زاری كرمانجی-مێرگەسۆر:
دوو هەزار و 565 كارتی دەنگدان گەڕاونەتەوە بنكەی كۆمیسیۆنی مێرگەسۆر، بەرپرسی بنكەكەش داوایەكی لە هاووڵاتییانی سنوورەكە هەیە.
سەروان مێرگەسۆری، بەرپرسی بنكەی كۆمیسیۆنی هەڵبژاردن لە قەزای مێرگەسۆر، بۆ زاری كرمانجی گوتی: دوو هەزار و 565 كارتی دەنگدان گەڕاونەتەوە بنكەی كۆمیسیۆنی مێرگەسۆر، ئەوانەش هی ئەو كەسانەن كە لە 20-3-2022 تا مانگی 9ی 2023 خۆیان تۆمار كردوووە، ئێستا دەتوانن سەردانمان بكەن و كارتەكانیان ببەنەوە، بۆ وەرگرتنەوەی كارتەكانیش دەبێت یەكێك لە بەڵگەنامەكانی وەكو كارتی نیشتمانی، جنسیەی عێراقی، نفووس یان پاسپۆرتی پێ بێت بۆ ئەوەی كارتەكەی وەربگرێتەوە.
بەرپرسی بنكەی كۆمیسیۆنی هەڵبژاردن لە قەزای مێرگەسۆر، گوتیشی: كارتەكان تا 10 ڕۆژ پێش هەڵبژاردن دەدرێنەوە هاووڵاتییان، پێویستە هاووڵاتییان تا ئەو ماوەیە سەردانمان بكەن، چونكە ئەگەر هاووڵاتییان ئەو كارتەیان پێ نەبێت ناتوانن دەنگ بدەن.
