موڕشید برادۆستی – سیدەكان:
بە مەبەستی تۆمار كردنی كەسایەتی و پێشمەرگە قارەمانەكانی كوردستان، زاری كرمانجی هەر جارە و لە دیداری پێشمەرگەكان، ژیان نامە و یادەوەرییەكانیان تۆمار دەكات و بڵاو دەكاتەوە .
ئەمجارە، لە قەزای سیدەكانی سەر بە ئیدارەی سەربەخۆی سۆران، ئەحمەد بازید قادر ناسراو بە ” كاكۆ “، كە 47 ساڵ بێ دابڕان پێشمەرگەیە بەسەر كرایەوە، ناوبراو ئێستا پلەی عەقیدی هەیە لە یەكەی 432ی هێزی سیدەكان سەر بە فەرماندەی هەڵگۆرد، لە دەستپێكی قسەكانیدا، كاكۆ، باس لە ساتە وەختی بوون بە پێشمەرگایەتی بۆ زاری كرمانجی دەكات و دەڵێت:” لەسەرتای پێشمەرگایەتیمدا لە ساڵی 1977 لەگەڵ مامۆستا حەمید ئەفەندی رەحمەتی چەكی پێشمەرگایەتیم لەشان كرد، ئەوكات كۆمەڵێك مەفرەزەی گەڕۆك هەبوون، وەك مەفرەزەی دكتور عبدوڵڕحمان، عەریف ئەحمەد، مەحموود شێخۆ و زۆری تر..، بەشێك لە مەفەرەزەكان بەشێوەیەكی گشتی لە گۆستەی بوون كە دەكەوێتە سەر سنووری باشوور و باكووری كوردستان، كاری سەرەكی مەفرەزەكانیشمان ئەنجامدانی چالاكی بوو وەك هێرش كردنە سەر بارەگاكانی رژێم، تەقە كردن لە قشڵ و بارەگایان و كۆنتڕۆڵ كردنەوەی شوێنەكان، بە گشتی حەسانەوەی سوپای عێراق و جاشەكانمان تێكدابوو .
كاكۆ، دەڵێت ” تا ساڵی 1981 هەر لە گەڵی گۆستە بووین و لەو ساڵەدا چووینە ئێران دووای یەك ساڵ بەسەرپەرشتی سەرۆك بارزانی هاتینەوە عێراق و لە پشت گوندێكی سەر بە ناحیەی سیدەكان لە شوێنێك نیشتەجێ بووین بە ناوی ” سەربەردووك ” ماوەی چەند مانگێك لەوێ ماینەوە دواتر بارەگای سەرۆك بارزانی چووە ” ماڵە مەلا ” ئەوكات ناویان لێ نا ” ناوچەی پەیمان ” تا ئێستاش واناسراوە .
بە گووتەی خۆی، چەندین جار لەگەڵ سەرۆك بارزانی و ئیدرسی رەحمەتی لە شۆڕشدا بووە و یادەورەی زۆریان بەیەكەوە هەیە، دووپات لەوەدەكاتەوە زۆر جار شەڕەفی ئەوەی پێبەخشراوە بە نوێنەرایەتی ئەوان قسە و نامەكانیانیان بۆ شوێنی مەبەست بردوە .
لە بەردەوامی قسەكانیدا، مام ” كاكۆ” باس لە رۆڵی سەركردەی نەمر ئیدریس بارزانی دەكات و گووتی ” ئیدریس بارزانی لەگەڵ ئەوەی سەركردەیەك بوو بەردەوام لەنێو پێشمەرگە بوو و رۆڵی زۆر باش و كاریگەری هەبوو، چەندین داستانی مەزن بە رابەرایەتی ئەو جێبەجێ كران و سەركەوتنی مەزنیشی تۆمار كرد، دیار ترینیان داستانی هندرێن، لە هەمان كات كەسێكی دیبلۆماسی و سیاسیش بوو، بەردەوام پێشمەرگە ئومێدی پێی هەبوو قسە و ڕەفتارەكانی ئەو لەسەر پێشمەرگە و شۆڕش رەنگدانەوەی تەواوی هەبوو كەسێكی دڵسۆز و میهرەبان بوو، لەهەمان كات یەكێك بوو لە پیاوە زانا و خۆشەویستانی گەلەكەمان هیوای هەموولایەك بوو، ئەو شارەزای لە هەموو بوارەكان هەبوو، مخابن لە تەمەنێكی زوو بە جێی هێشتین.
بەو پێیەی لەگەڵ ئیدریس بارزانی هاوسەنگەر بووە و زۆربەی كات لەگەڵی بووە، كاكۆ یادەوەرەیەك بۆ زاری كرمانجی دەگێڕێتەوە و دەڵێ ” ساڵی 1983 پێشمەرگە بە رابەرایەتی كاك ئیدریس بارزانی لە ناوچەی قەندیل بووین بەسەر چیا دەكەوتین، دووای رۆیشتنێكی زۆر ئیدریسی رەحمەتی ماندوو بوو، لە سەر بەردێك كەمێك حەسایەوە و دانیشت، پێشمەرگە بەردەوام لەسەر چیا بەسەر دەكەوتن، بینی گەنجێك تازە پەیوەندی بە شۆڕش كردوە و هاتۆتە نێو ڕیزەكانی پێشمەرگە بەڵام جلی پێشمەرگەكە كۆن و دڕابوون، ئیدریس بارزانی لێی پرسی، ناوت چیە و بۆچی بەو جلە دڕاوانەت نەگۆڕیوون؟ گەنجە خوێن گەرمەكە ووتی ناوم ” حەمەی حاجیە خەلكی خۆشناوەتی شەقڵاوەم ” پارەم تەنها ئەوەندە هەبوو بە فیشەك و مەغزەنی تفەنگەكەم بدەم و بۆ كورد و كوردستان ئامادەم گیانی خۆم بەخت بكەم و هاتومە شەڕەفی پێشمەرگایەتیم پێ بدرێت، ئیدریسی رەحمەتی هەڵسا سەر پێ و پێشمەرگەكەی لە باوەشی كرد و ماچ كرد، هەر ئەوكات لەپێش چاوی ئێمە قاتی خۆی كە جل و بەرگی كوردی بوو لەبەر كرد و پێشكەشی ئەو پێشمەرگەیەی كرد، ئەو هەڵسوكەوتە و رەفتارەی ئیدریسی هەمیشە لەیاد كاریگەری زۆری لێكردم .
لە درێژەی قسەكانیدا، ئەو پێشمەرگەی شۆڕشی گوڵان دەڵێت ” پێشمەرگایەتی هەمووی یەك ئامانجی هەیە، بەڵام ئەو كات لەگەڵ ئێستا جیاوازی زۆری هەبوو، ئێمە بێ موچە و دوور لە كەس و كار و خواردنێكی باشمان نەبوو، هەمیشە قاچاخ بووین لە حكومەتی عێراق، بە مانگ و ساڵ ماڵ و خێزانی خۆمان نەدەبینی، ئەمەش هەموو دەگەڕێتەوە بۆ ئەو پەروەردەی ماڵی بارزان كە فێری ئێمەی كردبوو، ئامانجێكی گەورەمان لە پێش بوو، خۆشبەختانە لەسەر دەستی سەرۆك بارزانی كوردستانێكی ئارام هاتە دی و خەریكە دەگەین بە هەموو ئاوات و ئامانجەكانمان، بەگشتی پێشمەرگە ئاواتی هاتنە دی كوردستانێكی سەربەخۆیە، ئومێد دەكەم تا لە ژیان ماوم بەچاوی خۆم دەوڵەتی كوردستان ببینم.
كاكۆ، ئاماژەشی بەوەدا:” ساڵی 1988 بارەگای سەرۆك بارزانی لە بن بەردێ شێخا لە ناوچەی خواكوڕك بوو، جەنابی سەرۆك سەرپەرشتی تەواوی سەنگەرەكانی پێشمەرگەی دەكرد، لە نزیكەوە هەموو هێز و سەرلق و مەفرەزەكانی ئەبینی و بەردەوام لە پەیوەندی دابوو، پێشمەرگە لە رێگەی مەفرەزەكان هەمیشە ترسی لە دڵی سوپا و رژێم دروست دەكرد و لە هەموو شارەكانی كوردستان چاڵاكی باشمان هەبوون، تەنها ئەوكات شەڕی جەبهەی لەگەڵ رژێمی عێراق لە خواكوڕك روویدا، هەرچەندە رژێمی عێراق بە تۆپ و تەیارە و راجیمە شەڕی ئێمەی كرد، بەڵام سەركەوتنی گەورەمان بەدەستهێنا و زیانێكی زۆرمان بە سوپای عێراق گەیاند .
ئەحمەد بازید ناسراو بە كاكۆ، ئاشكراشی دەكات:“ خواكوڕك یەكێك بوو لە ناوچە ستراتیژیەكان بۆ پێشمەرگە، ژمارەیەك شاخ و گردی گەورەی هەن كە پێشمەرگەكان توانیان سوود لەو ناوچە شاخاویانە وەربگرن و بە شاخ و چیا پاڵپشتیمان لەخۆمان دەكرد، تا پێشمەرگە بەخۆی ئەوێی چۆڵ نەكرد شۆڕش بەهۆی هێرشكردنە سەر و شەڕ كردن نەشكا، چونكە پێشمەرگە وەك خواكوڕك شاخاوی بوون . لەوێ موسەیتەڕی سەر دوژمن بووین و شوێنێك بوو كە كۆنتڕۆڵ كردنی ئاسان نەبوو، هەرچەندە چەكێكی كەممان لەبەردەست بوو، بەڵام ئیڕادەی بەهێزمان هەبوو بەهۆی شارەزای و ستراتیژی شوێنەكە پێشمەرگە لەوێ گولەی بە بەبێ ئامانج هیچ كات خەرج نەدەكرد،.
گووتیشی:“ داوا لە سەرۆكی حكومەت و سەرۆكی هەرێم دەكەم هەموو هەوڵێك بدەن بۆ باشتر كردنی ژیان و گوزەرانی پێشمەرگە، چونكە هەمیشە بۆ پاراستنی كوردستان گیان فیدایە و لە ئامادەباشیدایە، ئومێدی سەركەوتن و سەربەخۆی بۆ كورد و كوردستان دەخوازم.
