ئێسماعیل ئیبراهیم
بریتانیا لە ماوەی سەدەی رابردوو وەك میراتگری عێراق رەفتاری كردووە و لە هەموو گۆڕانكارییەكان رۆڵێكی كاریگەری هەبووە، پێگەی بریتانیا لە ئاستی جیهانی لە هەموو بوارەكانەوە تا ئاستی وڵاتێكی زڵهێز حیسابی بۆ كراوەو سەیر دەكرێت و هەر واشە، لە زۆر بوار و هاوكێشەی نێودەوڵەتیش بریتانیا قسەی یەكلاكەرەوەی كردووە، بە تایبەتی مافی ڤیتۆی هەیە لە نەتەوە یەكگرتووە.
لەگەڵ گۆڕانكارییەكانی ناوچەكە و بەتایبەتتریش شەڕی روسیا و ئۆكراینا، بریتانیا دەیەوێت بە هێزتر لە جاران بێتەوە رۆژهەڵاتی ناوەڕاست و لە نێوشیاندا عێراق و بە تایبەتی تر هەرێمی كوردستان.
ئەو نامەیەی سەرۆك وەزیرانی گەورە وڵاتێكی جیهانی، بۆ سەرۆكی حكومەتی هەرێمی كوردستان، لە كاتێكدایە كە هێرشەكانی ئێران بۆ سەر هەرێمی كوردستان بەردەوامە، رەهەند و پەیامەكانی پشت ئەم نامەیەی بۆ رێزدار مەسرور بارزانی نێردراوە، چەندی بۆ نەتەوەی كوردە لە باشووری كوردستان، بە هەمان ئەندازەش بۆ ئێران و چەند لایەنێكی ناو عێراقە، پەیامێك كە شڕۆڤەكەی ئاوایە ( هەر كاتێ كیانی سیاسی هەرێمی كوردستان بكەوێتە بەر مەترسییەكی جددییەوە ئێمەی بریتانیا لە پشتان دەبین و دەتان پارێزین)، بە هەمان ئەندازەش پەیامێكە بۆ ئێران و هەندێ وڵاتی دیكەی ناوچەكە كە ( رێگە بە تێكدانی ئاسایشی هەرێمی كوردستان نادەین و هەر كاتێ كار بگاتە مەترسییە مەزنەكە، ئەوە بریتانیا لە پشت هەرێمەوە دەوەستێت).
هەر چەندە ئەم وڵاتانە رەچاوی بەرژەوەندییەكانی خۆیان دەكەن و لەسەرووی هەموو شتیكەوە دایدەنێن، بەڵام بەرژەوەندی ئێستای بریتانیا و چەند وڵاتی دیكەی زڵهێزی جیهانی، ئەوە دەخوازێت هەرێمی كوردستان لە نێو ئەو گێژاوە پڕ لە ئاڵۆزییەی لە رۆژهەڵاتی ناوەڕاست دەگوزەرێت پارێزارو بێت.
ئەمەش تەنها بۆ بەرژەوەندی ئابووری نییە، بەڵكوو بەرژەوەندی دبلۆماسی و هێشتنەوەی هەژموونی ئەو وڵاتانەیە لە پانتایەكی بەرفراوانی گرنگی جوگرافیایی لە هەموو جیهاندا.
دەشێ ئەم پەیامەی لە بریتانیاوە بۆ كوردستان نێردرا كۆ دەنگی زۆرێك لە وڵاتانی جیهانی لەسەر بێت و بریتانیا گەێنەری بوو بێت.
