ئەمەریكا پشتیوانی خۆی بۆ هەرێمی كوردستان دووپات كردەوە

مەهدی محەممەد – زاری كرمانجی :

ڕاوێژكاری ئاسایشی نیشتمانیی ئەمەریكا، ئیدانەی هێرشە مووشەكییەكەی ئێران دەكات بۆ سەر هەولێری پایتەختی هەرێمی كوردستان و رایده‌گه‌ینێت كە هەرێمی كوردستان هاوبەشێكی بەهێزی ویلایەتە یەكگرتووەكانی ئەمریكایە و بە هەموو شێوەیەك پشتیوانی دەبین.
كونسوڵی ئەمەریكا لە هەرێمی كوردستان، ئەمڕۆ چوارشەممە 17ی كانوونی دووەمی 2024، لە تۆڕی كۆمەڵایەتی فەیسبووك، پەیامی جەیك سولیڤان ڕاوێژكاری ئاسایشی نیشتمانی ئەمەریكا بۆ كوردستان بڵاو كردەوە كە لە داڤۆس لە چوارچێوەی كۆبوونەوەیەك لەگەڵ مەسروور بارزانی سەرۆكی حكومەتی هەرێمی كوردستان ڕاگەیاندبوو.
كونسوڵی ئەمەریكا لە هەرێمی كوردستان نووسیویەتی “ئەمڕۆ لە داڤۆس لە سویسرا جەیك سولیڤان ڕاوێژكاری ئاساییشی نیشتمانیی ئەمریكا لەگەڵ مەسروور بارزانی سەرۆكی ئەنجوومەنی وەزیرانی هەرێمی كوردستان كۆ بووەوە.” دەشڵێت “جەیك سولیڤان بە توندی ئیدانەی هێرشە مووشەكییە بێباكەكانی ڕۆژی پێشتری ئێران بۆ سەر هەولێری پایتەختی هەرێمی كوردستان كرد و سەرەخۆشی دەربڕی بۆ گیانلەدەستدانی تراژیدیی چوار هاووڵاتی مەدەنی كە یەكێكیان منداڵێكی ساوای تەمەن كەمتر لە یەك ساڵ بوو.”
لە درێژەی ڕاگەیاندراوەكەی كونسوڵی ئەمەریكا لە هەرێمی كوردستان هاتووە “سولیڤان و بارزانی گفتوگۆیان كرد دەربارەی گرنگیی دەستپێكردنەوەی هەناردەی نەوت و بەردەوامیدان بە جووڵەی دارایی لە حكومەتی فیدراڵی عێراقەوە بۆ هەرێمی كوردستان لە پێناو پشتیوانیی سەقامگیری و سەرچاوەی بژێوی لە هەرێم.”
ئەوەش دەڵێ “سولیڤان پێزانینی خۆی بۆ هاوبەشیی بەهێزی هەرێم لەگەڵ ویلایەتە یەكگرتووەكانی ئەمریكا دەربڕی و پشتیوانیی ئەمریكای دووپات كردەوە.”