مووچە و بودجە بۆ ئێوە، نیشتمانیش بۆ ئێمە

ئیسماعیل ئیبراهیم

گووتیان نەوت ڕادەست بكەن، ژیانی هاووڵاتییان لێوان لێو دەبێت لە خۆشگوزەرانی، نەوت ڕادەستكرا، بەڵام خۆشگوزەرانی هاووڵاتییان وەك خەونی حوشتری لێهات.
دواتر گووتیان داهاتی ناوخۆ و خاڵە سنوورییەكان ڕادەست بكەن، كێشەی سیاسی نێوان هەرێم و بەغدا نامێنێت، مووچە و بودجە بە زیادەوە لەلایەن بەغداوە دەنێردرێت، داهات ڕادەستكرا، ئەمەش دۆخی مووچە و بودجەیە كە هەموومان دەیبینین.
گووتیان پابەندی بڕیارەكانی دادگا بن، بڕیارەكانی دادگای باڵای بە سیاسی كراویشمان بینی.
30 ساڵە یەكێتی و هاوئاوازەكانی بە فیتی بەغدا و تارانەوە، شەقامی سلێمانی بە شێوەی ناتەندروستی دژە نەتەوەیی ئاراستە دەكەن و بەكاریان دەهێنن، بە جۆرێك تاكی كورد لە زۆنی سەوز نیلی، بەعسییان پێ باشتر بێت لە كورد.
كاتێ ئاراستە كردنی شەقام دەكەوێتە دەست مافیای كاڵفامی سیاسی وڵات بەرەو دۆزەخ دەبرێت.
نەتەوەی كورد بە درێژایی مێژوو خەباتی قوربانیدانی بە مەبەستی ئازادی و ڕزگاری بووە، بە مەبەستی ژیانێكی شكۆمەندی بووە، كوردەكان لەبەر ئەوەی ئەنفال و كیمیاباران نەكران كە مووچەیان دەویست، گوندەكانیان خاپوور نەكرا لەبەر ئەوەی نەوتیان ڕادەست نەدەكرد، لە سەردەمی ڕژێمی بەعسی گۆڕ بە گۆڕ كچان بەهۆی داهاتی ناوخۆ لە زیندانەكان لاقە نەدەكران و دەست درێژیان نەدەكرایە سەر.
بڕیاری گوللە باران و لەسێدارەدانی گەنجان بەهۆی خاڵە سنوورییەكان نەبوو.
ئەو كات مووچە، بودجە، نەوت و هەموو داهاتی وڵات بە ژێر زەوی، سەر زەوی، ئاسمان و مرۆڤەكانەوە لەبەر دەستیان بوو، بەڵام هەر دەكوژران، بە پێش چاوی ژن و منداڵەكانیانەوە باوكان سووكایەتییان پێ دەكرا، دەست بۆ ئافرەتان دەبرا و كەسیش نەدەوێرا كاردانەوەی هەبێت.
ئایا ئەو كات كەس بیری لە مووچە و بودجە دەكردەوە ؟.
تەواوی هەوڵەكانی ڕژێمی ئێستای شیعە گەرایی بەغدا بۆ دووبارە كردنەوەی ئەو كارەساتانەیە كە لە سەردەمی بەعس لە ئاست نەتەوەی كورد دەكرا.
نكۆڵی لە بوونی كێشەی بەڕێوەبردن لە نێو دامەزراوەكانی هەرێمی كوردستان ناكرێت، بەڵام خراپترین حوكمڕانی كوردی باشترە لە حوكمڕانی داگیركەرێكی بێ ویژدانی مرۆڤكوژ.
كێ ئامادەیە پارە و سەروەت و سامانی زۆری بدرێتێ، بەڵام خاوەن هیچ شتێكی خۆی نەبێت هەتا شەرەف و نامووس ؟ ئەوەی بەم شتانە ڕازییە فەرموون ئەوە بەغدا دەرگای لەسەر پشتە بۆیان.
قوتابخانەی پارتی و توراسی شۆڕشگێڕانەی بارزانیش دەرگای بۆ ئەو مرۆڤانە لەسەر پشتە كە باوەڕیان بە ژیانی سەربەستی و ئازادی هەیە، باوەڕیان وایە كوردیش وەك هەموو نەتەوەكانی دیكە دەبێت خاوەن دەوڵەت و كیانی سیاسی خۆی بێت، لەو پێناوەش پەیڕەوانی ئەم ڕێبازە هەمیشە كەم دژین، بەڵام مەردانە و مرۆڤانە و بە كەرامەت و شكۆوە سەر دەنێنەوە و سەرشۆڕی قبووڵ ناكەن.
مووچە و بودجە بۆ ئێوە، شەرەف و نامووس و نیشتمانیش بۆ ئێمە.