وەزیری پەروەردە: بە ئامانج گرتنی خەڵكی مەدەنی هیچ جۆرە ئازایەتی تێدا نییە

زاری كرمانجی – سۆران:

هەفتەی رابردوو، سوپای پاسدارانی ئێران لە رووداوێكی چاوەڕوانەكراودا هێرشی موشەكی كردە سەر هەولێری پایتەختی هەرێمی كوردستان، بەو هۆیەوە چەند هاووڵاتییەكی سڤیل شەهید و بریندار بوون، ئەمەش كاردانەوەی نێوخۆی و نێودەوڵەتی لێكەوتۆتەوە، ئەمڕۆش لە ناوەندەكانی خوێندن بە وەستان و خوێندنی سرودی ئەری رەقیب هێرشەكانی ئێران شەرمەزار كران.
لە وتارێكیدا، د. ئاڵان حەمە سەعید وەزیری پەروەردەی حكوومەتی هەرێمی كوردستان، رایگەیاند:” هەفتەی رابردوو، 15 لەسەر 16ی مانگی رابردوو، كوردستان ڕووبەڕووی هێرشێكی تاوانكارانە و ستەمكارانە بووە لەلایەن سوپای پاسدارانی ئێرانەوە، ئێمە ئەمڕۆ لە ناوەندەكانی خوێندن لە قوتابخانەكانی خۆڕاگری لە قوتابخانەكانی كۆڵنەدان لە قوتابخانەكانی ئیرادەوە سەركۆنە و شەرمەزاری ئەو هێرشە تاوانكار و دڕندانە دەكەینەوە كە كرایە سەر هەرێمی كوردستان و خەڵكی مەدەنی بە ئامانج گرتنی ژیان بەئامانج گرتنی مرۆڤایەتی وخەڵكی مەدەنی بە ئامانجگرتنی پایتەختی ئارامی هیچ جۆرە ئازایەتی تیا نییە .
وەزیری پەروەردەی كوردستان، دووپاتی كردەوە، تاقیكردنەوەی هێز لەسەر خەڵكێك كە مەدەنییەو لە ماڵی خۆی دانیشتووە لەناو هەرێمێكە كە مێژووێكی پڕ لە قوربانی هەیە و بە درێژایی مێژوو ڕووبەڕووی هەڵمەتی تاوانكاری و ستەمكارانە بۆتەوە، هیچ جوامێرەیەكی تێدا نییە، هەرێمی كوردستان پەناگەیەك بۆ پێكەوەژیان هەرێمێك بۆ ئاشتی خوازی ودۆستایەتی هەموو لایەكە ئەوانەی كە هەرێمی كوردستان ئەكەنە ئامانج هیچ بیانویەكی ڕاستەقینە نییە بۆ بە ئامانج گرتنی خەڵكی مەدەنی، لە كاتێكە جەنگ لە شوێنی دیكەیە نەك لە هەرێمی كوردستان وەهەرێمی كوردستانیش بەشێك نەبوو لەو جەنگە وە بەشێكیش نابێ لە دروستكردنی هەڕەشە و مەترسی بۆ هیچ لایەك.
د . ئاڵان حەمە سەعید، ئاماژەشی بەوەدا، وەڵامدانەوە و سەركۆنەكردن و شەرمەزاركردنی ئەو هەڵمەتە كە كرایە سەر هەرێمی كوردستان كە هەڵمەتێكی تاوانكارانە بوو، لەلایەن كۆمەڵگەی نێودەوڵەتی لەلایەن ڕێكخراوە ناوخۆیی و ڕێكخراوە نێو دەوڵەتیەكانەوە گەواهیدەری ئەوەیە كە هەرێمی كوردستان بێ تاوانە و ڕووبەڕووی ئەو تاوانانە بووینەتەوە تاوانی شەهیدكردنی خەڵكی مەدەنی وە هەروەها برینداركردنی خەڵكی مەدەنی، ئەمەش درێژكراوە و بەشێكە لەو مێژووە تاوانكارانەی تەرحەق بەخەڵكی هەرێمی كوردستان و كوردستانیان ئەكرێ، ناوەندەكانی خوێندن ئەم بەیانیە لە هەرێمی كوردستان بە سروودی نیشتمانی ئەی ڕەقیب بە ساتێك وەستان وەڵامێك ئەدەنەوە بۆ هەموو ئەو تاوانانەی دەرحەق بەخەڵكی كوردستان ئەكرێ.
گووتیشی:” پێویستە ئەم جۆرە كارانە، نەوە بە دوای نەوە مە شەرمەزار بكەین وە با هەموو ئەوانە بزانن كە ئەم تاوانانە ئەكەن ئەمانە لە یاد و یادەوەری نەوە بە دوای نەوەی خەڵكی كوردستانە دەمێنێتەوە، هەمیشە هەڵەیەكی ڕەش ئەبن، شەهیدەكانی ئێمەش ڕۆحیان ئاسودەبێ و بە بەرزی لە یادەوەری ئێمە ئەمێننەوە، درود بۆ ڕۆحی پاكی شەهیدان و هیوای شیفا بۆ بریندارەكان دەخوازین”.