ئەڤین بارزانی
فشار و هەڕەشەكانی بەغدا بە هەموو شێوەیەك لە دژی هەرێمی كوردستان زیادی كردووە، دانوستاندن و ڕێككەوتنەكان لەگەڵ خەڵكی بەغدا بۆ ماوەی چەندین ساڵ لەسەر كاغەز ماوەتەوە، سەرۆكی هەرێمی كوردستان، نێچیرڤان بارزانی، دوایین سەردانی بۆ بەغدا كۆبوونەوە لەگەڵ بەرپرسانی حكوومەت و هەموو هێزە سیاسییەكان، بەتایبەتی شیعەكان. مەبەستی پاكی هەرێمی كوردستان بۆ چارەسەركردنی كێشەكان لە ڕێگەی دەستوورەوە دەربڕی.
بەڵام هەر كە سەرۆكی هەرێمی كوردستان گەڕایەوە هەولێر، ئێران لە لایەك و گرووپە چەكدارە شیعەكان لە لایەكی تر هێرشیان كردە سەر هەولێر، وەزیری دارایی عێراق بە ڕوونی وتی پارەكە رەوانە ناكەین، لە كاتێكدا سەرۆكوەزیران و ئەنجوومەنی وەزیرانی عێراق ئەو بریارەی دا، بەڵام چۆن وەزیرێك بەربەستەكان دروست دەكات و سەرۆكی حكوومەت واتە سودانی بۆ هیچی پێنەكرا؟ ئەگەر دۆخەكە بەو شێوەیە بێت ئێمە چی بكەین؟
سەرەتا با بارودۆخی ئێستا قەبووڵ نەكەین، چونكە هەنگاو بە هەنگاو كار بۆ داڕمانی هەرێمی كوردستان دەكرێت، لە هەمان كاتدا وەك هەنگاوێكی گرنگ كار بۆ خۆپیشاندانێكی ملیۆنی لە هەرێمی كوردستان بكرێت، ڕێكخستنی خۆپیشاندانێكی لەو شێوەیە تەنیا كاری پارتی و یەكێتی نییە پێش هەر شتێك كاری ئۆپۆزسیۆنە، ئەگەر هێزەكانی ناو ئۆپۆزسیۆن لە حكوومەت ڕازی نەبن و بیانەوێت بێنە سەر دەستەڵات، ئەوا ناتوانن دۆخی ئێستا پێش هەر شتێك بگۆڕدرێت و ئەزموونەكە پێش هەموو شتێك بپارێزرێت؟ ئەگەر شتێك بە ناوی هەرێمی كوردستان نەما، ئەوكاتە چی دەكەن بەرامبەر بە خەڵكی هەرێمی كوردستان؟ یان بە كورتی پاراستنی هەرێمی كوردستان ئەركی سەرەكی ئەو هێزانەیە كە خۆیان بە ئۆپۆزسیۆن ناودەبەن.
خاڵێكی تری گرنگ كۆكردنەوەی سەرجەم لایەنە سیاسییەكانی هەرێمی كوردستانە بە زووترین كات، كۆكردنەوەی سەرجەم هێزە سیاسییەكانی هەرێمی كوردستان ئەركێكی زۆر گەورەیە، بۆ بنیاتنانی ئەنجوومەنی پارتە سیاسییەكان لە هەرێمی كوردستان و ئەركی پێدانی ستراتیژێكی نیشتمانییە بۆ پاراستنی هەرێمی كوردستان لە هەر مەترسییەك.
پێویستە لەسەر ئاستی نێودەوڵەتی كاری گەورە بكرێت، لیژنەیەك لە هەرێمی كوردستانەوە بە نوێنەرایەتیكردنی هەموو هێزە سیاسییەكان و خەڵكی كوردستان سەردانی ئەمریكا و یەكێتی ئەوروپا و نەتەوە یەكگرتووەكان و وڵاتانی دیكەی جیهان بكەن، چونكە دۆخی ئێستا زۆر جددییە، دوای بڕیارەكەی دادگای پاریس، نەوتی هەرێمی كوردستان نافرۆشرێت و بەغدا مووچە و بۆدجەی هەرێمی كوردستان نادات، لەو كاتەدا هەموو ئەو وڵاتانەی كە لە كاتی خۆی بریاری 36 بۆ پاراستنی هەرێمی كوردستانیان دا پێویستە ئەركی خۆیان جێبەجێ بكەن و هەڵوێستی بەهێزیان هەبێت بەرامبەر بە ستەمكارییەكانی بەغدا.
هەرێمی كوردستان، جارێكی دیكە پێگەی خۆی بەهێزتر بكاتەوە، تەنانەت لە هەرێمی كوردستانیشدا، لەسەر بنەمای بەرژەوەندی نیشتمانی، هەڵوێستێكی بەهێز هەبێت بەرامبەر بەو كەسانەی كە ڕۆژانە لە ژێر ناوی دیموكراسییەوە خزمەتی دوژمنانی هەرێمی كوردستان دەكەن. هەروەها پێویستە هەندێك هێڵی سوور هەبن و ڕێگە بە هیچ هێز و كەسێك نەدرێت خزمەتكاری دوژمنانی كوردستان بێت و خزمەتیان بكات، پشتگیری كۆمەڵگەی نێودەوڵەتیش بۆ هەرێمی كوردستان لە ئێستادا زۆر گرنگە، هەرچەندە ئێستا زۆر شتی گرنگ لە هەرێمی كوردستان دەبێت بیكرێت، گرنگترین شت ئەوەیە كە هەڵبژاردنی پەرلەمانی كوردستان بە زووترین كات ئەنجام بدرێت بۆ ئەوەی دامەزراوە پیشەییەكانی هەرێمی كوردستان جارێكی دیكە كارا و ڕووی گەشاوەی دیموكراسی لە هەرێمی كوردستان نیشانی هەموو جیهان بدرێتەوە.
