پۆلیسی دارستان و ژینگەی ئيداره‌ى سۆران : هەر كەسێك ڕاوە ماسی بكات ڕووبەڕووی پێ بژاردن و گرتن دەبێتەوە
مەهدی محەممەد – زاری كرمانجی :
پۆلیسی دارستان و ژینگەی ئيداره‌ى سۆران ڕاگەیاند لە ئەمڕۆوە بۆ ماوەی سێ مانگ و دە ڕۆژ ڕاوە ماسی قەدەخەكراوە و هەر كەسێكیش سەرپێچی لەو بڕیارە بكات ڕووبەڕووی پێ بژاردن و گرتن دەبێتەوە.
ئەمیر خۆشەوی گوتەبێژی پۆلیسی دارستان و ژینگەی ئیدارەی سۆران بە زاری كرمانجی ڕاگەیاند “ئەمڕۆ سێشەممە 5 / 3 تا 15 / 6 لە تەواوی ناوچەكانی هەرێمی كوردستان ڕاوە ماسی قەدەخە كرا و ئێمەش وەكوو پۆلیسی دارستان و ژینگەی ئیدارەی سۆران، تەواوی بنكە و بەشەكانمان ئاگادار كردووەتەوە بۆ ئەوەی ڕۆژانە مەفرەزە دەربكەن و چاودێری ڕووبارەكانی ناوچەكە بكەن،”
ئەمیر باس لەوەش دەكات هەر كەسێك لەو ماوەیەدا پابەندی بڕیارەكە نەبێت، ڕووبەڕووی یاسا دەكرێتەوە و دەڵێ “ئەو كەسانەی سەرپێچی لە بڕیارەكە دەكەن، ڕووبەڕووی پێ بژاردن و بەندكردن دەبنەوە.”
ساڵانە بەمەبەستی پاراستن و زیادبوونی سامانی ماسی، حكومەتی هەرێمی كوردستان، لە كاتی گەرادانانی ماسی لە تەواوی ناوچەكانی هەرێم ڕاوكردنی ماسی بە هەموو شێوەیەك قەدەخە دەكات.
