بەختیار سەباح -زاری کرمانجی:
ئەمڕۆ ٢٠ ساڵ تێپەڕ دەبێت، به‌سه‌ر ته‌قینه‌وه‌كانی یه‌كی شوبات له باره‌گاكانی پارتی و یه‌كێتی له هه‌ولێر، کە بووە هۆی شەهید بوونی ١٠١ کەس و برینداربوونی نزیکەی ٢٥٠ کەس، ئەو ڕووداوە ئەوەندە گەورەو تراژیدی بوو، تا هەتایە لە بیرو هزری ڕۆڵەکانی کورد دەمێنێتەوە.
بیست ساڵ له‌مه‌وبه‌ر و له یەکی شوباتی 2004، له هه‌ر یه‌ك له باره‌گاكانی لقی 2ی پارتی دیموكراتی كوردستان و مه‌ڵبه‌ندی 3ی یه‌كێتی نیشتمانی كوردستان، له كاتی پێشوازیكردن له میوانان بەبۆنەی جەژنی قوربان، دوو ته‌قینه‌وەی گەورە هه‌ردوو باره‌گای لقی دووی پارتیو مه‌ڵبه‌ندی سێی یه‌كێتی به ئامانج گرت، به‌و هۆیه‌وه چه‌ندان سه‌ركرده‌و كادر له هه‌ردوو پارت و لەگەڵ هاووڵاتییانی مەدەنی شه‌هیدو بریندار بوون.
ئەمڕۆ پێنجشەممە، یەکی شوباتی 2024، بە ئامادەبوونی مەسرور بارزانی، سەرۆکی حکومەتی هەرێمی کوردستان، رێوڕەسمی ساڵیادی شەهیدانی یەکی شوبات لە پارکی سامی عەبدولرەحمان لە هەولێر دەستیپێکرد.
لە رێوڕەسمەکەدا مەسرور بارزانی، سەرۆکوەزیرانی هەرێمی کوردستان تاجە گوڵینەی لەسەر مۆنیۆمێنتی شەهیدانی یەکی شوباتی ساڵی 2004 دانا.
لای خۆیەوە نێچیرڤان بارزانی، سەرۆكی هەرێمی كوردستان لە پەڕەی تایبەتی خۆیدا لە تۆڕی كۆمەڵایەتی نووسیویەتی: ئەمڕۆ بە شكۆوە یادی هەڤاڵان و هاوكارانمان، شەهیدانی نەمری یەكی شوبات دەكەینەوەو سەری ڕێزو نەوازشیان بۆ دادەنوێنین
هەروەها دەڵێت: ”با یادی شەهیدان كە پۆلێك سەركردە و كادیری دیار و بەتوانای پارتی و یەكێتی و لایەنەكانی دیكە و خەڵكی كوردستان بوون و كرانە ئامانجی تاوانێكی ڕەشی تیرۆرستی، بكەینە هەوێنی یەكڕیزی و تەبایی و یەكتر قبووڵكردنو كاری پێكەوەیی بۆ خزمەتكردنی باشتری ئێستاو داهاتووی گەل و نیشتمان.
ئامانجی ئەم ھێرشە تێكدانی یەكێتی ناو ماڵی كورد بوو
لە لایەکی دیکەوە، هەر لە یادی کارەساتی یەکی شوبات، وەزارەتی کاروباری شەهیدان و ئەنفالکراوان ڕاگەیاندراوێکی بڵاوکردەوەو نووسیویەتی، ”لە یەکی شوباتی ساڵی 2004، تیرۆریستانی تاریک ویست، لە دوو کردەوەی خۆکوژیدا لە شاری هەولێری پایتەختی هەرێمی کوردستان (10١) بەرپرسی حکومی و سەرکردە و کادیر و پێشمەرگە و هاووڵاتییان شەهید کردو ژمارەیەکی تریش بریندار بوون، ئەگەرچی تیرۆریستان ئەو کارە قێزەونەیان بۆ تێکدانی ئاشتی و گیانی لێبوردەیی و خۆشیەکانی جەژن بوو بەڵام خوێنی شەهیدان و قوربانیەکان بوونە هەوێنی زیاتر بەهێزکردنی گیانی پێکەوەژیان و تەبایی و یەکێتی ڕیزەکانی گەلی کوردستان”.
ئاماژەی بەوەشکردووە، ئەمساڵ کە یادی شەهیدان و قوربانییانی ئەو کارەساتە دەکەینەوە لەگەڵ ناردنی دروود بۆ گیانی شەهیدانی کوردستان، گەل و حکومەتی هەرێمی کوردستان لە کاتێکدا شانازی بە ئاسایش و ئارامی کوردستان و خۆڕاگری لە ئاست هەموو کارەسات و قەیرانەکان دەکات و لە هەمانکاتدا جەخت لە یەکخستنی هەوڵەکان دەکەینەوە بۆ بەرەنگاربوونەوەی تیرۆر و تیرۆریزم.
رۆژی یەكی شوباتی ساڵی 2004 لە جەژنی قوربان، ٢٠ ساڵ بەر لە ئێستا، ئەو كاتەی كە خەڵك بە بۆنەی جەژن سەردانی یەكتریان دەكرد و بە لێبوردەیی و گەردن ئازادی پەیوەندییە كۆمەڵایەتییەكانیان بەھێزتر دەكرد ، دوو تیرۆریست لە دوو بارەگای سەرەكی دوو ھێزی سەرەكی كوردستان لە ھەولێر، حەشیمەتی ئەو خەڵكەیان كردە ئامانج كە بۆ پیرۆزباییكردنی جەژن، سەردانی لقی 2 پارتی و مەڵبەندی 3 یەكێتییان كرد و لە لایەن بەرپرسانی ھەردوولا پێشوازییان لێكرا.
ھەردوو تەقینەوەی ھاوكاتی یەكی شوبات لە لایەن دوو تیرۆریستی خۆكوژ ئەنجامدران، بە ھۆیەوە 101 كەس شەھیدبوون، لەوانە چەندین سەركردەو كادیری پارتی و یەكێتی و دەیان پێشمەرگەو خەڵكی سڤیل.
ھێرشەكەی یەكی شوبات لە كاتێكدا بوو كە پرۆسەی یەكگرتنەوەی ھەردوو ئیدارەی ھەرێم دەستیپێكردبوو و پارتی و یەكێتی پاش شەڕی ئازادی عێراق لاپەڕەیەكی نوێیان لە رێكخستنی پەیوەندییەكانیان و ھەروەھا چۆنییەتی بەڕێوەبردنی ھەرێم و مامەڵە لەگەڵ عێراقی نوێ ھەڵدایەوە، ھەر وەك بەرپرسانی ھەردوولا لە چەندین بۆنەی تایبەت بە بیرھێنانەوەی ئەم رووداوە رایانگەیاند بوو ”لە سەروبەندی رێكخستنی ناو ماڵی كورد، ئامانجی ئەم ھێرشە تێكدانی یەكێتی ناو ماڵی كورد بوو، بەڵام ئەم ھێرشە یەكهەڵوێستی و یەكگوتاری كوردی بەھێزتر كرد.
نێچیرڤان بارزانی:
با یادی شەهیدانی یەکی شوبات بكەینە هەوێنی یەكڕیزی و تەبایی و یەكتر قبووڵكردن و كاری پێكەوەیی بۆ خزمەتكردنی باشتری ئێستاو داهاتووی گەل و نیشتمان
وەزارەتی شەهیدان:
قوربانییانی یەکی شوبات بوونە هەوێنی زیاتر بەهێزکردنی گیانی پێکەوەژیان و تەبایی و یەکێتی ڕیزەکانی گەلی کوردستان.
