وەزارەتی خوێندنی باڵا كرێی خوێندن لە زانكۆ و پەیمانگە حكومی و تایبەتەكان كەمدەكاتەوە

زاری كرمانجی – سۆران :

بە لەبەرچاوگرتنی بارودۆخی دارایی هاوڵاتیانی هەرێمی كوردستان، وەزارەتی خوێندنی باڵا و توێژینەوەی زانستی، كرێی خوێندن لە زانكۆ و پەیمانگە حكومییەكانی هەرێمی كوردستان بەڕێژەی (٤٥%) لەگشت قۆناغەكانی خوێندنی بەرایی و خوێندنی باڵا (پارالێل – ئێواران)، هەروەها كرێی خوێندنی زانكۆ و پەیمانگە تایبەتەكان بەپێی ئەنجامەكانی ڕێزبەندی نیشتیمانی، بەڕێژەی (١٠ بۆ ٢٠ %) بۆ سەرجەم قۆناغەكانی خوێندن كەمكردەوە.
عەباس ئەكرەم وتەبێژی وەزارەتی خوێندنی باڵا و توێژینەوەی زانستی لە لێدوانێكدا ڕایگەیاند: هەرێمەكەمان بە بارودۆخێكی تایبەت گوزەر دەكات بە شێوەیەك پێویستە هەموان ڕەچاوی بارو گوزەرانی دارایی خەڵكی خۆمان بكەین و لە هەمان كاتیشدا بتوانین هەلی خوێندن بۆ قوتابیان و خوێندكارانی هەرێمەكەمان دەستەبەر بكەین، لەو چوارچێوەیەشدا وتی: بۆ ئەوەی گیانی كێبڕكێی زانستی لە دامەزراوە ئەكادیمیەكان بپارێزین و بە لەبەرچاوگرتنی باوردۆخی هاوڵاتیان وەزارەتی خوێندنی باڵا بڕیاریدا بە كەمكردنەوەی كرێی خوێندن لە زانكۆ و پەیمانگە حكومی و تایبەتەكان.
ڕاشیگەیاند: ئامانجی وەزارەتەكەمان لە كەمكردنەوەی كرێی خوێندن لە زانكۆ و پەیمانگەكان بە لەبەر چاوگرتنی باری دارایی هاوڵاتیانی كوردستان و ڕەخساندنی هەلی زیاتری خوێندن و پەرەپێدانی تواناكانی گەنجانی هەرێمەكەمانە، لەهەمان كاتدا ئەم هەنگاوە یارمەتیدەر دەبێت لە پاراستنی سەرمایەی نیشتمانی و بەكارهێنانی لە گەشەپێدانی زانكۆكان.
وتەبێژی وەزارەتی خوێندنی باڵا وتیشی: فەرمانی وزاری كەمكردنەوەی كرێی خوێندن ئاراستەی گشت زانكۆ و پەیمانگە حكومی و تایبەتەكانی هەرێمی كوردستان كراوەو بۆ ئەمساڵی خوێندن دەچێتە بواری جێبەجێ كردن، بەم شێوەیەی خوارەوە:

زانكۆ حكومییەكان:
داشكانی ڕێژەی (٤٥%) لە كرێی خوێندنی (پارالێل) و (ئێواران)ی گشت قۆناغەكانی خوێندنی بەرایی و خوێندنی باڵا لە سەرجەم زانكۆ حكومییەكان و دامودەزگاكانی تری وەزارەتی خوێندنی باڵا و توێژینەوەی زانستی بۆ ساڵی خوێندنی (٢٠٢٢-٢٠٢٣).
زانكۆ تایبەتەكان:
كەمكردنەوەی كرێی خوێندن بەپێی ئەنجامەكانی ڕیزبەندی نیشتمانی زانكۆكانی كوردستان دەبێت بەم شێوەی خوارەوە:

• ئەو زانكۆیانەی دەكەونە گروپی B، بەڕێژەی (١٠%) كرێی خوێندن كەمدەكرێتەوە.
• ئەو زانكۆیانەی دەكەونە گروپی C، بەڕێژەی (١٥%) كرێی خوێندن كەمدەكرێتەوە.
• ئەو زانكۆیانەی دەكەونە گروپی D، بەڕێژەی (٢٠%) كرێی خوێندن كەمدەكرێتەوە.
• سەرجەم پەیمانگە تایبەتەكان و كۆلێژە زانكۆییەكان بەڕێژەی (٢٠%) كرێی خوێندنیان كەمدەكرێتەوە.