ئەمریكا لە یادی كیمیابارانكردنی هەڵەبجە : بەردەوام دەبین بۆ پێكەوە كاركردن لەگەڵ یەكتر، بۆ ئەوەی كارەساتی قێزەونی لەم جۆرە ڕوو نەدەنەوە

مەهدی محەممەد – زاری كرمانجی :

كونسوڵخانەی ئەمریكا، لە یادی كیمیابارانكردنی هەڵەبجە ڕاگەیاندراوێكی بڵاو كردەوە.
كونسوڵخانەی ئەمریكا لە هەولێر، ئەمڕۆ 16ی ئادار لە ساڵیادی كیمیابارانكردنی هەڵەبجە، لە تۆڕی كۆمەڵایەتی فەیسبووك ڕاگەیاندراوێكی بڵاو كردەوە و دەڵێت “ئەمڕۆ ٣٦یەمین ساڵیادی كۆمەڵكوژییە دڕندانەكەی هەڵەبجەیە، كە تێیدا ڕژێمی پێشووی سەددام حسێن چەكی كیمیایی بەكارهێناو بووە هۆی گیان لەدەستدانی زیاتر لە ٥ هەزار كەسی مەدەنی بێتاوان لە ماوەی تەنیا ٢٠ خولەكدا و لە هەمان كاتیشدا بووە هۆی بە سەختی برینداربوونی زیاتر لە ١٠ هەزار كەسی تر.”
لە ڕاگەیاندراوەكەدا كونسوڵخانەی ئەمریكا ئەوەشی خستووەتە ڕوو “لەم ساڵیادە ناخۆشەدا كە ڕۆژی پرسە بارییە بۆ هەموو عێراقییەكان و بە تایبەت لە هەرێمی كوردستان،”
دەشڵێت “كونسوڵخانەی ئەمەریكا لە هەولێر، لەگەڵ گشت لایەك لە جیهانەوە بەشدارە لە یادكردنەوەی ئەو كەسانەی كە گیانیان لەدەستدا و برینداربوون.”
كونسوڵخانەی ئەمریكا لە كۆتایی ڕاگەیاندراوەكەی ڕادەگەیەنێت “بەردەوام دەبین بۆ پێكەوە كاركردن لەگەڵ یەكتر بۆ ڕێگریكردن بۆ ئەوەی هەرگیز كارەساتی قێزەونی لەم جۆرە ڕوو نەدەنەوە و برەو بدرێت بە پرەنسیپی ئاشتی و لە یەكتر تێگەیشتن و فرەیی.”