جێگری سەرۆكی پەرلەمانی عێراق ئاشكرای دەكات” كورد پێكەوە لەگەڵ ئەوەن كوردێك بكرێتە پارێزگاری كەركووك”.
شاخەوان عەبدولڵا، جێگری سەرۆكی پەرلەمانی عێراق، لە لێدوانێكدا ڕایگەیاند” لەم هەفتەیە كۆبوونەوەیەك لەسەر پۆستی پارێزگاری كەركووك دەكرێت بۆ ئەوەی لایەنەكان رێبكەون و پۆستی پارێزگاری كەركووك یەكلایی بكرێتەوە، كوردەكان بە تایبەت یەكێتی و پارتی كۆكن لەسەر ئەوەی پارێزگاری كەركوك كورد بێت”.
زیاتر روونیكردەوە ” پۆستەكان لە كەركووك بە” ئیستهقاقی قەومی” دەتوانرێت یەكلایی بكرێتەوە نەك حزبی، وەك دیارە لێرە كورد زۆرینەی كورسییەكانی ئەنجوومەنی بەدەستهێناوە، دەمانەوێت پارێزگار كورد بێت، بەڵام بۆ ئەوە پێویست دەكات لایەنە عەرەبی و توركمانیش رازی بكەین، بۆ ئەوەی پێكەوە پۆستەكان دابەش بكەین”.
لە ڕاگەیاندنی ئەنجامی هەڵبژاردنەكانی ئەنجوومەنی پارێزگاكانی عێراق ، كە لە 18ی كانوونی یەكەمی 2023 پرۆسەی دەنگدانی تایبەت و گشتی كۆتاییهات ، كورد لە پارێزگای كەركوك توانی 7 كورسی بەدەستبهێنێت، بەڵام نەیتوانی ببێتە زۆرینەی ڕەها بۆ پێكهێنانی حكومەت.
