ئەڤین بارزانی
پرسی كشانەوەی هێزەكانی ئەمریكا لە عێراق ماوەیەكە لە بەرنامەی كاردایە، هێزە شیعەكان لە ئێران و گروپە چەكدارەكان بە سەركەوتنێكی گەورە بۆیان دەیبینن و نیشانی گەلی عێراق دەدەن كە توانای ئەوەیان هەیە بەزۆر و هێزی خۆیان و توڕەیی خۆیان وایان كردووە ئەمریكا لە عێراق كشایەوە، بەڵام پەیامی ئەمریكا بۆ حكومەتی عێراق زۆر روونە و بەبێ مەرج لە عێراق ناكشێتەوە و كشانەوەكە لێكەوتەی خۆی دەبێت، یاخود پەیامێكی بەم شێوەیە بۆ عێراق دەنێرێت، دوای ئێمە چی بەسەر عێراقدا دێت و ئەگەر ئێوە جارێكی تر داوای هاوكاری بكەن، دۆخەكە زۆر جیاواز دەبێت.
بەپێی ئەو زانیارییانەی چەند ئاژانسێكی هەواڵی بڵاویان كردۆتەوە” ئەمریكا ئەم پەیامەی بە عێراق داوە كە ئەوان بەم نزیكانە هێزەكانی ناكێشێتەوە و خاڵەكەی تریش ئەوەیە پێویستە ئامادەبێت بۆ هەر ئەگەرێك كەواتە دەبێ ئەمە بزانێت ئەگەر ئەمریكا عێراق بەجێبهێڵێت دۆخەكە زۆر خراپتر دەبێت.
هەروەها بەرپرسانی عێراق زۆر باش دەیانزانی لە دوای ساڵی 2003 تا ئێستا هەموو داهاتی فرۆشتنی نەوتی عێراق دەچووە بانكەكانی ئەمریكا و لەوێشەوە بۆ عێراق، یان بەشێوەیەكی تر نەوتی عێراق بە تەواوی لەژێر كۆنتڕۆڵی ئەمریكادا بوو، ئەگەر ئەمریكا دۆلاری پێویست بۆ عێراق نەنێریت دۆلار دۆخێكی تری بۆ عێراق دروست دەكات كە نە سودان و نە ئێران ناتوانن ئەم دۆخە ڕاست بكەنەوە، یان ئەمریكا كارتی زۆر بەهێزی بەدەستەوەیە و حكومەتی عێراقی لە دۆخێكی زۆر لاوازدا جێهێشتووە.
بەپێچەوانەی هەندێك كەس كە رۆژانە لە هەرێمی كوردستان بانگەشە دەكەن بۆ عێراقی بەهێز، بەڵام لە واقیعدا دۆخەكە زۆر خراپە و كێشەكانی عێراق بەباشی دەزانن، دوای كشانەوەی ئەمریكا، گروپە چەكدارەكان بەتەواوی دەسەڵاتی خۆیان بەسەر حكومەت فەرز دەكەن، پێویستە گوێ لە داواكارییەكانیان بگرن، ئەمە عێراق بەرەو ئایندەیەكی نادیار دەبات و گەلەكەشی هێشتا لە زۆر خزمەتگوزاری بێبەش دەبێت، بە لەبەرچاوگرتنی دۆخی لوبنان و یەمەن و سوریا، عێراق لەوەش خراپتر دەبێت، بۆیە كشانەوەی هێزەكانی ئەمریكا بەرژەوەندی گەلی عێراقی نییە، بەڵكو تەنها بەرژەوەندی گرووپە چەكدارەكانی سەر بە ئێرانی هەیە.
هەڵوێستی سەرۆك بارزانی و سەرۆكی هەرێمی كوردستان نێچیرڤان بارزانی سەبارەت بە كشانەوەی هێزەكانی ئەمریكا، زۆر روونە، سەرۆك بارزانی پاڵپشتی خۆی بۆ دانوستانەكانی نێوان ئەمریكا و حكومەتی سودان دەربڕی بۆ گەیشتن بە رێككەوتن سەبارەت بە هێزەكانی ئەمریكا و هاوپەیمانی نێودەوڵەتی لە عێراق، هەروەها پەیامەكەیان دەرخەری ئەو ڕاستییەیە كە هەرێمی كوردستان زۆر باش دەزانێت ئەنجامی كشانەوەی ئەمریكا لە عێراق كاریگەری خراپی دەبێ لەسەر ئایندەی عێراق، چونكە دۆخەكەی زۆر خراپە، ململانێی گەورە لەنێوان كورد و بەغدا، سوننە و شیعەكاندا هەیە، هیچ نیشانەیەك نییە بۆ گۆڕینی هاوسەنگی سیاسی تەنها لە رووی سەربازییەوە، بەڵكو تا رێككەوتنێكی گشتی لەسەر ئاستی هەر سێ پێكهاتەی عێراق (كوردی، سوننە و شیعە) نەبێت، ئەویش بە چاودێری لایەنێكی نێودەوڵەتییەوە، دۆخەكە خراپتر دەبوو، كشانەوەی هێزەكانی ئەمریكاش عێراق بۆ ئایندەیەكی نادیار دەبات كە شەڕی ناوخۆیی پێشبینیكراوە.
