مەهدی محەممەد – زاری كرمانجی :
بەرەبەیانی ئەمڕۆ شەممە 3ی شوباتی 2024، سوپای ئەمەریكا لە وەڵامی ئەو هێرشە درۆنییەی كرایە سەر بنكەی تاوەر 22 لە نێو خاكی ئوردن كە بووە هۆی كوژرانی سێ سەرباز و برینداربوونی زیاتر لە 40 سەربازی تر، زنجیرەیەك هێرشی كردە سەر چەند بنكە و دامەزراوەیەكی سوپای پاسداران و ئەو گرووپە چەكدارییانەی سەر بە ئێرانن لە سووریا و عێراق.
سەبارەت بە هێرشەكەوە جۆ بایدن سەرۆكی ئەمەریكا ڕاگەیاند “ئەمڕۆ وەڵامی ئێمە دەستیپێكرد. هەموو ئەوانەی هەوڵ دەدەن زیانمان پێ بگەیەنن، با ئەمە بزانن: ئەگەر ئێوە زیان بە ئەمریكییەك بگەیەنن، وەڵاممان دەبێت.”
سوپای ئەمەریكا لە بارەی هێرشەكەوە ئاشكرای كرد كە 85 ئامانجی لە ناو خاكی سووریا و عێراق بۆردوومان كردووە كە شوێنی هێزی قودسی سوپای پاسدارانی ئێران و گرووپە چەكدارەكانی سەر بە ئێرانن.
لە ڕاگەیاندراوێكدا فەرماندەیی ناوەندیی ویلایەتە یەكگرتووەكانی ئەمەریكا (CENTCOM) ڕایگەیاند “هێرشە ئاسمانییەكان بەرەبەیانی ڕۆژی شەممە دەستیانپێكرد و 125 مووشەك و بۆمب لە بۆردوومانەكان بەكارهاتوون كە ئامانجەكانیان بە وردی دەپێكن.”
بەپێی ڕاگەیاندراوەكەی CENTCOM ئامانجەكان بریتی بوون لە ناوەندی ئۆپەراسیۆن و كۆنترۆڵی ئەو گرووپانە لەگەڵ ناوەندی هەواڵگری و شوێنی چەك و تەقەمەنی و كۆگاكانی فڕۆكەی بێ فڕۆكەوان و بە تایبەتی ئەو شوێنانەی كە لێیانەوە هێزەكانی ئەمەریكا و هاوپەیمانان كرانەوەتە ئامانج.
هێرشە ئاسمانییەكەی سوپای ئەمەریكا كە لەلایەن فڕۆكەی دوورهاوێژی بی-1 ئەنجامدراوە، 11 ئامانجی لە ناوچەكانی (شبلی و حەیدەرییە و مەزار عەین عەلی لە مەیادینی دێرەزوور) لە ناو خاكی سووریا و، شارۆچكەی ئەلقائم لە پارێزگای ئەنباری عێراق بە 125 مووشەك و بۆمب بۆردوومان كرد.
دۆگلاس سیمز، بەڕێوەبەری دەستەی سوپاسالاری هاوبەشی ئەمریكا، لە كۆنگرەیەكی ڕۆژنامەوانیدا باسی لەوە كرد “كەشوهەوا ڕۆڵی سەرەكیی بینیوە لە پلاندانانی ئەمریكا بۆ ئەو هێرشانە بۆ ئەوەی پشتڕاست بن لەوەی لە شوێنە دروستەكان دەدەن و خەڵكی سڤیل ناكەنە ئامانج.”
درەنگ كەوتنی هێرشەكە، بەشێك لە بەرپرسە ئەمریكییەكانی نیگەران كردووە و پێیان وایە دواكەوتنی هێرشەكە خزمەتی بە گرووپە چەكدارەكان و ئێران كرد.
مایك جۆنسن، سەرۆكی ئەنجوومەنی نوێنەرانی ئەمریكا لە حیزبی كۆمارییەكان، ڕەخنەی لە شێوازی هێرشەكەی ئیدارەی بایدن گرت و ڕایگەیاند “ئیدارەی بایدن بۆ ماوەی هەفتەیەك چاوەڕێیان كرد و بە ئاماژەی ناڕاستەوخۆ شێوازی وەڵامەكەیان بە جیهان و ئێران ڕاگەیاند.”
هاوكات تۆم كۆتۆن، سیناتۆری كۆماری لە تۆڕی كۆمەڵایەتی X پەیامێكی بڵاوكردەوەو دەڵێ “ئیدی كاتی ئەوەیە بایدن درك بەوە بكات كە سیاسەتی ڕازیكردنی ئێران شكستی هێناوە. ئێمە دەبێت لە دژی ئەوانەی زیان بە ئەمریكییەكان دەگەیەنن و تیرۆر بڵاودەكەنەوە، بەهێز بوەستینەوە.”
جگە لەوەش ژمارەیەك ئەندامی كۆنگرێس ڕەخنە لە بایدن دەگرن و دەڵێن، دەبوو هێرشەكان زووتر كرابان، چونكە دواخستنیان دەرفەتیان بە گرووپە چەكدارەكان داوە پێگەكانیان چۆڵ بكەن و خۆیان بشارنەوە.
دوای هێرشەكە وەزارەتی بەرگریی سووریا ڕاگەیاندراوێكی بڵاو كردەوە و ڕایگەیاند “ئەو ناوچەی كراوەتە ئامانج هەمان ئەو ناوچەیەیە كە سوپای سووریا تێیدا ڕووبەڕووی داعش دەبێتەوە و زیانی زۆری بە موڵكی گشتی و تایبەت گەیاندووە.”
دەشڵێت “ئەو هێرشە هیچ پاساوێكی نییە جگە لە لاوازكردنی توانای سوپای سووریا و هاوپەیمانەكانی بۆ ڕووبەڕووبوونەوەی تیرۆر.”
لای خۆشییەوە گوتەبێژی سەركردەی هێزە چەكدارەكانی عێراق، ئەم هێرشانە بە پێشێلكردنی سەروەریی عێراق ناو دەبات.
یەحیا ڕەسول عەبدوڵڵا، گوتەبێژی سەركردەی هێزە چەكدارەكانی عێراق لە بارەی هێرشەكەی ئەمەریكاوە دەڵێ “شاری ئەلقائم و ناوچەكانی ڕۆژئاوای عێراق بە فڕۆكەی ئەمریكایی بۆردوومانكراون و ئەم بۆردوومانانەش لە كاتێكدایە عێراق تێ دەكۆشێت بۆ دڵنیابوون لە ئاسایش و سەقامگیریی ناوچەكە.” دەشڵێت “ئەم هێرشانە بە پێشێلكردنی سەروەریی عێراق دادەنرێت و مەترسیشن بۆ ڕاكێشانی عێراق و ناوچەكە بۆ ڕەوشێكی كەس هیوا بە ئەنجامەكەی ناخوازێت و ئەو بەرەنجامانەش كارەسات دەبن بۆ عێراق و ناوچەكەش.”
تا ئێستا زیانەكانی هێرشە ئاسمانییەكەی بەرەبەیانی ئەمڕۆی سوپای ئەمەریكا، بە تەواوی ئاشكرا نەكراون، بەڵام بەپێی سەرچاوەكانی حەشدی شەعبی لە عێراق لایەنی كەم 10 كەس لە پارێزگای ئەنبار كوژراون و كە دوو فەرماندەی حەشد لە نێو كوژراوان هەن، لە سووریاش بە پێی سەرچاوە ناوخۆیییەكان 18 ئەندامی گرووپە چەكدارەكانی لایەنگری ئێران كوژراون.
كۆشكی سپی لەبارەی هێرشەكەوە ڕایگەیاند كە هێرشە ئاسمانییەكانیان 30 خولەكیان خایاندووە و لە بەدیهێنانی ئامانجەكانیاندا “سەركەوتوو بوون.”
