زاری كرمانجی-سۆران
مامۆستای زنكۆ: دەڵێت، شیعە مەزهەبەكان رێبەرایەتی پڕۆسەی سیاسی دەكەن، سەرەڕای ئەوەی لە گۆشەنیگایەكی بەرتەسكی مەزهەبیەوە پەیڕەوی دەسەڵات دەكەن، ئەوەی ئێستا لە رەفتارو هەڵس و كەوتیشیان تێبینی دەكرێت، دەیانەوێت لە رێگەی دادگای فیدراڵییەوە پایەكانی دەسەڵاتە مەزهەبیەكەیان لە سەر حسابی پیكهاتەكانی تر تۆكمە بكەن.
هاوار محەمەد یوسف، چاودێری سیاسی و مامۆستای زانكۆ بۆ زاری كرمانجی گووتیشی ” لە دوای روخانی رژێمی سەدام و هاتنە ئارای شێوازی نوێی حوكمڕانی، بۆ یەكەمینجار دەستور بە هاوبەشی پێكهاتەكانی عێڕاق نوسرایەوە وپاشان لە پڕۆسەیەكی راپرسیدا، لەلایەن زۆرینەی خەڵكەوە بە دەنگی بەڵێ ئەرێكرا و پەیڕەوكردنی سیستەمی فیدراڵی بڕیاری لێدرا وەك لە بەندی یەكەم (بنەما گشتییەكان) مادەی(١)ی دەستوردا هاتوەو دەڵێت” كۆماری عێڕاق دەوڵەتێكی فیدراڵی یەكگرتووی سەربەخۆی خاوەن سەروەریە، سیستەمی حوكمڕانی تێیدا كۆماری نوێنەرایەتی (پەرلەمانی)دیموكراسییە، كە ئەم دەستورەش یەكپارچەیی عێڕاق دەپارێزێت”.
ئاماژەی بەوەشدا ” ئێستا دوای (٢٠) ساڵ، شیعە مەزهەبەكان رێبەرایەتی پڕۆسەی سیاسی دەكەن، سەرەڕای ئەوەی لە گۆشەنیگایەكی بەرتەسكی مەزهەبیەوە پەیڕەوی دەسەڵات دەكەن، ئەوەی ئێستا لە رەفتارو هەڵس و كەوتیشیان تێبینی دەكرێت، دەیانەوێت لە رێگەی دادگای فیدراڵییەوە پایەكانی دەسەڵاتە مەزهەبیەكەیان لە سەر حسابی پیكهاتەكانی تربە تایبەتیش (كورد و سوننە) تۆكمە بكەن و تەنانەت قەرەبووی (١٠٠) ساڵی رابردوشیان بكەنەوە كە لە پڕۆسەی سیاسی و ناوەندی بڕیاری سیاسی ئەم وڵاتە پەراوێز خرابوون”٠
گووتیشی: ” دادگای فیدراڵی، كە بە پێی بنەما دەستورییەكانی عێڕاق دانەمەزراوە، خۆی لە خۆیدا سەرپێچی دەستوریە، لە ئێستادا مەترسی زۆری لە سەر خودی عێڕاق ،پێكهاتە جیاجیاكان، بنەما دیموكراتیەكان، پێكەوەژیان و تەنانەت یەكپارچەیی ئەم وڵاتەش دروستكردوە، چونكە خەریكە ناوەڕۆكی تەواوی ئەو بەند و مادە دەستوریانەی كە ٪٦٦ هاووڵاتیانی عێڕاق دەنگیان پێدا، لە رێگەی شیكردنەوەی جیاواز رەتدەكاتەوەو تەفسیری تازەیان بۆ دادەهێنێ كە نەگونجاوە لە گەڵ فەلسەفە و رۆحی دەستور.
ئەوەش دەخاتەڕوو ” لە بەشی دووەم، دەسەڵاتی راپەڕاندن، لقی یەكەم،مادەی (٦٧) لە دەستوری عێڕاقدا هاتووە” سەرۆك كۆمار سەرۆكی وڵات و نیشانەی یەكپارچەیی نیشتیمان و سەروەری وڵاتە، هەوڵدەدات بۆ پابەند بوون بە دەستور و پارێزگاری لە سەربەخۆیی و سەروەری و یەكێتی پاراستنی خاكی عێڕاق بە پێی بڕگەكانی دەستور، بە پێی ناوەڕۆكی ئەو مادەیە بێت كە دەڵێت” هەوڵدەدات بۆ پابەند بوون بە دەستور”.
ئاماژەی بەوەشدا ” سەرۆك كۆمار دەسەڵاتی دەستنیشانكردنی سەرپێچیە دەستوریەكانی هەیە و لەم روەوەش دەسەڵاتەكانی لە سەرووی دەسەڵاتی دادگای فیدراڵیەوەیە و دەتوانێت داوای پێداچوونەوە بە بریارەكانی دادگا بكات لە كاتێكدا تێبینی پێشێلكاری دەستوری دەكات، بە تایبەت لەو بڕیارانەی ئەم دادگایە دەریاندەكات و تیایدا سەرجەم ئەو دەسكەوتانەی كە هەرێمی كوردستان لە دەستوری عێڕاقدا جێگیریكردوون هەڵیان دەوەشێنێتەوە.
