محەمەد جەبەلی ئێدلبی
25 ساڵە لە ئاسمانی درەوشاوەی كوردستان و جیهاندا، كوردستان تیڤی بانگی ئازادی و سەربەستی دەدات، لەلایەك، ئەم كەناڵە ئاوێتەی خەم و خۆشی خەڵك و سەروەرییەكانی گەلی كوردستان بووە، لەلایەكی دیكەشەوە هەواڵ و بەسەرهاتەكانی كوردستانی ئاوێتەی گوندە بچووكەكەی جیهان كردووە و دەنگ و رەنگی كوردانی گەیاندووەتە گشت قوژبنێكی جیهان. رۆژی (17/1/1999) كوردستان تیڤی دەستی بە پەخشی بەرنامەكانی كرد، ئێستا كە 25 ساڵ بەسەر ئەو رووداوە گرنگەدا دەرباز دەبێت، كوردستان تیڤی لە هەڵومەرجێكی سەخت و دژواردا دەستی بە پەخشی بەرنامەكانی كرد، تاكە كەناڵی تەلەفزیۆنی ئاسمانی بوو كە لە مێژووی كورددا، لەناو خاكی كوردستانەوە دەست بە پەخش بكات، هەموو هەواڵ و دۆسیە گەرم و كۆنەكانی كوردستان چاوەڕوانی كەنالێكی لەو شێوەیان دەكرد.
لەكاتی دەستپێكردنی پەخشیدا، چەندین ئاستەنگ رووبەڕووی تەلەفزیۆنەكە بوونەوە، هەزارو یەك لێكدانەوە و حسێب لە پشت هەر جووڵەیەكی كامیراوە هەبوو، چاودێری و سانسۆری دەرەوە لەسەر كەناڵەكە هەبوو و چەندین كێشەو گرفتی دیكەی رووبەڕوو بووەوە، دواجار كوردستان تیڤی بە دڵسۆزی و شارەزایی هەڵسوڕێنەر و خەباتكارانی و بە لێبووردەیی و كۆڵنەدان بەسەر هەموو كێشە و ئاستەنگەكاندا زاڵبوو و بەبیرو پشتگیری ژمارەیەك نووسەر و رۆژنامەنووس و بە پلان و تێڕوانینێكی لۆژیكانە توانی بناغەیەك بۆ راگەیاندنی كوردی دابنێت.
كردنەوەی ktv، جگە لەوەی پێویستییەكی ئەو قۆناغەی راگەیاندنی كوردی بوو كە كوردستانی ئازاد ماوەیەك بوو پێویستی پێی هەبوو و چاوەڕوانی دەكرد، لە هەمان كاتیشدا مانای ئەوەبوو كە ئەم كەناڵە ئاسمانییە بە بەرنامە و تێڕوانینی نوێ و نەخشەی تازەی راگەیاندنی سەردەمیانە هاتووەتە مەیدانەكەوە و رایەڵ و دەنگ و رەنگی كوردستانیان بە گشت پێكهاتە ئایین و نەتەوەكانییەوە بووە. كەناڵەكە هەر لە سەرەتای پەخشییەوە بووە جێگەی ئومێدی كوردستانیان و توانی ئەو میوانە روح سووكە بێت كە كوردانی سەرتاسەری جیهان بە شاشە و سەكۆی خۆیانی بزانن، ئەویش لە رێگەی بابەت و بەرنامە جۆراوجۆر و هەمەجۆرەكانییەوە، كە بەشی هەموو چین و توێژ و پێكهاتەكانی لەخۆ دەگرت، بەرنامەی هونەری و رۆشنبیری و سیاسی و بەرنامەی تایبەتی بۆ منداڵە بێنازەكانی كوردستان بە زمانی شیرینی كوردی پێشكەش كرد.
پەخشی كوردستان تیڤی كردنەوەی لاپەڕەیەكی نوێ و دەستپێكی سەردەمی بوژانەوەی هۆشیاری رۆشنبیری و كولتووری و كۆمەڵایەتی و سیاسی خەڵكی كوردستان بوو. لە سەروبەندی پەخشی كوردستان تیڤیدا ئەستەم بوو تاكی كورد بێتە بەردەم كامیرا و گوزارشت لە بیرو بۆچوون و داواكانی بكات، شەرم و ترس دوو هۆكاری سەرەكی بوون كە وای لە تاكی كورد كردبوو زۆر متمانەی بەخۆ نەبێت و خۆی لە نەتەوەكانی دیكە بەكەمتر بزانێت، كوردستان تیڤی ئەو رێچكە و كولتوورەی تێكشكاندو رووی راستەقینەی كەسایەتی بوێرو لێزانی كوردستانی نیشانی هەموو جیهان دا، كوردانی دەرەوەش شاگەشگە دەبوون كاتێك كۆلانێك و شاخ و دەشتێكی كوردستانیان لە شاشە رەنگینەكەیانەوە دەبینی كە بیرەوەری رۆژانی منداڵی زیندوو دەكردنەوە كە دەیانبینی ناسیاوێكیان لە كەناڵێكی ئاسمانییەوە دەردەكەوێت تووشی شۆك دەبوون.
هەروەها كوردستان تی ڤی سەرەدەری لەگەڵ ئەو هەموو كەیسە ئاڵۆز و كەڵەكەبووانەدا كرد كە بە درێژایی مێژووی كورد لەسەر یەك پەنگیان خواردبووەوەو سەكۆیەك نەبوو تێیدا نمایش بكرێن. چەندین بەرنامەی دۆكیۆمێنتی سەبارەت بەمێژوو و كولتوورو ئایینی پێكهاتە جیاجیاكانی كوردستان، پێشكەشكردووە. پردێكیش بووە لەنێوان داخوازییەكانی خەڵك و حكومەتدا، لە هەر شوێنێك كەموكوڕییەك بەدی كرابێت زوومی كامیرای كوردستان تیڤی ئامادە بووە بۆ گەیاندنی خەمی هاووڵاتیان بە لایەنی بەرپرس و پەیوەندیدار.
لەگەڵ ئەوەشدا كە كەناڵەكە ئۆرگانی پارتی دیموكراتی كوردستانە، بەشێكی گرنگ لە ئەركە نەتەوەییەكانی بەجێ گەیاندووە و بەشێوەیەكی دیبلۆماسیانە داخوازییەكانی میلـلەتەكەمان بە وڵاتانی هەرێمی و جیهان گەیاندووە، هەمیشە بەرژەوەندییە نەتەوەیی و نیشتمانیەكانی خستووەتە پێش بەرژەوەندییەكانی حزبی و داكۆكاری سەرەكی مافی هەموو پێكهاتە و چین و توێژەكانی كوردستانی بووە بەبێ جیاوازی، بووەتە تریبۆنێكی ئازادیش بۆ گوزارشت كردن لە بیروبۆچوونە جیاوازەكان. دۆسیەی جینۆسایدو ئەنفاڵ و كیمیابارانكردنی كوردی و ئەو هەموو نەهامەتیانەی بەسەر كورددا هاتن بە هەموو جیهان ناساند و پەیامی ئاشتی خوازانەی كوردی بە هەموو جیهان گەیاند، هەوڵەكانیشی خستەگەڕ بۆ ئەوەی ئەو چەواشەكارییانە راست بكاتەوە كە بە درێژایی مێژوو بەرانبەر بە نەتەوەكەمان ئەنجام دراوە.
لەلایەكی دیكەشەوە بووەتە پردێكی بەیەكگەیاندنی كوردستانیانی ناوخۆ و دەرەوەی وڵات. سەرچاوەیەكیش بووە بۆ پێگەیاندنی كادیری راگەیاندن، چەندین خولی راگەیاندن لەو دەزگایە بۆ پێگەیاندنی كادری راگەیاندن كراوەتەوە و بە سەدان كادیری راگەیاندنی پێگەیاندووە و بووەتە كەناڵی دایك بۆ كەناڵە ئاسمانییەكانی كوردستان.
خاڵێكی دیكە كە پێویستە ئاماژەی پێ بدەم ئەوەیە كە وەك چۆن كوردستان تیڤی سەركێشی راگەیاندنی كوردی كردووە، زۆرترین خەباتكاری راگەیاندیش لەو رێگەو پێناوەدا گیانی خۆیان بەخت كردووە و زۆرترین شەهیدی راگەیاندكاری كوردی لەناو دەزگاكانی راگەیاندنی كوردیدا هەیە. لەكاتێكدا یادی 25 ساڵەی ئەم بۆنە راگەیاندنە پرشنگدارە دەكەینەوە بە پێویست دەزانم ستایشی ئەرك و كارەكانی كارمەندانی بكەم و هیوای بەرەوپێشەوەچوونی بەردەوام و نوێبوونەوەیان بۆ دەخوازم، بەرەوپێشچوونێك كە لەگەڵ دونیای فرەڕەنگ و سەردەمی خێراییدا گونجاو بێت و پرنسیپەكانی نوێی راگەیاندنی جیهانی پەیڕەو بكات، بۆ ئەوەی كەناڵە رەنگینەكەی كوردان لە ئاستی ئەو هیواو ئاواتە بەرزانەدا بێت كە خەڵكی كوردستان چاوەڕوانی لێ دەكەن و جێگەی هەمیشە لە پێشەنگی راگەیاندنی كوردیدا بمێنێتەوە. ئەمەش ئەركێكی قورسە و كارێكی زیاتری دەوێت و لە ئێستاشدا لە هەوڵی توكمەكردنی كارەكان و دارشتنی پلانی دەیان بەرنامە و كاری جیاوازە لە تی ڤییەكانی دیكە. لە كۆتاییدا سەری رێز و نەوازش بۆ شەهیدان و خەباتكارانی كوردستان تیڤی دادەنەوێنم.
