بێرنارد هنری لێڤی، فەیلەسووفی فەڕەنسی لە دیداری پرسی كورد لە رۆژهەڵاتی ناوەڕاست ئامادە بوو، لە میانەی بەشداریكردنەكەیدا وتارێكی پێشكەش كرد و گووتی” دوو ساڵ لەمەوبەر لە چیای قەرەچووغ بووم لەگەڵ هاوڕێم سیروان بارزانی، وێنەی دیمەنەكانم دەگرت كە ئەوكات تازە پێشمەرگە ئۆپەراسیۆنێكی كردبوو. لە كۆتایی ئۆپەراسیۆنەكە پێشمەرگەیەك پرسیاری لێكردم، تۆ یەكێكی لە راوێژكار و ئەوانەی كار لەسەر دۆسیەی ئێمە دەكەی؟ منیش وەڵامم دایەوە و قسەكەشم كردە دوا دیمەنی فیلمەكەم، من گوتم تا كۆتایی رێگە و كۆتایی ژیانی من، لەگەڵ كوردەكان دەمێنمەوە”
ئەو فەیلەسووفە فەڕەنسی لە بەشێكی ووتارەكەیدا ئاماژەی بەوەدا” ” لە 1991 و 2014ش لە كوردستان بووم. لە شەڕی مووسڵ لێرە بووم. زۆر خۆشحاڵم و شانازی دەكەم و بەوپەڕی ڕاشكاوییەوە دەیڵێم شانازی دەكەم ئەمڕۆش لێرەم. حكوومەتی هەرێمی كوردستان گلەیی و تۆمەتی ئاراستە دەكرێت بەوەی گوایە، ئەو سەرچاوەی ناسەقامگیرییەكان بێت كە لەناوخۆی وڵاتەكانی دەورووبەردا روودەدات، خۆم ئەو راستییەم بینیوە لەوەی برا كوردەكانی ئێران كە پەناگەیەكتان لە هەرێمی كوردستان پێیان داوە، ئەوانە خەڵكانێكی سەلامەتخواز و هێمنن، ئەوان ساڵانێكی یەكجار زۆرە ئێرانیان بەجێ هێشتووە و هیچ چالاكییەكی سەربازییان نییە، تەنیا لە 2014 نەبێت كە شانبەشانی براكانیان لە هەریمی كوردستان شەڕی تیرۆریزمیان كرد”ز
بێرنارد هنری گووتیشی ” من چووم و ئەو ناوچانەم بینیوە، لە سلێمانیش سەردانم كردوون. دەزانم و دڵنیام بە هیچ جۆرێك هیچ چالاكییەكی سەربازیی ئەو برا كوردانە بەرامبەر بە ئێران نییە، هیچ بەهانەیەك نییە تا ئێران ئەم هێرشانە بەرامبەر بە هەرێمی كوردستان بكات. بەڵام ئەمە ئەو تێگەیشتنەیە كە وڵاتانی ناوچەكە بەرامبەر حكوومەتی هەرێمی كوردستان هەیانە و تۆمەتباری دەكەن، لە مێژووشدا چەندینجار كوردەكان بە كێشەی ئەوانی دیكە تۆمەتبار كراون”.
ئەو فەیلەسووفە فەڕەنسییە جەختی لەوە كردۆتەوە كە ” لە هەرێمی كوردستان ڕێزگرتن لە مافی مرۆڤ و ئافرەت هەیە و پێكەوەژیان و لێبووردەیی بەرامبەر بە ئایینەكان هەیە. ئەمە لە دەوروبەرەكەی نییە. هەرێمی كوردستان خەزێنەیەكە و بریتییە لە نموونەیەكی جوان بۆ بەشێكی زۆر لە خەڵكی لە جیهاندا، خەڵكی دێن تەماشای ئەم كارە جوانە دەكەن و دەترسن لەوەی ئەم نموونەیە بۆ وڵاتەكانی ئەوانیش بڵاو بێتەوە، من دەمەوێ بڵێم ئێوە نموونەیەكی جوانن بۆ خەڵكێكی زۆر لە جیهاندا و دەبێ بە هێمنی ڕووبەڕووی فشارەكان ببنەوە. یەكەمین شت بۆ ڕووبەڕووبوونەوەی فشارەكان، ئەوەیە كە دەبێت یەكگرتوو بن. پێموایە زۆر باش دەبێت كە تا ئەوكاتەی پێتان دەكرێ، وەفا بۆ وڵاتەكەتان نیشان بدەن، پرسی وەفای حكوومەتی هەرێمی كوردستان و سەركردەكانی كورد بۆ هاوپەیمان، دۆست و دراوسێكانیان و گرنگترین شت بۆ عێراق، گرنگە”.
