ئەڤین بارزانی
سەرۆک و رێبەرێن هەر نەتەوەکێ د دیرۆکێ دا ب کار و کریارێن خوە و ب هەلوەستێن خوە بووینە دیرۆک و نەمر، ئەڤرۆکە هەمی نەتەوە رێزێ ل سەرکردێن خوە یێن بەری چەند ساڵان دگرن کو بووینە سیمبول، ئەڤرۆکە ژی هەرچەندە گەلەک ژ وان سەرکردان نەماینە لێ رێبازا وان بۆ نەتەوێن وان هەردەم زندینە، هەکە ئەم ل گۆر ڤێ راستیێ بەرێ خوە بدەینێ بوو مە دیار دبیت کا گرنگیا هەبوونا سەرۆک مەسعود بارزانی بۆ نەتەوەیا کورد چەند گرنگە ئەم چاوا نها مفایێ ژ هەبوونا سەرۆک بارزانی و ئەزموونا وی وەربگرین.
سەرۆک مەسعود بارزانی تنێ سەرکردێ کوردە نها دشێت د ڤێ قوناغا هەستیار دا وەک سەرۆک و رێبەرێ نەتەوا کورد گەلەک کارێن مەزن ئەنجام بدەت، مخابن ناکۆکیێن نها د ناڤبەرا هێز و ئالیێن سیاسی ل هەرێما کوردستانێ دا بووینە ئەگەرێ ڤێ یەکێ پێگەهێ هەرێما کوردستانێ گەلەک لاواز بوویە، دوژمن و نەیارێن گەلێ مە ژی یێ چاڤەرێ نە دا کورد پتر لاواز ببن، هەرێما کوردستانێ د ڤێ قۆناغێ هەستیار دا پێویستیا خوە ب سەرکردەکێ هەیە کو بشێت هەموو هێز و ئالیێن سیاسی ل دۆر مێزەکێ کۆم بکەت، سەرۆک بارزانی هەردەم ب گۆتار و هەلوەستێن خوە یێن نەتەوەیی بوویە جهێ گرنگیا هەموو هێز و ئالیێن سیاسی ل هەرێما کوردستانێ و ئاشکرایە ئەڤرۆکە ژی هەموو هێز و ئالیێن سیاسی رێزێ ل کار و خەبات و رۆلێ سەرۆک بارزانی دگرن.
ئەرێ هەکە ئەم ڤێ پرسیارێ ژ خوە بکەن، کێ دشێت د ڤێ قۆناغێ دا هەموو هێز و ئالیێن سیاسی یێن کوردستانێ ل دۆر مێزەکێ کۆم بکەت، مە ژبیر نەکریە کا چاوا سەرۆک بارزانی شیا سەرکردایەتیا مەزنترین روودانا دیرۆکی د دیرۆکێ کوردستانێ دا بکەت کو ئە ژی ریفراندۆم بوو، هەر دیسان سەرۆک بارزانی شیا پێشمەرگەی ژ تورکیا دەربازی کۆبانێ بکەت و وەسا کۆبانێ ژ دەستێ داعشێ هاتە رزگار کرن، هەر روودانەک ل پارچەکێ دی یێ کوردستانێ روو بدەت دیسان سەرۆک بارزانی ب هەلوەستێ خوە یێ نەتەوەیی دلێ کوردان خوەش کریە و پشتەڤانیا کوردان ل هەموو جیهانێ کریە، ئەرێ ما دەم نەهاتیە هەموو هێزێن سیاسی بۆ جارەکێ ژی بیت رێزێ ل سەرۆک بارزانی و خەباتا وی بگرن و گۆهداریا وی بکەن دا کورد ئێکەتیا نەتەوەیی دروست بکەن.
دڤێت ئەم ژبیر نەکەین هەکە نها هزرەک بۆ هەرێما کوردستانێ دهێتە کرن، هەکە دوژمن و نەیارێن مە نەوێرن دەست ب کارێن مەترسیدار ل دژی کوردان بکەن ژ بەر هەبوون و ئیرادا پۆلایی یا سەرۆک بارزانی یە، سەرۆک بارزانی سەرۆکێ ئەفسانەوی یێ گەلێ کوردە و کەسەکە د ژیانا خوە دا هەردەم ب هەلوەستێن نەتەوەیی بوویە جهێ شانازیێ بۆ هەموو کوردەکێ ل هەر چار پارچێن کوردستانێ.
ئەز دبێژم دڤێت هەموو پارتێن سیاسی ل هەرێما کوردستانێ، رەوشەنبیر، زانا، کەسێن ئەکادیمی پێکڤە داخواز ژ سەرۆک بارزانی بکەن ب ئەزموون و هزرێن خوە وەکو بەردەوامیا وێ رێبازا پیرۆز یا بارزانیێ نەمر ئێکەتیا کوردان دروست بکەت، چونکی ئاشکرایە بێی سەرۆک بارزانی کەسەک دی نەشێت کارەکێ وەسا بکەت، ئانکۆ هەکە ئەم بێژین د رەوشا نها دا کورد پتر ژ هەر دەمەکێ پێدڤی سەرۆک بارزانی نە دێ گۆتنەک د جهێ خوە دا بیت، ڤێجا ئەم رێزێ ل خەبات و رۆلێ سەرۆک بارزانی بگرین و گوهداریا شیرەتێن جەنابێ وی بکەین و وەکو رێبەرێ بزاڤا ئازادیخوازا گەلێ کوردستانێ ل پشت جەنابێ وی راوەستین دا هەرێما مە یا پاراستی بیت و کورد ژی وەکو نەتەوە بگەهنە مافێن خوە.
