زاری كرمانجی – سۆران :
پارتی ئازادی كوردستان راگەیاندراوێكی بڵاوكردەوە و داوا لە كوردانی رۆژهەڵاتی كوردستان دەكات بەشداری لە هەڵبژاردنی مەجلیسی شۆرای ئیسلامی نەكەن، لە راگەیاندراوەكەدا كە تایبەت نێردراوە بۆ زاری كرمانجی PAK رایدەگەیەنێت ئەزموونی ١٠٠ ساڵەی دەوڵەتی فارس و 45 ساڵی سیستەمی كۆماری ئیسلامیی، سەلمێنەری ئەو ڕاستییەن كە هەڵبژاردنەكانی ناو ئەم دەوڵەتە هێندێك شانۆگەریی و عۆینبازیی سیاسیین كە نە فڕیان بەسەر پڕەنسیپی هەڵبژاردنەوەیە، نە هیچ پێوەندییەكیان بە ڕێزدانان و بەهێندگرتنی ویست و دەنگی خەڵكەوە هەیە .
ئەمەی خوارەوە دەقی بانگەوازەكەی پارتی ئازادیی كوردستانە.
بانگەوازی پارتی ئازادیی كوردستان PAK
بۆ تەحریمی چالاكانەی هەڵبژاردنەكانی 11ی ڕەشەمەی دەوڵەتی داگیركەر
ڕۆڵەكانی نەتەوەی كورد لە ڕۆژهەڵاتی كوردستانی داگیركراو !
تاران جارێكی دیكە هەموو تواناكانی خۆی خستووەتە گەڕ بۆ ئەوەی رۆژی یازدەی ڕەشەمە، شانۆگەرییەكانی هەڵبژاردنی مەجلیسی شۆرای ئیسلامی و مەجلیسی خۆبرەگان بەڕێوە بەرێت.
ئەزموونی ١٠٠ ساڵەی دەوڵەتی فارس و 45 ساڵی سیستەمی كۆماری ئیسلامیی، سەلمێنەری ئەو ڕاستییەن كە هەڵبژاردنەكانی ناو ئەم دەوڵەتە هێندێك شانۆگەریی و عۆینبازیی سیاسیین كە نە فڕیان بەسەر پڕەنسیپی هەڵبژاردنەوەیە، نە هیچ پێوەندییەكیان بە ڕێزدانان و بەهێندگرتنی ویست و دەنگی خەڵكەوە هەیە. بەڵكوو چ لە شێواز و چ لە ناوەڕۆكدا گاڵتەجاڕییەكی پڕ فرت و فێڵ و كۆت و بەند كراوی بەڕێوبەرانی دەوڵەت و سیستەمی سیاسییە كە دواتر بە جێگۆڕكێ و هەڵكشان و داكشانی نێوان ژمارەیەك لە دەست و پێوەندە سوێند خواردووەكانی«عولیاحەزرەت» و«حەزرەتی ئیمام» و«موقامی موعەزەم»، بۆ بەڕێوەبردنی دەوڵەتێكی كۆلۆنیالی و سیستەمێكی دیكتاتۆر و تۆتالیتێر، كۆتاییان هاتووە.
ئەوەندەی بۆ كوردستان دەگەڕێتەوە، بابەتەكە ئامانج و تایبەتمەندیی جیاوازی تێدایە. كاربەدەستانی دەوڵەتی داگیركەری فارس تێدەكۆشن بە ڕكێش كردنی خەڵكی كوردستان بۆ سەر سنووقەكانی شانۆگەریی هەڵبژاردن، پێوەندیی ڕاستەقینەی نێوان تاران و كوردستان كە بریتییە لە پێوەندی نێوان داگیركەر و داگیركراو، پشارنەوە. تاران تێدەكۆشێ كوردستان وەك بەشێكی ئاسایی لە “ئێران” و كورد وەك هاوناسنامەی، نەتەوەیەكی ساختە بە ناوی “ملت ایران” لەناو قەوارەی دەوڵەت، پیشان بدات.
لەگەڵ هەموو ئەو ئامانج و نیاز و تایبەتمەندییانەی كە هەڵبژاردن لەناو ئەو دەوڵەت و سیستەمەدا هەیەتی، لە شانۆگەرییەكانی ئەمجارەدا، تاران خۆی لە مەبەست و نیاز و پلانێكی گەورەی دیكە مەڵاس داوە كە بریتییە لە: سڕینەوەی وێنەی گەورەترین ڕاپەڕینی 45 ساڵی ڕابردووی كوردستان و نەتەوەكانی بندەستی ئێران؛ ڕاپەڕینی مەزنی ژینا !
ڕۆلەكانی كوردستانی زامدار!
تاران تێدەكۆشێ و بۆی گرینگە بە ڕازییكردن یان بە زۆر بردنی ئێوە بۆ سەر سنووقەكانی ئەو شانۆگەرییانە، شانازیی لێدانی چەخماخە و پێشەنگایەتیی ڕاپەڕینی ژینا، لە كوردستان بستێنێتەوە. تاران حەول دەدات بەو شانۆگەرییانە دیوێكی پێچەوانەی دیمەنەكانی حەماسەی سەرشەقامەكان لە ڕاپەڕینی ژینادا، پیشانی جیهان و لایەنگرانی بدات. تاران بە تەمایە بە دەركەوتنی ئێوە لە پای سنووقەكانی دەنگدان، شكۆی كچەكانمان كە سینگیان كردە قەڵغانی فیشەكی دوژمن و كوڕەكانمان كە بە عەشقەوە لە مەرگ نەدەسڵەمینەوە، بشكێنێ. تاران دەیهەوێ، ناو و ناوبانگ و دیمەنەكانی ئەو ڕاپەڕینە مەزنە لە زەینی گەلان و دەوڵەتانی جیهاندا بشواتەوە و لە جێگایان دیمەنی دەستەمۆ بوونمان پیشان بدات. بەڵێ؛ تاران دەیهەوێ بەمجۆرە بەهاكانی كۆڵنەدان و بەرەنگاریی و هەستان و گلان لە ڕۆڵەكانی بنارەكانی «دێنا»،«زەردەكوو»،«داڵانكوو»،«كەوەركوو»،«مانێشت»،«پەڕاو»، «شاهۆ»،«كۆساڵان»،«ئاویەر»،«ئاربابا»،«وەنەوشە»،«تەرەغە»،«هەڵگورد» و «ئاگریی»، بستێنێتەوە!
بۆیە، ئەوانەی لەم نیشتمانە زامدارەوە، خۆیان بۆ بەشداریی لە مەجلیسەكانی داگیركەر كاندید كردووە، دەبێ بزانن لەو گەوەڕەی بۆی دەچن، دەبێ پاشاخوڕی فەرماندەكانی سپای پاسداران و تێرۆریستەكانی وەزارەتی ئیتلاعات كاوێژ بكەنەوە. ئەوانەش كە دەچنەسەر سنووقەكان وبەشداریی ئەو هەڵبژاردنانە دەكەن، دەبنە ئامڕازی پیلان و ئامانجەكانی تاران؛ دەبنە هاودەستی ئەوانەی فیشەكیان بە سینگی كوڕان و كچانی نیشتمانەكەمانەوە ناوە؛ دەبنە هاودەستی ئەوانەی تەنافی داریان خستووەتە ملی لاوانی بە دیل گیراومان؛ دەبنە هاودەست و هاودڵی ئەو پاسدارانەی درۆن و هاژەكیان بە بارەگاكان و ماڵی پێشمەرگەوە نا و كوڕە ئازاكانیان لە خوێن گەوزاندین و ژن و منداڵی ساوایان كوشتین.
بەڵێ؛ بەشداریی لەو شانۆگەرییانەدا ،كولاندنەوەی هەموو ئەو زام و برینانەیە؛ گۆڤەند گێڕانە لەسەر گڵكۆی شەهیدەكان و شەهیدە گۆڕ غەریب و گۆڕ نادیارەكانمان.تەنیا هەڵبژاردن و دەنگدانێ بۆ كوردستانیان پیرۆز و جێگای شانازییە كە ڕێفراندۆمی دیاریی كردنی چارەنووسیی سیاسیی كوردستان بێت.
دەبا لە بەختیاری و لوڕستاناتەوە هەتا ئیلام و كرماشان، لەوێوە بۆ ئەردەڵان و هەورامان و موكریان هەتا قەڵای چارییە و خۆراسان؛ بە بەشداریی نەكردن و تەحریمی شانۆگەرییەكانی 11 ڕەشەمە، پەیامی كۆڵنەدان و خەبات لە ڕێی ڕزگاریی خاك و ئەستاندنی ئازادیی و سەربەخۆیی، بە ڕووی تاران و گشت جیهاندا بدەینەوە و ڕۆحی شەهیدانی راپەڕینی ژینا و سەربەدارانی زیندانەكانی داگیركەر، شاد بكەین.
پارتی ئازادیی كوردستان PAK
