوا ئامانجیشیان نەمانی قەوارەی سیاسیی هەرێمی کوردستانە”.
گووتیشى ”سیناریۆی ئەم دوژمنکارییە لە تاران نووسراوە، واتە ئێران دەیەوێ لەو ڕێگەیەوە زیان لە پارتی دیموکراتی کوردستان بدا، کە تا ئەمڕۆ نەچۆتە ژێر ڕکێڤی بڕیارەکانی تاران”.
نەجاڕى، سەبارەت بە پەیامەکى تالەبانى، گووتى ”پەیامەکەی بافڵ تاڵەبانی بۆ پشتیوانیی لە دادگای فیدڕالی بەشێکە لەو سیناریۆیە و مەخابن کورد دەرس لە مێژوو وەرناگرێ و ناتەبایی و دووبەرەکی نێوان لایەنەکانی کوردستان، ڕۆژ دواى رۆژ زیاتر دەبێ، بافل دەبێ ئەو ڕاستییە بزانێ کە مافە نەتەوایەتییەکانی گەلی کورد لە چوارچێوەی عێراقی ژێر دەسەڵاتی ئێران نایەنه دی، بگرە دیسان کورد دەبێتەوە کۆیلە و حکومەتی ناوەند دەیچەوسێنێتەوە، پاراستنی قەوارەی سیاسیی هەرێمی کوردستان ئەرکی هەموو لایەکە و دەرچوونی هەر بڕیارێک لە دژی ئەو قەوارەیە دەبێ لە لایەن هەمووانەوە شەرمەزار بکرێ، نەک ئەوەی لە بەر ململانێی حیزبایەتی، یەکێتی پشت لە هەولێر بکات و پشت بە بەغدا ببەستێ ”.
نووسەرو رۆژنامەنووس جەمال نەجاڕى ئاماژەى بەوەشکرد،”ئەمڕۆ سلێمانی بەشێکە لە قەوارەی سیاسیی هەڕێمی کوردستان و یەکێتیی نیشتمانیش هێزی دووەمی هەرێمە لە ڕووی بەشداریی سیاسی، بۆیه حەق وایە سەرۆکی یەکێتی و هەموو یەکێتییەکان قیبلەی سیاسییان لە بەغداوە بەرەو هەولێر بگوڕن و بە تەبایی و یەکڕیزی لەگەڵ پارتی، دۆزی ڕەوای کورد بەرەو پێش ببەن و لە دژی دوژمنانی کورد یەکدەنگ و یەکهەڵوێست بن”.
