ڕێبوار حەمەلاو شوانی
بەیاننامە و بڕیاری پارتی دیموكراتی كوردستان لەبارەی بەرچاو ڕوونی و دۆخی ناڵەباری سیاسی عێراق و كوردستان ئەو پێشێلكاری و بڕیارە یەك لەدوای یەك و سپێنەرانەی كە دادگای بەناو فیدراڵی بەرامبەر بە گەلی كورد و كوردستان دەیكات ، نەك هەر جێگەی هەڵوەستەكردن و گومانە، لە كوردستانیش شاگەشكەبوون و پشتیوانیكردنی هەندێك كەس و لایەنە و دەزگا میدیاكانیان تێبینی و مینرێژكراوی ئەو هەڵبژاردنەی زیاتر ئاشكرا تر كرد ، لەگەڵ هەڵمەتێكی چەواشەكارانە گوایە پارتی ڕێگە بە ئەنجامدانی هەڵبژاردن نادات تا لە دوو ڕێگەوە زیان بە ناوبانگی قەوارەی یاسایی و دەستووری و دیموكراسی كوردستان بگەێنن كە پارتی دیموكراتی كوردستان پارێزەریتی .
ئەوەی جێگەی هەڵوەستەكردنە ، هەموو ئەو كەس و لایەنانەی كە دڕكیان بە بڕیارە فێڵبازانەكەی دادگای بەناو فیدراڵی و ئینجا لە پشتەوە ئامادەكاری بۆ دابەشكردنی كورسییەكان بە دەستی دەرەكی بۆ ئەو خەون و ویستانەی كە نەیارانی پارتی و كوردستان نەخشەی بۆ داڕشتبوو و خوێندنەوەی سەركردایەتی پارتی و هەمیش جەماوەرەكەی و تێبینی لە سەر كۆمیسیۆن و بڕیاری تری نادادپەوەرانە هەڵوێستێكی ژیرانە بوو بەرامبەر بەشێك لەو هەموو دۆسییە و كێشانە كە وەك دەیان مینی چێندراوە بەرامبەر پارتی و ئەزموونە دیموكراسی و پێكهاتەكانی ، بۆیە ، ئەگەر بەوردی هۆكارەكانی ڕەتكردنەوەی بەشداریكردن لە هەڵبژاردنێكی مینرێژكراو لەلایەن پارتییەوە بۆ ئەو ڕاستییانە دەگەڕێتەوە كە بڕیتین :
یەكەم : بەردەوامی بڕیارە پێشێلكاریی و دەستوەردانە نایاسایی و نادەستوورییەكانی دادگای بەناو فیدراڵی دژی كوردستان ، بەتایبەت لەو بواری یاسایی هەڵبژاردن ، بەتایبەتی كە بوغرایی و تاكڕەوی گەیشتووەتە قۆناخێك كە خۆی لە شوێنی پەرلەمان و سەرۆكایەتی كۆمار و حكومەت دەبینێتەوە ، كە خۆی لە خۆیدا پێچەوانەی گشت بنەماكانی دەستووری هەمیشەیی عێراقە .
دووەم : زیاتر لە 10 ساڵە حكومەتە یەك لەدوای یەكەكانی عێراق ستەمكارانە ترین فشاری ئابووری و سەربازی و پێشێلكاری و سیاسەتی مووچەبڕین و بودجە بڕین بە پاساو و بیانووی بێ بنەما و نادەستووری دژی كوردستان دەكەن بە بێ ئەوەی دادگا بچووكترین بەرگری لە مافە دەستوورییەكانی خەڵكی كوردستان بكات .
سێیەم : سیاسەتەكانی فاشیزمییەكانی لە بەغداوە بە ئاراستەی لێدانی شكۆ و ئیرادە و سەروەرییەكانی كوردستانە كە ئامانج مل پێكەچكردنە بە فەرمان و پیلانگێڕی پێشتر دراێژراو دەرەكی ، بەڵام خۆڕاگری و ئیرادەی خەڵكی كوردستان وەك ڕابردوو هەموو ئەو مین و خەونانە پووچەڵ دەكاتەوە ، كاروانی خەباتمان بۆ بەدیهێنانی مافە ڕەواكانمان بەردەوامە .
چوارەم : دەسەڵاتدارانی عێراق چەند ساڵێكە بە زێهنییەتی زۆرینە و تاكڕەوانە مامەڵە لەگەڵ كوردستان دەكەن و گشت بنەماكانی هاوبەشی و سازان و هاوسەنگی كە هەموو هێز و لایەنەكانی عێراق لە سەر كۆك بوون لەگەڵ دەستووری هەمیشەیی، پشتگوێ خست و ئێستا تەنیا بە فەرمانی وڵاتانی هەرێمی جووڵە دەكەن .
پێنجەم : لە سەر ئاستی عێراق و كوردستان بە پاڵپشتییەكی زۆری دارایی و میدیا و بەكارهێنانی دەیان كەسی پسپۆڕ لە بواری دەروونی هێرش و پەلاماردانێكی چڕ و تێروتەسەڵ دژ بە هەرێمی كوردستان و دەستكەوت و پێشكەوتنەكانی كە مێژوو و هەموو كەسێكی ژیر ئاگادارە كە لەگەڵ ناوچەكانی تری عێراق بە هیچ شێوەیەك بەراورد ناكرێن، جێبەجێ دەكرێت ، بەتایبەتی كە پارتی ئاڵا هەڵگری ئەو گەشەسەندن و ئاوەدانی و ئەرك و بەرپرسیاریەتی نەتەوەیی و نیشتمانی هەڵگرتووە وەك شانازییەكی نەتەوەیی و مێژوویی.
شەشەم : لەوەش گرنگتر ئەوەیە كە لە ماوەی چوار ساڵی ڕابردوو ، بە دەیان جار بە ڕێگەی مووشەك و درۆنەوە هەرێمی كوردستان و بەتایبەتی هەولێری پایتەختی كوردستان و شوێنە گرنگە ئابووری و ستراتیژییەكانی لەلایەن ئێران و گرووپ و میلیشیا لە یاسا دەرچووەكان كراوەتە ئامانجی دوژمنكارانە بەڵام بە بێ ئەوەی ئەو دادگا نا فیدراڵی و عێراقی فاشیزمی بچووكترین هەڵوێست و كاردانەوەیان بۆ ئەو پێشێلكارییانە هەبێت ، ئەوەش ئاماژەیە بە نەبوونی سەروەری و یاسا و كۆنترۆڵكردنی ئەو وڵاتە لە لایەن وڵاتانی هەرێمی كە هەموو ئەو هەوڵانە ڕاستەوخۆ و نا ڕاستەوخۆ ئامانجیان لێدانی ئیرادە و پێگە و شكاندنی شكۆ پارتی و قەوارەی هەرێمی كوردستان ، بەڵام پارتی هەمیشە وەك چیایەك پۆڵایین ڕووبەڕووی هەموو ئەو پیلانگێڕییانە وەستاوەتەوە و مینەكانی بەردەمی پووچەڵ كردووەتەوە ، لەگەڵ ئەوەش هەمیشە پارتی و سەركردایەتییەكەی خۆی بە خاوەن دۆزی ڕەوای گەل و نیشتمانەكەی دەزانێت ، بۆیە بە درێژایی مێژوو زۆر بوو ئەوانەی كە خۆیان تاقی كردەوە بۆ نەهێشتنی پارتی و ڕێبازی بارزانی بەڵام ئەوان لەناوچوون و پارتی هەر بەهێزتر لە جاران بەردەوام بوو لە خەبات و سەركەوت .
حەوتەم : بۆیە، ستراتیژ و ئامانجی پارتی لە بەشداری نەكردنی ئەو هەڵبژاردنە مینرێژكراوە ، پەیامێكی ڕاشكاو و ڕوونە بۆ دوژمنانی كوردستان و فاشیزمەكانی عێراق بەوەی پارتی تەپۆڵكەیە نییە كە هەر دوژمن و نەیاران بەسەریدا هەڵگریت بەڵكوو چیایەكی سەرەكەشە كە دەیان دوژمنان و نەیاری كوردستانی هەڵدێراوە ، پارتی ژمارەیەكی گەورەیە لە هاوكێشە سیاسی و ناوچەیی و نێودەوڵەتییەكان و بە پیلانگێڕی و قەیرانی دەستكردەكان و فشاری كۆیلە و بەكرێگیراوان نەك هەر لاواز نابێت و ناكەوێت بەڵكوو هەرگیز ناكەوێتە ژێر كاریگەریان ، گرەو كردن لە سەر پارتی و شكاندنی خەونێكە كە هەرگیز نایەتە دی و مێژوو و داستان و خەباتی بێ وچانی بارزانی و ڕێبازی بارزانی و پارتی گەواهیدەرەن كە چۆن ڕووبەڕووی گەلەكۆمەكی و پیلانگێڕیی و تیرۆر و گەمارۆدان ناوچەیی و نێودەوڵەتییەكان بووە و هەرگیز ئەنفال و كیمیاباران و تانك و تۆپ و فڕۆكە و گەمارۆكان نەیانتوانی ئیرادەی كوردایەتیمان لاواز بكەن و ساردمان بكەنەوە لە خەبات.
بۆیە، ئیتر هەموو ڕاستییەكان ڕوون بوونەوە ، هەر هەنگاوێك لەلایەن فاشیزمەكانی عێراق و دادگای بەناو فیدراڵییەوە ، هەر لە بارەی مووچە و بودجە و پرسە ناوخۆیییەكانی هەرێمی كوردستان و بەتایبەتی پرسێكی چارەنووسسازی وەك هەڵبژاردنی كوردستان و ئینجا بێ هەڵوێست بوو بەرامبەریان واتا كۆتایی هێنان بە قەوارەی كوردستان و ڕادەستكردنی بە دوژمنانی دەرەكی و ناوخۆیی كە ئەوەش خەونێكی نەزۆكە كە هەرگیز نایەتە دی .
