مەهدی محەممەد – زاری كرمانجی :
دوێنێ شەممە، چینییەكان لە وڵاتەكەیان و لە سەرانسەری جیهاندا دەستیان بە ئاهەنگەكانیان كرد بۆ دەستپێكردنی ساڵی نوێی مانگ كە بە ساڵی چینیش ناسراوە.
ئەم ئاهەنگە كە بە فێستیڤاڵی بەهار ناسراوە، یەكێكە لە پایە گرنگەكانی كولتووری چینی، و نزیكەی ٢ ملیار كەس لە سەرانسەری جیهاندا بەم بۆنەوە ئاهەنگ دەگێڕن.
هەرچەندە فێستیڤاڵی بەهاری چینی پەیوەستە بە زۆرینەی نەتەوەیی هانی چینەوە، بەڵام لەلایەن 29 گرووپ لە كۆی 55 كەمینە نەتەوەییەكانی چین و هەروەها زۆرێك لە وڵاتانی دیكەی ڕۆژهەڵاتی ئاسیا ئاهەنگ دەگێڕن وەك (ماكاو، تایوان، سەنگافورە، مالیزیا، كۆریای باكوور، كۆریای باشوور، فلیپین، ئەندۆنیسیا، ڤێتنام ).
ئاهەنگەكانی فێستیڤاڵی بەهار دەگەڕێتەوە بۆ سەردەمی پاشا شەڕكەرەكان لە ساڵی ٤٧٥ پێش زایین تا یەكگرتنی چین بە سەركردایەتی تشین شی هوانگ لە ساڵی ٢٢١ پێش زایین.
هەر ساڵێكی چینی ناوی یەكێك لەو 12 گیاندارەی لێ نراوە كە بە پشتبەستن بە پێگەی خولگەی زەوی بە دەوری خۆردا دەسووڕێنەوە، ئەمساڵیش ناوی ئەژدیهای لێ نراوە.
