ئیسماعیل ئیبراهیم
كازم سەیاد، ئەندامی پێشووی ئەنجوومەنی نوێنەرانی عێراق لەسەر لیستی شیعەكان، لە دیمانەیەكیدا دەڵێت” بە پاڵپشتی و هەماهەنگی هاوپەیمانە كوردەكانمان ماددەی 140 و قەوارەی هەرێم هەڵدەوەشێنینەوە”.
ئەمە نییەت و مەبەستی راستەقینەی عەرەبەكانە بە شیعە و سوونەوە، هەرگیزیش چاوەڕێی شتی باشتر لە دووژمنان ناكرێت، ئەوەشی لە دەستیان بێت بۆ لاواز كردن و نەهێشتنی قەوارەی هەرێمی كوردستان دەكەین.
باش دەزانم ئەو خەونەیان ناهێتە دی، بەڵام ئەوەی مرۆڤ نیگەران دەكات، هاوپەیمانە كوردەكانی عێراقە بۆ ئەنجامدانی پیلانی ژەهراوییان.
ئەو كوردانەی لە پێناو بەرژەوەندی تەسكی حزبی ئامادەن نیشتمان رادەستی داگیركەران بكەن، گووتیان نەوت و داهات رادەست بكەن ژیانی هاووڵاتییان خۆش دەبێ و حكومەتی عێراق كێشەمان بۆ دروست ناكات.
ئەوانەی شەقامیان وا تێگەیاند مووچە بخرێتە سەر حكومەتی عێراقی ژیانی كارمەندان خۆش دەبێ و هەموو رۆژ وەك شاندی سیاسی دەچوونە بەغدا و لەگەڵ لایەنە دژە كوردەكان كۆدەبوونەوە و داوایان دەكرد، بوددجە و مووچەی هەرێم ببڕدرێت و ئابڵۆقە بخرێتەسەر هەرێم.
ئەو لایەنانەی دەنگیان بە یاسای پڕ چەككردن و پارەداركردنی حەشدی شەعبی دا.
ئەوانەی ئێستاش بە هەموو شێوەیەك لە هەرێم و بەغدا بەهۆی رق و كینەی سیاسی دژایەتی هەرێم دەكەن.
تێگەیاندن و ئاراستە كردنی شەقام بۆ دژایەتی كردنی كیانی هەرێمی كوردستان كە بە خوێنی سەدان هەزار ڕۆڵەی ئەم نیشتمانە هاتۆتە دی دەبێ چ سوودێكی بۆ كوردی 70 ملیۆنی هەبێت.
لە خشتە بردنی هاووڵاتی ئاسایی و ئاراستەكردنی بەرەو هەڵدێر، هەر چەندە مایەی نیگەرانیش بێت، بەڵام زۆر جێگەی هەڵوەستە لەسەر كردن نییە، بەڵام كاتێ دەبینی توێژێكی گرنگی كۆمەڵگە زۆر بە ئاسانی دەكەونە ژێر كاریگەری لایەنێكی سیاسی و بەكار دەهێندرێن، بە بیانووی داوای مافكردن دەبنە ئامرازێك بۆ بەكوێلە بوون و زەلیل بوون، داوای ژێر دەستەیی و چەوسانەوەی نەتەوەیەك دەكەن، لە پاڵ ئەوانەوە لایەنی سیاسی و دوژمنانی نەتەوەكەیان گوشار دروست دەكەن بۆ ئەوەی نەوەی ئێستا و داهاتوو بخرێنە ژێر چەپۆكی داگیركەران، دەبێ گومانەكانمان چەند هێندە لێ بكەین.
تەنها بۆ بڕە مووچەیەك هاواری ئەوەیان لێ هەڵساندوون گوایە شكۆیان شكاوە، راستە مووچە و باری گوزەرانی هاووڵاتییان كاریگەری لەسەر ژیانیان دەبێت، بەڵام ئەمە هەموو بابەتەكە نییە دیوێكی بابەتەكەیە، كە هەمووجار لەلایەن داگیركەرانەوە بۆ گووشار خستنەسەر لایەنێكی دیاری كراوە بەكار دەهێندرێت، شكۆ بە پارە ناكردڕێت و ناشكێندرێت، شكۆ كاتێ دەشكێندرێت كە عەرەبێك بێتە سەرماڵ و شوێنی كار و بە شاپ و شەق ئەم سەر و ئەو سەرت پێ بكەن و نەوێری فزەیەك بكەی.
شكۆ ئەو كات دەشكێندرێت، كە بێ ئەوەی رەهەندەكانی پشت رووداوەكان بخوێنییەوە و لێكدانەوەیان بۆ بكەی بەدوای دووسێ كەسی كاڵفام و بەكرێ گیراو بكەوی و هۆتافی دژە حكومەت و هەرێم و نەتەوەی خۆت بڵێتەوە.
