ناتانیاهۆ، لە كۆنگرەیەكی ڕۆژنامەوانیدا لە قودس گووتی” تەسلیمبوون بە داواكارییەكانی حەماس دەبێتە هۆی كۆمەڵكوژییەكی دیكە و كارەساتێكی گەورەی دیكە بۆ دەوڵەتی ئیسرائیل كە كەس ئامادە نییە قبوڵ بكات”.
سەرۆكوەزیرانی ئیسرائیل مەرجەكانی حەماسی بۆ ئاگربەست رەتكردەوە و داواش لە سوپای وڵاتەكەی دەكات ئامادەكاری بكەن بۆ ئەنجامدانی هێرش بۆ سەر رەفەح لە باشووری كەرتی غەزە.
بنیامین نەتانیاهۆ، سەرۆكوەزیرانی ئیسرائیل ڕەتكردنەوەی داواكارییەكانی حەماس بۆ تەواوكردنی گرێبەستی ئاڵوگۆڕی زیندانییەكان ڕاگەیاند و سوێندی خوارد ” بەردەوام بێت لە شەڕكردن لە كەرتی غەزە و بەرەو ڕەفەح، باشووری كەرتی غەزە هەنگاو بنێت”.
راشیگەیاند” ئێمە پابەندنەبووین بە هیچ شتێكەوە سەبارەت بە ئازادكردنی ئەو تیرۆریستانەی دەستیان بە خوێن پەڵە (ئەو زیندانییە فەلەستینیانەی كە تەلئەبیب تۆمەتباریان دەكات بە ئەنجامدانی هێرش یان پلاندانان) و بەردەوامی فشارە سەربازییەكان مەرجێكی پێویستە بۆ ئازادكردنی ڕفێنراوەكان”.
ئاماژەی بەوەشكرد” ئێمە بەردەوام دەبین لە شەڕكردن، سوپای ئیسرائیلیش لە ماوەی چەند مانگێكدا لە شەڕەكەدا سەردەكەوێت نەك ساڵانێك”.
لە درێژەی قسەكانیدا سەرۆك وەزیرانی ئیسرائیل رایگەیاند” ئێمە ڕێنماییمان بۆ سوپای ئیسرائیل دەركرد كە بەرەو ڕەفعە و ئۆردوگا ناوەندییەكانیش كە دوا قەڵای حەماسە جوڵە بكەن”.
