زاری كرمانجی :
بە ئامانجی رێكخستن و یەكرێزی و تەبایی نێوان پارت و لایەنە سیاسیەكانی رۆژهەڵاتی كوردستان، كۆمەڵێك كەسایەتی ناوخۆ و دەرەوەی وڵات، هەڵمەتێكی واژۆ كۆكردنەوەیان دەستپێكردووەو داواكارن كە گۆڕانكارییەكانی ئێستای ئێران و رۆژهەڵاتی كوردستان، دەخوازێ یەكێتیی و یەكرێزی نێوان كوردان و پارت و لایەنە سیاسیەكانی ئەم بەشەی وڵاتە بێتە كایەوە و تێكۆشانەكانیان لە چوارچێوەی یەك ئامانج و یەك گوتار بەردەوام بكەن .
بانگەوازی هەڵمەتەكە بۆ ڕێكەوتن و یەكخستنی هەڵوێستی پارتەكانی رۆژهەڵاتی كوردستان
” ئێمە خاوەنی ئەو واژۆیانەی خوارەوە، لەسەر بنەمای ئەو پرەنسیپ و هەنگاوانەی كە لێرەدا هاتوون، داوای یەكێتی و یەكڕێزیی لە حیزب و رێكخراوە سیاسییەكانی رۆژهەڵاتی كوردستان دەكەین. هەلومەرجی هەستیاری ئێستای ڕۆژهەڵات، ئالینگاریی چارەنووسسازی لەبەردەم نەتەوە و بزووتنەوەی رزگاریخوازیی كورد لە رۆژهەڵاتی كوردستان داناوە. گریمانەی گۆڕانی بنەرەتی لە ڕۆژهەڵات، بەرپرسیارێتییەكی مێژوویی بۆ ئەو حیزبانە بۆ یەك-هەنگاویی و گرتنەپێشی ستراتیژییەكی هاوبەش، لەسەر هێندێك بنەما و خاڵی سەرەكی، ساز كردوە. كۆماری ئیسلامی، وەكوو هەر سیستمێكی تۆتالیتێر، لەوانەیە لە ئاكامی بەربڵاوی ناڕەزایەتی، خۆپێشاندانەكان و مانگرتنە گشتییەكان، لە ناكاو بە چۆكدا بێت. لەگەڵ ئەوەشدا كە هەرەس-هێنانی رژێمی كۆماری ئیسلامی بێگومان دەرفەتێكی زێرین بۆ نەتەوەی كورد بۆ دەستەبەركردنی سەروەریی سیاسیی خۆی دەخوڵقێنێت. وێدەچێ لەنەبوونی ئامادەیی هێزە كوردییەكان ئالینگاری و مەترسیی زۆر میژووییشی بۆ كورد بەدواوە بێت. لە ئەگەری هەڵوەشانەوەی دامودەزگاكانی ئەمنی دەوڵەتی داگیركەر لە كوردستان، هەم لە پێناو دەستەبەركردنی مافی سەروەری بۆ نەتەوەی كورد و هەم بۆ دابینكردنی ئاسایشی نیشتمانی بۆ هاوولاتییان، هێز و رێكخراوە سیاسییەكانی رۆژهەڵات بەرپرسیارییەتی ئەخلاقی و نەتەوەییان هەیە. لە بۆشاییەكی وەهادا و لە نەبوونی یەكگرتوویی دامەزراوەیی لە نێوان هێز و رێكخراوەكانی ڕۆژهەڵات. یەكگرتوویی دامەزراوەیی لە ڕوژهەڵات لەسەر پلاتفۆرمێكی نیشتمانی، پێویستێكی هەمیشەیی بووە. بەڵام، لە هەڵومەرجی ئێستادا ئەو یەكگرتووییە، پێویستییەكی هەنووكەیی و خواست و ویستێكی نەتەوەییە. بۆیە هەموو حیزب و رێكخراوە سیاسیەكانی رۆژهەڵاتی كوردستان بانگهێشت دەكەین كە لەسەر ئەم بنەمایانە بۆ یەكگرتوویی دامەزراوەیی نەتەوەیی، كە ڕەنگدەرەوەی فرە ڕەنگی رۆژهەڵات بێت، رێك بكەون.
بنەماكانی رێكەوتن
ا. لەسەر بنەمای دەستەبەركردنی یەكسانی سەروەریی سیاسی نەتەوەیی بۆ رۆژهەڵاتی كوردستان.
ب. بە بنەماوەرگرتنی پرەنسیپی مافی یەكسانی سەروەری سیاسی بۆ گشت نەتەوەكانی جوگرافیایی سیاسی ئێران لە پێناو هاوئاهەنگی، هاوپشتی و سازكردنی بەرەیەكی هاوكاری لەگەڵیان.
پ. بە بنەماوەرگرتنی یەكسانی جێندەری و قبووڵی بە كردەوەی یەكسانی، رێبەرایەتیی و كاریگەری ژن لە بزووتنەوەی رزگاریخوازیی كوردستاندا.
ج. بە بنەماوەرگرتنی پرەنسیپگەلی دێموكراتیك لە دامەزراوەییكردنی یەكگرتوویی بزووتنەوەی نەتەوەیی، پێشگرتن لە سازكردنی ناوچەی ژێردەسەڵاتی حیزبی.
چ. بە بنەماوەرگرتن و گەرەنتیی مافی یەكسانی جیاوازییە شوناسییەكان (دینی، شێوە زار، ڕەگەزی) لە كۆمەڵگای كوردستان.
ح. بە بنەماوەرگرتنی سەروەریی یاسا و پەیڕەوكردنی شەفافییەتی ئیداری لە هەموو دامەزراوەكاندا.
بە بنەماوەرگرتنی ئەم پرەنسیپگەلە، بانگهێشتی هەموو حیزب و رێكخراوە سیاسییەكانی رۆژهەڵات دەكەین كە لە پێناو بەدیهێنانی یەكگرتوویی دامەزراوەیی نەتەوەیی، بە كردوە ئەو هەنگاوانە هەڵبێننەوە.
هەنگاوە پراكتیكەكان
١. دامەزراندنی شۆڕای باڵای رێبەڕایەتی و بڕیار، پێكهاتوو لە هەموو حیزب و رێكخراوە سیاسییەكانی رۆژهەڵات و پێبەندبوونی هەموو لایەنێك بە بڕیارەكانی.
٢. یەكخستنی هێزی پێشمەرگە و پێكهێنانی ناوەندیی فەرماندەیی سپایی نیشتمانی ڕۆژهەڵات كە گرێدراوە بە بڕیارگەلی شۆڕایی باڵای ڕێبەرایەتی و بڕیار.
٣. پێكهێنانی كۆمیسیۆنی پەیوەندییەكانی شۆڕای باڵای ڕێبەڕایەتی و بڕیار بۆ دیپلۆماسیەكی چالاك و نوێنەرایەتیی سیاسەتی یەكگرتوویی كورد لە ڕۆژهەڵات.
٤. پێكهێنانی دەزگای دادوەریی سەربەخۆ.
٥. پێكهێنانی میدیای نەتەوەیی كە زمانحاڵی شۆڕای باڵای ڕێبەرایەتی و بڕیار بێت.
٦. پێكهێنانی دامەزراوەی پاراستنی ئاسایشی كۆمەڵایەتیی كوردستان.
٧. پێكهێنانی كۆمیسیۆنی ئامادەكاریی بۆ بەڕێوەبەرایەتیی دامودەزگاكانی كوردستان بە هاوئاهەنگی و بەشداری كۆمەڵگای مەدەنی.
٨- نایاسایی ڕاگەیاندنی هەر جۆرە هەوڵی تاكەكەسی و تاكە حیزبی بۆ توڵەستاندنەوە یان سەزادانی هاوڵاتی لەئەگەری نەمانی دامودەزگاكانی كۆماری داگیركەری ئیسلامی لە كوردستان.
لە كۆتاییدا، پێویستە هەموو حیزبەكان ئاگاداری ئەو راستییە بن كە خەڵكی ڕۆژهەڵات نە دەتوانێت بۆ ماوەیەكی نادیار چاوەڕوانی یەكرێزیی حیزبەكان بێت و نە قەبووڵیشی دەكات كە لە ئەگەری بۆشایەكدا، ئەو حیزبانە بە كەڵك وەرگرتن لە هێزی چەك هەموو جمگەكانی دەسەڵات قۆرخ بكەن .
