دوای بڕیارەكانی دادگای فیدرالی بۆ هەڵوەشاندنەوەی كورسی كۆتان لە پەرلەمانی كوردستان دەستەی سەربەخۆی مافی مرۆڤ لە هەرێمی كوردستان بەیاننامەیەكی بڵاو كردەوە و نیگەرانی خۆی لە بڕیارەكانی دادگاكە دەبڕی، ئەمە بەیاننامەیە ئەمڕۆ بوو.
لە بەیاننامەكەیاندا هاتووە” ڕۆژی 21ی شوباتی 2024 دادگای باڵای فیدراڵی عێراق لەسەر سكاڵایەك بڕیاری دا بەهەڵوەشانەوەی كورسی كۆتاكان لە پەرلەمانی كوردستان. ئێمە لەدەستەی سەربەخۆی مافی مرۆڤ نیگەرانین لەو بڕیارەی دادگای فیدراڵی بەرامبەر پێكهاتەكان لە هەرێمی كوردستان”.
لە بەیاننامەكەدا روونكراوەتەوە” پێكهاتەكان مافی بەشداریی سیاسی لە پەرلەمان و ئەنجوومەنە خۆجێیەكان و دام و دەزگاكانی تری دەوڵەت مافێكی چەسپێنراوە بەپێی دەستوری عێڕاقی و نمونەیەكی جوانە لە هەرێمی كوردستان لە هەڵبژاردنەكانی پەرلەمان لە ساڵی 1992وە تا خولی پێنجەم”.
دەستەی مافی مرۆڤ زیاتر نووسیویەتی ” بەداخەوە هەمیشە كەمینەكان وەك لاوازترین ئەڵقە سەیر دەكرێن كە لە هەموو هەنگاوێكی هەر گۆڕانكارییەكدا بەئاسانی دەستی بۆ دەبرێت. لەكاتێكدا دادگای فیدراڵی ئەوە دەزانێ كە هەمان ماف بۆ دیاریكردنی ڕێژەی كۆتا لە عێراق لەسەر ئاستی ئەنجوومەنی نوێنەران و ئەنجوومەنە خۆجێیەكان پەیڕەو دەكرێ، بەڵام ئەو مافە لەهەرێمی كوردستان رەت دەكرێ بەرامبەر كورسی كەمینەكان”.
ئەوەش نووسراوە” ئەگەر چی سەدان دانیشتنی گفتوگۆ لەبارەی داواكارییەكانی كەمینەكان، سەبارەت بە كورسی و پشكەكانی پەرلەمان ئەنجام درابوو، كە تێیدا داوا دەكرا دەنگدان بەو كورسیانە بۆ (مەسیحی و توركمان) ڕێك بخرێتەوە و بەئالییەت و شێوازی تایبەت كە زامنی مافەكانیان بكات، بەڵام لەبری ئەوەی دادپەروەری بەرامبەریان بكرێ لەو مافە بنەڕەتییە، ئەم دەستكەوتە دیموكراسییەش لەبارچوو و مافی جیاكاری ئەرێنی بەرامبەریان هەڵوەشایەوە”. دەستی مافی مرۆڤ زیاتر روونكردنەوە دەدات و دەنوسێت” لەكاتێكدا دادگای فیدراڵی دەسەڵاتی ئەوەی نەبوو كە هەمواری یاسا بكات، چونكە دادگا پێشتر خۆی باسی كردوە بە بڕیاری ژمارە (53/ ئیتحادی/2023) و (26/ئیتحادی/2020) كە بەروونی ئاماژەی بەوە كردوە كە لەپسپۆڕی ئەو دادگایە نیە هەمواری ماددە و بڕگەكانی یاسا بكات. هەروەها دەستووری عێراق بەڕوونی جەخت لەسەر پێویستی ڕەچاوكردنی نوێنەرایەتیكردنی پێكهاتەكانی عێراق لە پەرلەمان دەكاتەوە، بەڵام دادگای فیدراڵی ئەو پشكەی هەڵوەشاندەوە”.
دەستەی مافی مرۆڤ ئەم كارە بە نەرێنی دەزانێت بۆ پێكهاتە و كەمینەكان و لە كۆتایی بەیاننامەكە دەنووسێت ” ئەو بڕیارەی دادگای وێڕای ئەوەی كاریگەری نەرێنی دەبێ بۆ پێكهاتەو كەمینەكان كە بەشێكی گرنگ و ڕەسەنی ئەو وڵاتەن كە بەپێچەوانەی ئەو بڕیارە چاوەڕێی بڕیارو ڕاسپاردەی باشتریان دەكرد بۆ دەستەبەركردنی مافەكانیان و ڕێكخستنی نوێنەرایەتی ڕاستەقینەیان لەپشك و كورسیی پەرلەمان، بەڵام دادگای فیدراڵی بەتەواوی كۆتایی بە كورسیی كۆتاكان هێنا.”
