ئەمڕۆ 45 ساڵ بەسەر كۆچی دوایی بارزانیی نەمردا تێدەپەڕێت

زاری كرمانجی-بارزان:
ئەمڕۆ 45 ساڵ بەسەر كۆچی دوایی بارزانیی نەمر، ڕابەری بزاڤی ڕزگاریخوازی كورددا تێدەپەڕێت. هەڤاڵ و پێشمەرگەكانی شۆڕشی ئەیلوول، دەڵێن، بارزانیی نەمر بندەستی رەتكردۆتەوە و تا دواساتەكانی تەمەنی بیر و فكری هەر لای نەتەوەكەی بووە و خەون و ئامانجی هەرە گەورەی ئەوە بووە كە خزمەتی میللەتی خۆی بكات، بتوانێت ئەو زولمەی لەسەر میللەتی كورد هەیە نەهێلێت و مافی كورد بە دەست بهێنێت.
مستەفا بارزانی، كوڕی شێخ محەممەد بارزانییە لە گوندی بارزان لە 14ـی ئاداری ساڵی 1903 لە دایكبووە و لە یەكی ئاداری ساڵی 1979 لە نەخۆشخانەی جۆرج تاون لە واشنتۆنی پایتەختی ئەمریكا كۆچی دوای كرد، لە چواری ئادار تەرمی پیرۆزی بارزانی نەمر گەیشتەوە تارانی پایتەختی ئێران و دواتر بە هەلیكۆپتەر، تەرمی پیرۆزی گەیاندرایەوە شاری شنۆی كوردستان و لەوێ لەلایەن سەدان هەزار كەس لە پەنابەرانی هەرێمی كوردستان و هاووڵاتییانی رۆژهەڵات و كوردەكانی باكوور و رۆژئاوا پێشوازی لە تەرمی پیرۆزی بارزانی كرا، كە لەو رۆژەدا لە سنورەكان پەڕیبوونەوە، تا لە ماڵئاواییكردنی بارزانیی نەمردا بەشداربن، لە رۆژی پێنجی ئادار تەرمی بارزانی لە گۆڕستانی شنۆ لەسەر وەسیەتی خۆی لە پاڵ گۆڕی شێخ بابۆ بە خاك سپێردرا، لە پاش ڕاپەڕین و لە شەشی تشرینی یەكەمی ساڵی 1992 تەرمی بارزانیی نەمر و شەهیدی هەمیشە زیندوو ئیدریس بارزانی لە گۆڕستانی شنۆ هێنرانەوە بۆ كوردستان و لە خاكی پیرۆزی بارزان و لە زێدی خۆیان بە خاك سپێردران.
سلێمان شاكر، پێشمەرگەی شۆڕشی ئەیلوول، بۆ زاری كرمانجی دەڵێ:” بارزانیی نەمر، هەمیشە پیاوێكی سادە بووە و هەر بەو شێوەیەش ژیاوە، زۆر گرنگی بە جلوبەرگ و خواردنی نەدەدا، بەردەوام هەوڵی داوە كە كورد یەكدەنگ و یەكڕەنگ بێت و هەمیشە ڕێزی لە بیروبۆچوونی جیاواز گرتووە، هەموو كاتێك ویستوویەتی كورد سەربەخۆ بێت و بە مافەكانی بگات، بڕوای وابوو ڕۆژێك هەر دێت كورد بەو ئاواتە دەگات.
واحید نوری، پێشمەرگەیەكی دیكەی شۆڕشی ئەیلوولە، ڕایگەیاند: بارزانیی نەمر، نەك تەنیا لە كوردستانی باشوور، بەڵكو لە هەر چوار پارچەی كوردستان، بۆ ماوەی زیاتر لە نیو سەدە سەركردایەتی میللەتی كوردی كردووە، ئاگای لە هەموو پارچەكان بووە، چووە بۆ ڕووسیا هەموو دەناسن و دەزانن چۆن كاری كردووە، وەك سەركردەیەكی كورد حیسابی بۆ دەكرا نەك سەرۆكی حیزب، بارزانی زیاتر بە سەركردەی كورد دەناسرا، وەك بەسەركردەی حیزب، بڕوای وابوو كورد هەموو یەكە جیاوازی لە نێوان هیچ كەس و لایەنێكی نەدەكرد.
عەیز ئەحمەد، هەڤاڵی بارزانی نەمر و پێشمەرگەی كۆماری كوردستان لە مەهاباد، ئاشكرای كرد:” بارزانیی نەمر بندەستی ڕەتكردەوە و لە چیاكانی بارزان، شۆڕشی بارزانی بەرپا كرد، توانی هەموو ئەو بەربەستانە ببڕێت و شۆڕش لە دوای شۆڕش بەرپا بكات و داوای مافی گەلی كورد بكات، بۆیە هەموو تەمەنی لە پێناو خەباتی نەتەوەیی و رزگاریی گەلی كوردستاندا بەخشی و، تا دواساتەكانی تەمەنیشی بیر و فكری هەر لای نەتەوەكەی بووە، بەهۆی لێزانی و زیرەكایەتی و ملكەچنەكردنی بۆ دوژمنانی گەلی كورد، دوو جار لە هەوڵی تیرۆركردن رزگاری بووە، ئەوەی پێی كراوە بۆ نەتەوەكەی و پێی باش بووە كردوویەتی و خەون و ئامانجی هەرە گەورەی ئەوە بوو كە خزمەتی میللەتی خۆی بكات، بتوانێت ئەو زولمەی لەسەر میللەتی كورد هەیە نەهێلێت و مافی كورد بە دەست بهێنێت.