“هیچ هێزێك ناتوانێت هەولێر بگەرێنێتەوە سەردەمی وێرانی و مافیاگەرایی “
” دوای شاربەدەركردنی سەرلێشێواوان هەولێر ناوەندێكی بەهێزی بڕیاری سیاسییە”
“دەتانەوێ هەولێر بگەڕێننەوە سەردەمی تیرۆر، ڕفاندن و دزی”.
” هیچ هێزێك ناتوانێت هەولێر بگەڕێنیتەوە سەردەمی وێرانەیی و مافیاگەرایی”. ئەمە بەشێكە لە بەیاننامەی لەقی 2ی پارتی دیموكراتی كوردستان لە وەڵامی شاڵاو كۆسرەت رەسول، ئەندامی مەكتەبی سیاسی یەكێتی نیشتمانی كوردستان.
دوای ئەوەی شاڵاو كۆسرەت لە نووسینێكیدا گووتبووی ” هەولێر دەگرینەوە” لقی دووی پارتی بەیاننامەیەكی بڵاو كردۆەوە كە تێیدا هاتووە ” دەنگی نەشازی هەندێك كەس و لایەنمان دێتە بەرگوێ، گوایە خەون بە گەڕاندنەوەی هەولێر بۆ سەردەمی حووكمی میلیشیایی و مافیاگەرایی و دزی و جەردەیی و سەرانەوەرگرتن دەبینن، بە عەقڵی بچووكی خۆیان پێیان وایە ئەو هەولێرەی لە سایەی پارتی و جەنابی سەرۆك بارزانی و حكوومەتی هەرێم بووەتە ناوەندێكی بەهێزی سیاسی، ئابووری، سەربازی و فەرهەنگی پێكەوەژیان، دەتوانن بیگەڕێننەوە سەردەمی تاریكی و چەتەگەرایی” .
لە بەیاننامەكە زیاتر نووسراوە” دوای شاربەدەركردنی ئەو سەرلێشێواوانە و ئازادكردنی هەولێر لە چنگی ئەو مافیا و چەتانە و گەڕانەوەی هێزی یاسا و شەرعیەت بۆ شارەكەمان و لەژێر چەتری دەوڵەتداری و دامەزراوەی شەرعی و یاسایی حكوومەتی هەرێمی كوردستاندا، بە ئیرادەی خەڵكە خۆڕاگرەكەی بووە پایتەختە درەوشاوەكەی هەمووان لە ناوچەكەدا و دروست لەو شوێنانەی ئەوان كردبوویانە گۆڕستانی خەڵك و لەو شوێنانەی بە زەبری چەك، سەرانەیان لە هەولێرییە سەربەرزەكان وەردەگرت، لەو جێگایانەی كە دەستدرێژیان دەكردە سەر ماڵ و ژیانی خەڵك، ئاوەدانی و گەشەسەندن و ئارامی و سەقامگیری بنیاتنراو ئەوانیش چوونە زبڵدانە ڕەشەكەی مێژووەوە، سەیرە تاكو ئێستاش خەونی نەزۆكی وێرانكردنەوەی هەولێر و گەڕاندنەوەی بۆ سەردەمی حووكمی رەشی خۆیان دەبینن”.
لقی دووی پارتی لە بەییاننامەكەدا پرسیارێك ئاراستەی شاڵاو كۆسرەت ڕەسوڵ دەكات و نووسیوویەتی” هەولێرییەكان دەپرسن، دەتانەوێ هەولێر بگەڕێننەوە كامە سەردەم؟ سەردەمی مافیاگەراییتان یان ئەو سەردەمەی خەڵكتان بەعەلاگەی رەشەوە تیرۆر دەكرد، سەردەمی ڕفاندن و دزینی ئۆتۆمبێل و سەر و ماڵی خەڵك یان ئەو سەردەمەی خەڵكی ئازا و چاونەترسی ئەو شارەتان شەهید دەكرد و گۆڕبزرتان دەكردن، دەتانەوێ هەولێر بگەڕێننەوە سەردەمی سەرانە وەرگرتن لە خەڵك و حوكمی قەرەقوشتان؟ یان مەبەستتانە وەك پارچەكانیتری نیشتیمانەكەمان بیكەنە كاڵا و بە دوژمنانی بفرۆشن؟”.
لە بەشێكی دیكەی بەیاننامەكەدا ئەو خەونەی شاڵاو بە نەزۆك ناو دەبات و نووسراوە” خەیاڵتان خاوە و دەبێ هەر بەو ئاواتەوە سەربنێنەوە و خەونە نەزۆكەكانیشتان وەك خەونی ئەوانەی پێش خۆتان دەبەنە گۆڕەوە، ئەوەی ئاغا و گەورەكانتان پێیان نەكراو پێیان وەرنەگیرا، بێگومان بن ئێوەی بچووك و ناكامڵیش پێتان ناكرێ و پێتان وەرناگیرێت، هەولێریش بە بەرچاوی شۆڕتانەوە ڕۆژ بە رۆژ لە سایەی جەنابی سەرۆك مەسعوود بارزانی و پارتی و حكوومەتی هەرێمی كوردستان هەر بەرەو بەرزی و بەرەو گەشەسەندن و سەركەوتن هەنگاودەنێت و ئێوەش بەو بچووكی و نابووتییەی پێیەوە ناسراون لە مێژوودا ناوتان تۆمار دەكرێ”.
