ئەنجوومەنی وەزیرانی هەرێمی كوردستان، چەند بڕیارێكی بۆ وەزارەتەكان دەركردووە، كە مێژووەكەی بۆ 12-2-2024 دەگەرێتەوە و لە ناوەڕۆكدا باس لە رەچاو كردنی بارودۆخی دارایی حكومەت كراوە بۆ بابەتەكانی دامەزراندن و پلە بەرز كردنەوە و بابەتی دیكەی پەیوەندار.
ماڵپەڕی باسنیوز بڵاوی كردەوە كە كۆپییەك لەو نووسراوەی دەست كەوتووە، لە نووسراوەكە هاتووە” بە رەچاوكردنی بارودۆخی دارایی هەرێم و رێكخستنی میلاكات و خەرجییەكان و كەمكردنەوەی خەرجییەكان، پێویستە هەموو لایەك پابەندی ئەوە بن، ئەو جۆرە نووسراوانەی ناوەڕۆكەكەی ئەم باباتانەی خوارەوە لەخۆ دەگرێت، ئاراستەی سەرۆكایەتیی ئەنجوومەن نەكرێت”.
ئاماژە بەوە كراوە” نووسراوی دامەزراندنیان بۆ نەنێردرێت، تا ئەوكاتەی لە چوارچێوەی یاسای بودجەی ساڵانەدا لەلایەن ئەنجوومەنی راژە رێك دەخرێت.
ئەوەش خراوەتە ڕوو: “نابێت داواكاریی گەڕاندنەوەی فەرمانبەران بۆ راژەی سەربازی و شارستانی بۆیان بنێردرێت، تەنیا ئەو فەرمانبەرانە نەبێت، كە بەهۆی حوكمی دادگا، یان دۆسیەیەكی دادوەرییەوە لە راژە دادەبڕێن.”
ئەنجوومەنی وەزیران جەختیشی كردووەتەوە “گواستنەوەی راژە و تەنسیبكردنی فەرمانبەران لەدەرەوەی هەرێم بۆ دامودەزگاكانی هەرێم و گواستنەوەی راژە بۆ سەر میلاكی وەزارەتی خوێندنی باڵا و پەروەردە بۆمان نەنێردرێت و گواستنەوەی فەرمانبەران لە یاسای خزمەتی سەربازی بۆ سەر یاسای خزمەتی شارستانی و بەپێچەوانەشەوە راگیراوە.”
باسی لەوەش كراوە” هیچ نووسراوێكی درێژكردنەوەی ماوەی خزمەتی ئەو فەرمانبەرانەیان بۆ نەنێردرێت، كە تەمەنی یاساییان تەواو كردووە، جگە لەو حاڵەتانەی پێویستن، ئەویش ماوەی ساڵێك یان بۆ سێ ساڵ، بۆ شایستەبوونی مووچەی خانەنشینی”.
هەروەها لە نووسراوەكە باسی ئەوەش كراوە” نووسراوی هاوكارییان بۆ نەكرێ. تەنیا هاوكاریی چاندنی جگەر رێگەی پێدراوە و هاوكارییەكە دەكرێت.
لە نووسراوەكەدا، چەند خاڵێكی دیكەش هاتوون، كە وەرناگیرێن و كاریان لەسەر ناكرێت، لەوانە “تەرخانكردن و نوێكردنەوەی رەزامەندی و گواستنەوەی زەویی نیشتەجێكردن، نووسراوەكانی تایبەت بە قەرەبووكردنەوە، كە وەزارەت و دامودەزگاكانی هەرێم لێی بەرپرسیار نین، كڕینی ئۆتۆمبێل بۆ بەكارهێنانی تایبەتی و بەرزكردنەوەی پلەی فەرمانبەران بەدەر لە رێنوێنییەكان و ئەو نووسراوانەی لە لایەن بەڕێوەبەرایەتییە گشتییەكان بۆ ئەنجوومەنی وەزیران دەنێرێن، وەرناگیرێن.”
ئاماژە بەوەش كراوە، رادەستكردنەوەی ئۆتۆمبێل ناكرێت، تاوەكوو سزای سەرپێچییەكان پاكتاو نەكرێت.
ئەنجوومەنی وەزیران جەختی كردووەتەوە، هەر بابەتێك، كە لەو بڕیارانەدا هەبێت، ئەوە لە لایەن كارگێڕیی ئەنجوومەنی وەزیران وەرناگیرێ و كاری لەسەر ناكرێت و نووسراوەكان لە وەرگرتەی ئەنجوومەنی وەزیران وەرناگیرێن و دەگەڕێندرێنەوە.
