وەرزش ـ زاری كرمانجی:
پێنج ساڵ لەمەوپێش لەنێو پارك دی فڕانس، پاریس سانجێرمان، لەیاریی چوون 4-0 لەبارسێلۆنایان بردەوە، زۆرینەی پێشبینیەكان بەو ئاراستەیە بوون كە یانە فەڕەنسییەكە سەركەوتووە بۆ قۆناخی دواتر، بەڵام لەیاریی گەڕانەوە پێچەوانەی تەواوی پێشبنییەكان بارسا 6-1 لە پاریس ـی بردەوە و جیهانی بردە باری شۆكبوون و قۆناخەكەی بەسەركەوتوویی بڕی.
ئیدینسۆن كاڤانی هێرشبەری ئۆروگوایی و پێشووی پاریس سانجێرمان دوای پێنج ساڵ نهێنییەك سەبارەت بەرێمۆنتادایەكەی بارسێلۆنا دژی پاریس سانجێرمان دەدركێنێت.
كاڤانی لە چاوپێكەوتنێكی رۆژنامەوانیدا گوتی: “لە دوای ئەو ریمۆنتادایەی بارسێلۆنا بەسەر پاریس سانجێرمان راستەوخۆ پەنام بردە لای پزیشكی دەروونی، چونكە بەرگەم نەگرت و هەستم كرد نەخۆش و لاوازم”.
هێرشبەرە ئۆرگواییەكە لە درێژەی قسەكانیدا دەڵێت:” گەڕانەوەی بارسێلۆنا لەوپەڕی بێ ئومێدییەوە بوو، بۆیە كاریگەری راستەوخۆی لەسەرمان دروستكرد”.
كاڤانی كە ئێستا ھێرشبەری ڤاڵێنسیایە لە درێژەی ئاخاوتنەكانیدا ئاماژە بەوەدەكات” راستە تەنها یارییەكی تۆپی پێ بوو، بەڵام لایەنی دەروونی منی شڵەژاند، بە جۆرێك دوای یارییەكە نیشانەكانی نەخۆشی لەسەر من بەدیار كەوت و ئارەقەم دەكرد و پێشخەوتنیش سەرم دەسوڕا و حەزم نەدەكرد بخەوم”
لە ساڵی 2017 لە یاریی چوونی قۆناغی 16ـی چامپیۆنزلیگ، یاریزانانی بارسێلۆنا گەورەترین ریمۆنتادای مێژووییان بەسەر یانە فەرەنسییەكە تۆمار كرد، لەم یارییەدا تاكە گۆڵی پاریس لە رێگەی كاڤانی ـەوە بوو.
