زاری كرمانجی-سۆران:
” كاتێ بێ هەڵوێستی یەكێتی و كارە قێزەوونەكانی دەبینم شەرم دامدەگرێت”
دوای ئەوەی رەیان كلدانی، ئەمینداری گشتی بزووتنەوەی بابیلۆن، كە هاوپەیمانی سەرەكی بافڵ تاڵەبانییە، لە دیمانەیەكی تەلەفزیۆنی گووتی ” كەركوك قودسی كوردستان نییە” یەكێتییەكان توڕە دەبن و پێیانوایە، پشتگیری كردنی ئەو كەسە لە لایەن سەرۆكی حزبەكەیانەوە خیانەتە لە مێژووی و خوێنی شەهیدانی یەكێتی.
رەیان لە دیمانەكەدا دەڵێت ” هەولێر لە باكووری عێراق بەشێكی دانەبڕاوە لە عێراق، و هەرگیز قبووڵی ناكەین و سازشی لەسەر ناكەین، كەركووك بەخوێن و قوربانیدان ئازاد كراوە، بە رێككەوتن لەگەڵ برایان لە یەكێتیی نیشتمانی كوردستان”.
ئەم قسانەی رەیان كلدانی دووپات كردنەوەی خیانەتی 16ی ئۆكتۆبەرە كە یەكێتی بە رێككەوتن لەگەڵ هێزە عێراقیەكان و ئێران لە دژی هەرێمی كوردستان كردیان.
بێ دەنگی یەكێتی لەو هەڵوێستانەی رەیان، بەشێك لە یەكێتییەكان توڕە كردووە و پێیانوایە” قسەكانی رەیان و بێ هەڵوێستی سەركردایەتی یەكێتی، لە ئاست رووداوەكانی ئەم دواییە خیانەتە لە خوێنی شەهیدان و مێژووی یەكێتی”.
كادیرێكی یەكێتی كە بە هۆی هەستیاری بابەتەكە و لە ترسی دوور خستنەوە و نان بڕوا كردنی نەیویست ناوی بنووسرێت بە زاری كرمانجی گووت ” كاتێ قسەكانی رەیانم بیست هەستم بە شەرمەزارییەكی زۆر كرد، رقم لە خۆم دەبوویەوە كە بە ناچاری یەكێتیم”.
ئەو كادیڕەی یەكێتی زیاتر روونیكردەوە ” كاتێ دەبینم بە هۆی یەكێتییەوە دۆخی كوردستان و هەرێمی كوردستان بەم شێوەیەی لێ هاتووە، كە بۆتە هۆكاری لاوازی پێگەی سیاسی هەرێمی كوردستان كە بە خوێنی هەزاران رۆڵەی ئەم نیشتمانە بنیاد نراوە، لە لایەكی دیكەش بێ هەڵوێستی یەكێتی لە زۆر بوارەی نەتەوەیی نیشتمانییەوە دەبینم شەرم لە خۆم دەكەمەوە، تەنها منیش نیم زۆربەی كادیرانی یەكێتی وایان لێهاتووە”.
