ڕائیب زراری
بارزانی نە كۆچی بووە مەرگ و نە لە دایكبوونیشی بۆ تەمەنێكی دیاریكراو بوو، بارزانی هەبوویەكی جاویدانی و مێژوویەكی بێ كۆتاییە، تا وادەی بەجەستە كۆچكردنی، سەركردە و رابەرێك بوو، وەلێ ئێستا رێبازێكە، بیروباوەڕ و ئەدگار و ئامانجی ئەو، چیای ئازادی و خۆری سەرخۆبوونە، دادگای ئەرك و مافە، تەرازووی دابەشكردنی ژیانە بە یەكسانی.
سبەی 45 ساڵ بەسەر كۆچی دوایی بارزانیی نەمر تێدەپەڕێت، لە دوای زیاتر لە نیو سەدە خەبات و بەرخودان لە پێناوی ئازادی كوردستان، بەردەوام هەوڵ و ماندووبوونی بۆ بەدیهێنانی ئەو ئامانجانەی كە میللەتی كورد وەك هەر میللەتێكی تر پێویستی پێ بووە دەدا.
ساڵانە بۆ رێزگرتن لە خەبات و بەرخودانی سەركردە و باوكی رۆحی نەتەوەی كورد و دووپاتكردنەوەی پەیمان و سۆز لەگەڵ رێبازی بارزانیی نەمر، بە هەزاران كەس لە هاووڵاتییانی كوردستان و پارچەكانی دیكە سەردانی مەزاری نەمران دەكەن.
رۆڵ و كاریگەریی بیر و خەباتی بارزانیی نەمر، لە كوردستان و لە نێو هاوكێشەو لەسەر شانۆی سیاسی ناوچەكە و جیهان هێزێكی كاریگەرە، چۆن هەوڵی ناساندن و پاراستنی دۆز و مافی گەلەكەی داوە و تەحەدای هەموو فشار و پەلامار و ململانێیەكانی زلهێزان و وڵاتانی دژ بە كورد و پیلانگێڕ لە پێناو بەرژەوەندییە تەماعكارییەكانیانی كردووە، ئەم واقیعە لە سەدەی رابردوودا هەر چەندە كاریگەری خراپ و رێگریی زۆری لەبەردەم پێشكەوتنی دۆزی كوردستاندا هەبوو بێ، بەڵام هاوكات بە لێزانی و خەباتی بەهێزی بارزانیی نەمر نەهێڵدرا داگیركەران و دوژمن و نەیاران بە گشت پیلان و مەرامە ناڕەواكانیان لەسەر حیسابی كورد و دۆزەكەی بگەن و هەر ئەم تێكۆشان و خۆڕاگری و بەرپەرچدانەوەیەی ئەم رابەرە لەگەڵ ئەو هەلومەرجە بەردەوامەدا لە سەدەی بیستەم، وا یكرد ئەم گەلە دەیان هەوراز و نشێو ببڕێ و كۆڵنەدەرانە بە خەبات و قوربانیدانی خۆی بگاتە راپەڕین و دەسكەوتەكانی نێو قەوارەی ئەمڕۆی كە لە هەرێمی كوردستان دا بەرقەرارە.
ئەم رابەرە مەزنە دوای خۆی نەك تەنیا ئەزموونێكی پاك و بەهێزی سەركردایەتییكردن و كەلتوورێكی تەندروستی بۆ خزمەتكردنی گەل و خاكی كوردستان جێهێشتووە، بەڵكو بارزانیی نەمر، توانیویەتی ببێتە ئاوێنەی بوون و مانەوەی گەل و نیشتمانەكەی و ئەو سیمبولە مەزنەی كە مێژوو بە شوناس و ڕۆشنكەرەوەی ئاسۆی سەرفرازی نەتەوەیەك گوزارشتی لێ بكات، نەك هەر لە قۆناغەكانی رزگاریی نەتەوەیی، بەڵكو دوای سەربەخۆیی، گەلەكەشی هێشتا بیروباوەڕ و خواست و ئامانجی ئەو وەك قوتابخانەیەك بۆ پەروەردەی فیكری و هەڵوێست و ئاراستەی دروستی ئەركەكان نەخش و ڕێنماییەكی كارا دەگێڕێ و بۆ هەمیشە نەوەكانی گەلەكەی، وەكو مەرجەعێك، بە پەیڕەوكردن و گەڕانەوە بۆ بیر و باوەڕ و رێبازی تێكۆشان و ئاكارەكانی ئەو، چالاكترین وانە و گوڕوتین فەراهەم دەكەن و لێرەوە دەتوانن بە شاڕێگەی كاروانی تەندروستی ژیان و پارێزراوی قەوارەی سیاسی و نیشتمانی و پەرەسەندنی بەردەوامی كۆمەڵگەدا هەنگاوی تۆكمە بهاوێژن، هەروەك مارتن ڤان برۆنسن دەڵێ: نەوەكانی داهاتووش دەبێ بارزانی بكەن بە ئاوێنەیەك بۆ دروستكردنی دواڕۆژ.
بارزانی ژیانی نەتەوەیەكی ژیاندەوە، مانای بە بوون و مانەوەی بەخشی، كاروانی سەركەوتنی بۆ خستەڕێ و ئاسۆی چارەنووسی نیشاندا، بۆیە بارزانیی نەمردووە و نامرێ، بارزانی نە كۆچی بووە مەرگ و نە لە دایكبوونیشی بۆ تەمەنێكی دیاریكراو بوو، بارزانی هەبوویەكی جاویدانی و مێژوویەكی بێ كۆتاییە، تا وادەی بەجەستە كۆچكردنی، سەركردە و رابەرێك بوو، وەلێ ئێستا رێبازێكە، بیروباوەڕ و ئەدگار و ئامانجی ئەو، چیای ئازادی و خۆری سەرخۆبوونە، دادگای ئەرك و مافە، تەرازووی دابەشكردنی ژیانە بە یەكسانی.. چۆن دوێنێ، ناوی ئەو، خەباتی ئەو، رابەرایەتی ئەو، بوون و بەرخودان و خواستی نەتەوەكەمانی تیا كۆببووەوە، ئەمڕۆش هەر لە ناو و مێژووی خەباتی ئەو گەورە رابەرەدا گەلەكەمان پێناسەی خۆی دەبینێ و بە شاڕێگەی راستدا درێژە بە كاروانی روو لە سەركەوتنی دەدات.
بارزانی نەمر، رەمزی یەكبوونی گەلی كوردستان بوو، تەنانەت پاش كۆچباربوونیشی بۆتە هێمایەك بۆ خەباتی نەتەوایەتی كورد لە هەموو جیهاندا و بۆتە پاڵپشت بۆ خەباتی نیشتمانی گەلی كوردستان، بارزانی بە نەمری لەناو میللەتەكەیدا و، بە مەزنی لەناو مێژووی جیهاندا مایەوە، ئەوەش بەهۆی كۆمەڵێك بنەمای پتەو پرەنسیپی راست و دروست و هەڵوێستە مرۆڤ دۆستییە مەزنەكانییەوە، كە لە چوارچێوەی رێبازەكەیدا بۆ كوردستان و مێژووی ئازادیخوازان و نەوەكانی دوارۆژی بەجێ هێشتووە، بارزانیی نەمر و پێشمەرگەكانی مەزنترین پاڵپشت بوون بۆ كۆماری كوردستان لە مەهاباد، بارزانیی نەمر هێمای گەلێكی بەش خووراو زوڵملێكرا بوو كە جیهان لە رێگەی ناوی ئەو كوردی ناسی، لە دوای خۆشی رێبازێكی جێهێشتووە كە ئەمڕۆ گەلی كوردستان توانیویەتی لەبەر رۆشناییەكەیدا لە ناوگێژاوی ئاڵۆزییەكانی جیهاندا سیاسەتێكی هاوسەنگ و هێۆر بگرێتەبەر و لەناو هاوكێشە نێودەوڵەتییەكانی ئەم سەردەمە و باری سیاسی پشێوی عێراقدا، پێگەی خۆی بپارێزێت.
