زاری كرمانجی-سۆران
سەردانەكەی سەرۆكی حكوومەتی هەرێمی كوردستان بۆ پلاتفۆرمی جیهانی لوتكەی حكوومەتەكان لە دوبەی دوای كۆڕبەندی داڤۆس، دەرفەتێك دەڕەخسێنێت بۆ پیشاندانی تواناكانی و تیشك خستنە سەر ئەو بەربەستانەی كە حكوومەتە یەك لەدوا یەكەكانی عێراق لەبەرامبەر كورد كێشە دروست دەكەن.
د. سانع شەریف، مامۆستا لە فاكەڵتی یاسا و زانستە سیاسییەكان لە زانكۆی سۆران، بەزاری كرمانجی گووت ” بەشداری سەرۆكی حكوومەتی هەرێمی كوردستان لە لوتكەی حكوومەتەكان كە پلاتفۆرمێكی ساڵانەی جیهانییە كە لە دوبەی بەڕێوەدەچێت، تێیدا سەركردەكان و داڕێژەرانی سیاسەت و پسپۆڕان و داهێنەران كۆدەبنەوە بۆ گفتوگۆكردن و داڕشتنی داهاتووی حكومەت و حوكمڕانی، بایەخ و گرنگیەكی زۆری بۆ هەرێمی كوردستان هەیە”.
دەشڵێت ” گرنگە بێت بۆ هەرێمی كوردستان بەوپێیەی دەرفەتێك دەڕەخسێنێت بۆ پیشاندانی تواناكانی و تیشك خستنە سەر ئەو بەربەستانەی كە حكوومەتە یەك لەدوا یەكەكانی عێراق لەبەرامبەر كورد كێشە دروست دەكەن. هەروەها هەرێمی كوردستان بە پەیوەندیكردن لەگەڵ سەركردە جیهانییەكان و شارەزایان لە لوتكەكەدا، دەتوانێت لە تێڕوانینەكانی سەركردەكانی وڵاتان لە باشتركردنی پراكتیكەكانی حوكمڕانی، بەشدار بێت”.
ئەوەش دەخاتەڕوو ” بەشداریكردنی سەرۆكی حكوومەت لە لوتكەكەدا دەتوانێت یارمەتی هەرێمی كوردستان بدات بۆ پتەوكردنی پەیوەندییە نێودەوڵەتییەكانی و ڕاكێشانی وەبەرهێنان و پێشخستنی كارنامەی گەشەپێدانیی. جگەلەوەش پاراستنی هەرێمی كوردستانیشە لە ئاڵنگارییە ناوچەیییەكان وەك كیانێكی دەستووری و سەقامگیر لە ناوچەكەدا و ئەم بەشداریكردنە دەرفەتێك دەڕەخسێنێت بۆ بە دەستهێنانی دانپێدانان و شەرعیەتی نێودەوڵەتی، پەرەپێدانی پەیوەندییە دیپلۆماسییەكان و هاوبەشی لەگەڵ وڵاتانی دیكە و ڕێكخراوە نێودەوڵەتییەكانی ناو لوتكەكە. گرنگتر لەمەش سەرۆكی حكومەت بابەتێكی هەستیار و زەروری ورووژاند كە لوتكەكە وەك سەكۆیەك بۆ داكۆكیكردن لە سەربەخۆیی و ناسنامەی سیاسی هەرێم قۆستەوە و، لە هەمان كاتدا داوای پشتیوانی بۆ خواستەكانی گەلی كورد دەكات”.
لە دوا قسەكانیدا ئاماژەی بەوەدا ” بەشداریكردن لە كۆڕێكی جیهانی لەم جۆرەدا دەرگا بەڕووی سەرچاوەكانی وەك یارمەتی دارایی، وەبەرهێنان و هاوكاری تەكنەلۆژیدا دەكاتەوە، ئەمەش بۆ هەرێمی كوردستان گرنگە بۆئەوەی بتوانێت كێشە داراییەكانی كە بەهۆی حكومەتی عێراقەوە درووستبوونە كەم بكاتەوە.
