د.خەلیل غازی: ناردنی 618 ملیارەكەی مووچە بۆ هەرێمی كوردستان بەردەوام.
موعین كازمی: حكومەت سەرقاڵی دوایین ڕێككارەكانە بۆ هەمواری یاسای بودجە.
غەریب ئەحمەد: لە بەغدا بە میزاجی كەسی مانگانە داواكاریی لە هەرێم دەكرێت.
شێروان دووبەردانی : نابێت جیاوازی لەنێوان خەرجكردنی مووچەدا بكرێت.
مووچە و بودجە بابەتێكی گەرمی نێو راگەیاندنی كوردستان و شەقام، بە جۆرێك ئێستا سنوورەكانی بڕیوەو لە ئاستی نێودەوڵەتی و راگەیاندنەكانی بیانیش باسی لێوە دەكرێت، زۆرجاریش لە نێو ناوەندە سیاسییەكان دەبێتە بەشێك لە گفتوگۆكان.
هەرێمی كوردستان راگرتنی شایستە داراییەكانی هەرێم لە لایەن بەغداوە بە سزایەكی سیاسی و بۆ لاواز كردنی پێگەی هەرێم دەزانێت، بە تایبەتی لە دوای ئەنجامدانی ریفراندۆمە سەركەوتووەكە بە سەرۆكایەتی سەرۆك مەسعود بارزانی و خیانەتی 16ی ئۆكتەبەر 2017.
لە بەرامبەریشدا عەرەبەكانی عێراق بە شیعە و سووننەوە، هەروەها بەشێك لە پێكهاتەی توركمانەكانیش ئەم گەمارۆ خستنەی سەر هەرێمی كوردستان بە دەستكەوت دەزانن.
هەرچی حكومەتی عێراق كە بە تەواوی دامەزراوەكانییەوە كەوتۆتە ژێر هەژموونی ئێران و چاودێران ئاماژە بەوە دەكەن ” ئێران تەواوی رێكارەكانی دژایەتی كردنی هەرێمی كوردستان بۆ عەرەبەكانی عێراق دیاری دەكات، مەبەستی سەرەكیشی ئەوەیە هەرێمی كوردستان بە شێوەی عێراقی ناوەندی بێ سەروەری و لەرزۆك بكات و بیخاتە ژێر هەژموونی خۆیەوە، بۆیە تەواوی ریگاكانی تاقی كردووتەوە، لەوانە ئابووری، سەربازی، دادگای باڵای عێراق، پەرلەمان و برینی قوتی خەڵك”.
بەڵام تا ئێستا سەركەوتوو نەبووە لە هینانەدی مەبەستەكانی و هەرێمی كوردستان كە پارتی دیموكراتی كوردستان بەڕێوەی دەبات تا شوێنە لە ناوچەكە نەكەوتۆتە ژێر هەژموونی ئێرانەوە .
هەر چەندە تەواوی ئەو بابەتانەی عێراق بۆ لاواز كردنی پێگە و توانای هەرێمی كوردستان دەستی بۆ بردوون هەستیارن، بەڵام بڕینی قوتی هاووڵاتییان قێزەوونترین گوشار بوو كە حكومەتی عێراق دەستی بۆ برد، بە تایبەتی كە راگرتنی هەناردە كردنی نەوتیش كەوتە واری جێبەجێ كردنەوە.
لەبەر ئەم هۆكارانە هاتن و نەهاتنی مووچە لە نێو شەقامی كوردستان بۆتە جێگەی مشتومڕ، بەرپرسانیش بە تایبەتی ئەندام پەرلەمانانی عێراق هەریەكەوە جۆرێك لێدوان دەدەن، دواجار بڕیار دراوە مانگانە 618 ملیارد دینار بخرێتە سەر هەژماری بانكی هەرێمی كوردستان و بۆ مووچە خەرج بكرێت.
د.خەلیل غازی، ئەندامی لێژنەی دارایی پەرلەمانی عێراق، لەیەر زاری بەرپرسێكی عیرَاق راگەیاند ” ناردنی 618 ملیارەكەی مووچە بۆ هەرێمی كوردستان بەردەوام دەبێت و چاوەڕێین بڕەكەی زیاد بكرێت.”
شێروان دووبەردانی، ئەندامی فراكسیۆنی پارتی دیموكراتی كوردستان لە پەرلەمانی عێراق، بە ماڵپەڕی (باسنیوز)ی راگەیاندووە “حكوومەتی هەرێمی كوردستان، مانگی ڕابردوو لیستی فەرمانبەران و هەموو وردەكارییەكانی داوەتە دارایی فیدڕاڵی، بۆیە ئەم مانگە ڕێكارەكانی ناردنی 618 ملیارەكە ئاسانترە.”
ئەوەشی گوت: ” نابێت جیاوازی لەنێوان خەرجكردنی مووچەدا بكرێت و مووچەخۆرانی هەرێمی كوردستانیش مافی خۆیانە مووچەیان زوو بنێردرێ.”
بەپێی قسەی پەرلەمانتاران و بەرپرسانی حكومی لە عێراق و هەرێمی كوردستان، ناردنی ئەم بڕە پارەیە بەردەوام دەبێت تا ئەو كاتەی یاسای بودجە لە پەرلەمانی كوردستان هەموار دەكرێتەوە.
موعین كازمی، ئەندامی لیژنەی دارایی لە لێدوانێكی رۆژنامەوانیدا ڕایگەیاند” لە ماوەی 10 ڕۆژی داهاتوودا هەمواری یاسای بودجە دەگاتە ئەنجومەنی نوێنەران، لەگەڵ گەیشتنیشی لیژنەكەیان وردبینی بۆ بڕگە و ماددە هەمواركراوەكان دەكات و دواتر بۆ پەسەندكردنی دەخرێتە دەنگدانەوە”.
لە لایەكی دیكەوە غەریب ئەحمەد، ئەندامی پەرلەمانی عێراق لە فراكسیۆنی یەكێتی رایگەیاند” بەغدا داوایەكی نوێی ئاراستەی هەرێم كردووە بۆ ناردنی مووچە و وەزارەتی دارایی عێراق داوای وردەكاریی لیستی میلاكات و مووچەی هەرێمی كوردستانی كردووە و ئەوەش یەكەمجارە ئەو داوایە بكات”.
وتیشی” تاوەكو هەمواری یاسای بودجە دەچێتە بواری جێبەجێكردنەوە لە بەغداوە بە میزاجی كەسی مانگانە داواكارییەك لە هەرێم دەكرێت، كە زیاتر بیانووە و ناچنە چوارچێوەیەكی یاساییەوە”.
