وەڵامێك بۆ بەهرۆز گەڵاڵی و هاوبیرانی

كاتێ مێژوویەكی ناشیرینت هەیە شەرمە باسی پارتی بكەی

ئیسماعیل ئیبراهیم

لە دوای هەڵوێستە نەتەوەیی و نیشتمانییەكەی پارتی دیموكراتی كوردستان، بۆ بایكۆت كردنی هەڵبژاردنێكی سەپێندراو، هەندێك بەرپرسی یەكێتی وەك ئەوەی كێچیان كەوتبێتە كەوڵی دەستیان داوەتە لێدوان و نووسین و قسەی بێ بنەما لەسەر هەڵوێستی پارتی دەكەن .

وەك ئەوەی پارتی هەر لە خۆڕا و بێ بوونی هیچ كێشەیەك و بە مەبەستی شەڕ فرۆشتن بەملا و ئەولا ئەو بڕیارەی دابێت، دڵنیام زۆرێك لەو كەسانە بە وردی و بە قوڵی بەیاننامەكەی مەكتەبی سیاسی پارتییان نەخوێندۆتەوە، دەنا ئاوا شلم كوێرم بەناو ناكەون.

بەهرۆز گەڵاڵی، نوێنەری پێشووی یەكێتی لە توركیا لە وتارێكدا نووسیویەتی:
“بە داخەوە نەدەبوو تاك لایەنە پارتی ئەم هەڵوێستە وەربگرێت، چونكە بڕیاری لەم شێوەیە زیاتر ماڵی كورد لێكدەترازێنی و كورد بەرە و كارەسات و بارودۆخێكی زۆر خراپتر لە ئێستا دەبات”.
لام سەیر نییە بەهرۆز گەڵاڵی و هاوبیرانی بەم شێوەیە قسە بكەن، لەبەر ئەوەی بەتەمەن داچوون هۆكارێكە بۆ لە بیر چوونەوە، ئەم بەڕێزە باسی “بڕیاری تاك لایەنەی پارتی” دەكات، لە بیری چۆتەوە، یەكێتی تاك لایەنە 16ی ئۆكتۆبەری كرد، بیری چۆتەوە ئەندامانی سەركردایەتی حزبەكەی تاك لایەنە دەچوونە بەغدا و داوای بڕینی مووچە و بودجەی هەرێمیان دەكرد و داوایان دەكرد ئابلۆقەی ئابووری بخەنە سەر هەرێم، بیری چۆتەوە ئەندام پەرلەمانەكانی ئەوان دەنگیان بە زیادكردنی بوددجە و پارەدار و چەكدار كردنی حەشدی شەعبی دا، بەپێی قسەكانی بێت لە بیری چۆتەوە حزبەكەی تاك لایەنە بۆتە داشی یاری دژە كورد، و پشتگیری هەموو بڕیارێك دەكات بۆ دژایەتی پارتی (واتە كورد)، كاك بەهرۆز تۆزێك بیر بكاتەوە، دەزانێت ئەم كێشانەی بۆ كوردستان دروستكراون و هەوڵی لاواز كردنی دەدرێت، بەهۆی سكاڵای حزبەكەیەتی، بیری چۆتەوە ئەو شارە كوردییەی حزبەكەی بە قودسی كوردستان ناوی دەبرد، لە لایەن هاوئاوازەكانتانەوە بە قودسی عێراق ناوزەد كراوە، بیرتان چۆتەوە بۆ هەموو ئەو هێرشانەی دەكرێنە سەر گوندەكانی سنووری ماددەی 140 یەكێتی تاك لایەنانە بێ دەنگە، لەسەر ئەو غەدرانەی لە هاووڵاتییانی كوردی كەركووك دەكرێت یەكێتی لێ بەرپرسە و هیچ كاردانەوەشی نییە، ئەوە شاخەوان عەبدولڵای پارتییە لەسەریان شەڕ دەكات.

لە دیدی ئەم بەهرۆزە، “پارتی هەڵەی ستراتیژی كردووە بەم بڕیارە” بە دڵنیاییەوە لە دیدی خاك فرۆشان و نۆكەران، پارتی بە هەڵوێستە نیشتمانییەكانی هەڵەی ستراتیژی كردووە، چونكە هەموو پیلانی دوژمنان بە دەمڕاستی خۆفرۆشان بەتاڵ و پۆچەڵ كردەوە، بۆیە چاوەڕێی ئەوە لە ئێوە و هاوشێوەكانتان ناكرێت بە بڕیارە نیشتمانییەكانی پارتی دڵتان ئاو بخواتەوە.
نازانم چۆن لە رووی هاتووە باسی ماددەی 140 و جینۆسایدی هەڵەبجە و دادگای فیدڕاڵی كردووە.
كاك بەهرۆز جارێ ئەگەر نییەتی كوردایەتیتان هەیە، فەرموون با نوێنەرتان لە دادگای باڵای بە سیاسی كراوی عێراق بكشێتەوە، بۆ ناكشێتەوە؟، ئاغاكانتان رازی نین بۆیە.

دەیان شاهید حاڵ هەن كە هۆكاری جینۆسایدی كردنی هەڵەبجە سیاسەتی سەرەڕۆییانەی حزبەكەت بووە، هەر ئێوە بوون رێگەتان لە هاووڵاتییان گرتووە كە لە شارەكان دەرنەچن و هەموویان بوونە قوربانی و خۆتان وەك بەرزی سەربابان بۆی دەرچوون.

بەهرۆزی پەراوێز خراو، بۆ ئەوەی بیهێندرێتەوە ناو ناوان و پۆستێك و پلەی دەست كەوێت، باسی ئەوە دەكات” پارتی دەیەوێت خۆی وەك پاڵەوان نمایش بكات” و دیسان ریفراندۆمە مێژوویەكی بە نموونە هێناوەتەوە، كاك بەهرۆز پارتی مێژوو سەلماندوویەتی پاڵەوانە نەك بیەوێت خۆی نمایش بكات، هەموو سەركردەكانی رۆژهەڵاتی ناوەڕاست و جیهان، پارتی و سەرۆكەكەی بە پاڵەوان دەزانن، كە بە درێژایی مێژوو بە ئێستاشەوە رووبەڕووی هەموو پیلانی داگیركەران و خائینانی ناوخۆ وەستاوەتەوە، ئەو لایەنەی بییەوێت بە پاڵەوان ناوی ببردرێت، نابێ مامەڵە بە خوێنی شەهیدان و كوردستان و نەتەوە بكات، نابێ بچێتە ژێر باری ویستی دوژمنان، ئەوەی دەیەوێت ببێتە پاڵەوان ناچێتە بەرەی دوژمنەوە، وەك ئەوەی یەكێتی بە درێژایی مێژوو كردوویەتی.

پارتی تاك لایەنانە و بە پاڵپشتی پێكهاتە رەسەنەكانی كوردستان رووبەڕووی پیلانەكانتان دەبێتەوە، جگە لەوەی لە پێش چاوی ئاغاكانتان ناشیرینترتان دەكاتەوە، هەیبەت و شكۆی نیشتمان دەپارێزێت.

بۆیە فێربە كاتێ ماڵی خۆت لە شووشەیە و مێژووی حزبەكەت وێرانە، بێ ئەوەی دەست نوێژت هەبێت باسی مێژووی پارتی مەكە.