وەیسی سەعید وەیسی
بەیەكەوەژیان و فرەیی ئایینی و نەتەوەیی، یەكێكە لە شانازییە پڕبەهاكانی گەلی كوردستان، نیشانەیەكی روونە بۆ رۆحی مرۆڤ دۆستانە و ئاشتیخوازانەی كوردستانیان، كە زۆر جار هەوڵی لەناوبردنی دراوە بەڵام نەتواندراوە تێك بدرێت، لە رێگای یاساوە بە سیستەمی كۆتا كە سیستەمێكی جیهانییە و بۆ ئەو نەتەوانەیە كە بە ژمارە كەمن و ناتوانن وەك نەتەوە گەورەكان بگەنە ناو دامودەزگا فەرمییەكانی دەوڵەت، وەك حكومەت و پەرلەمان و دادوەری، ئەو سیستەمە لە هەموو دونیادا پەیڕەو كراوە.
مافی پێكهاتەكان لە پەرلەمانی كوردستان مسۆگەر كرابوو، ئەمەش رووڵێكی گرنگی هەبوو لەبەرجەستەكردنی بیرۆكەی بەیەكەوەژیانی ئاشتییانە لەو یاسا و بڕیارانەی لە هەرێمی كوردستان دەردەكران، بۆیەش كوردستان بوویتە مایەی شانازیی و جێگەی ستایشی كۆمەڵگەی نێودەوڵەتی، كە چی بەداخەوە ئەمەشیان پێ رەوا نەبینین، تا دادگای فیدراڵی لە رۆژی چوارشەممە 21ی شوباتی 2024 چەند بڕیارێكی دەركرد، جگە لەوەی بڕیارەكان پێچەوانەی دەستوور و مافەكانی هەرێمی كوردستانە، لە هەمانكاتدا كارێكی تەواو ناڕەوایە و هەوڵێكە بۆ دروستكردنی رق و كینە لەنێوان هاووڵاتییانی هەرێمی كوردستان.
گەلی كوردستان بە هەموو پێكهاتەكانییەوە بەیەكەوە قوربانییان داو و خەباتیان كردووە بۆ ئەوەی بە ئازادی بژین، ئەركی هەموولایەنەكانە چۆن شانازی بەو ژیانە هاوبەشە دەكەن كە بۆهەموو لایەك لە كوردستاندا هەیە، بەهەمان شێوەش لەپێناو داهاتوویەكی باشتر بۆ نەوەكانمان داكۆكی و پشتیوانی لە مافی پێكهاتەكان لە بەشداریی و هاوبەشییان لە دامەزراوە دەستوورییەكان بكەن، هەمیشە هەرێمی كوردستان نیشتمانی هەموو پێكهاتەكان بووە و مافی هەمووان پارێزراو بووە، ئەمەش بووەتە هۆی رەخسانی كەشێكی لەبار بۆ بوونی رەنگ و فرەیی ئایینی و نەتەوەیی، هەرچەندە دڵنیام ئەم بڕیارە هیچ كاریگەریەكی خراپ لەسەر پەیوەندییەكانی نێوان سەرجەم مەزهەب و ئایین و نەتەوە جیاوازەكان دروست ناكات.
كوردستانیان پارێزگاری لە بەها باڵاكانی بەیەكەوە ژیان و لێبوردەیی و یەكتر قبووڵكردن دەكەن، كوردستان هەر بە وڵاتی هەموومان دەمێنێتەوە، بەڵام بە بێ دوو دڵی زۆر بەڕوونی بڕیارەكانی دادگای فیدڕاڵی عێراق، پێی گووتین: كێ پەرۆش و خەمخۆری فەرهەنگی بەیەكەوەژیانە و پارێزەری مافی سەرجەم چین و توێژ پێكهاتەكانی كوردستانە، كار لە پێناو برەودانی دەكات، كێش دژی ماف و بەشداریی و هاوبەشیی پێكهاتەكانە لە دامەزراوە دەستوورییەكان.
