زارى کرمانجى-سۆران:
بۆ کەمکردنەوەی نرخی گۆشتی سوور، حکومەتی عێراق گومرگی سەر هاوردەرکردنی مانگا و مەڕوماڵات 50٪ کەم دەکاتەوە.
ئەنجوومەنی وەزاریی ئابووریی عێراق بەهۆی بەرزبوونەوەی نرخی گۆشتی سوور لە بازاڕەکان و هەوڵدان بۆ کەمکردنەوەی نرخەکەی، رەزامەندی لەسەر داوایەکی وەزارەتی کشتوکاڵ دا.
بە گوێرەی بڕیارەکە، بۆ ماوەی ساڵێک 50٪ی گومرگ لەسەر هاوردەکردنی ئاژەڵی زیندوو بۆ سەربڕین و بەخێوکردنی مانگا و مەڕومەڵات، کەمدەکرێتەوە.
ئەنجوومەنی وەزاریی ئابووریی عێراق، داواکارییەکەی وەزارەتی کشتوکاڵ بۆ ئەنجوومەنی وەزیران بەرزدەکاتەوە تاوەکو بڕیاری لەبارەوە بدات.
زیاتر لە مانگێکە گۆشتی سوور لە عێراق و هەرێمی کوردستان بە شێوەیەکی بەرچاو بەرزبووەتەوە، لە عێراق نرخی کلیۆیەک گۆشتی مەڕ گەیشتووەتە 23 هەزار دینار، ئێستا لە هەولێر نرخی کلیۆک گۆشتی بەرخ بە 22 هەزار دینارە، کلیۆیەک گۆشتی مانگاش بە 18 هەزار دینارە.
