زاری كرمانجی-سۆران:

ئەمڕۆ یەك شەممە 14ی كانوونی دووەمی 2024، لە شاری بەغدا نێچیرڤان بارزانی، سەرۆكی هەرێمی كوردستان، زنجیرەیەك كۆبوونەوەی لەگەڵ بەرپرسە باڵاكانی حكوومەت و لایەنە سیاسیەكانی عێراق ئەنجامدا.

سەرۆكی هەرێمی كوردستان لەگەڵ سەرۆككۆماری عێراق كۆبووەوە

نێچیرڤان بارزانی، سەرۆكی هەرێمی كوردستان لەگەڵ لەتیف رەشید، سەرۆككۆماری عێراق كۆبووەوە. بەپێی زانیارییەكانی هەڵكەوت عەزیز، پەیامنێری رووداو لە بەغدا، تاوتوێی پرسیی هەمواری یاسای بودجە و پرسەكانی دیكەی پەیوەست بە كورد و دۆخی ئەمنیی عێراقیان كردووە.

لە دووەمین رۆژی سەردانەكەی، لە بەغدا نێچیرڤان بارزانی دەستپێكی كۆبوونەوەكانی لەگەڵ فالح فەییاز، سەرۆكی دەستەی حەشدی شەعبی دەستپێكرد، “دۆخی ئەمنیی و مەترسییەكانی تیرۆر و هێرش و پەلامارەكانی داعش بۆ سەر هێزە چەكدارەكان و هێزە ئەمنییەكانی عێراق و هاووڵاتییان، دوایین پێشهاتەكانی شەڕ و ئاڵۆزییەكان و كاریگەری و لێكەوتەكانی بەسەر ناوچەكەوە، تاوتوێ كران.”

لەسەر بانگهێشتی عەمار حەكیم، سەرۆكی رەوتی حیكمە و برازای “شەهیدی میحراب”، نێچیرڤان بارزانی، سەرۆكی هەرێمی كوردستان لە هەولێری پایتەختی هەرێمی كوردستانەوە سەرلەبەیانی رۆژی شەممە بۆ بەغدای پایتەختی عێراق بەڕێكەوت.

محەممەد باقر موحسین حەكیم تەباتەبائی، كوڕی موحسین ئەلحەكیم، یەكێك لە مەرجەعە باڵاكانی شیعە لە عێراق و دامەزرێنەری ئەنجوومەنی باڵای شۆڕشی ئیسلامی لە عێراق، لە 29ـی ئابی 2003، لەكاتێكدا لە نوێژی هەینی بوو لە نەجەف، لە تەقینەوەیەكدا تیرۆركرا.

سەرۆكی هەرێمی كوردستان لەدوای رێوڕەسمی “شەهیدانی میحراب” دوێنێ 13-01-2024 ژمارەیەك كۆبوونەوەی ئەنجامدا، لە یەكەمین كۆبوونەوەش لەگەڵ محەممەد شیاع سوودانی، سەرۆكوەزیرانی عێراق كۆبووەوە.

دۆخی سیاسی و ئەمنیی عێراق و دوایین پێشهاتەكانی ناوچەكە و پەیوەندییەكانی هەولێر ـ بەغدا تاوتوێ كران. هەردوولا جەختیان لە پاراستنی ئارامی و سەقامگیری و سەروەریی وڵات و دوورگرتنی عێراق لە كێشە و ئاڵۆزییەكانی ناوچەكە كردەوە.

لە تەوەرێكی كۆبوونەوەكەدا گفتوگۆیەكی جیدی دەربارەی هەنگاوەكانی حكومەتی هەرێمی كوردستان و حكومەتی فیدراڵیی عێراق بۆ چارەسەركردنی پرسی بودجە و مووچە و هەناردەكردنەوەی نەوتی هەرێمی كوردستان و بابەتەكانی دیكەی كارگێڕی و دارایی و ئابووری كرا.

نێچیرڤان بارزانی، سەرۆكی هەرێمی كوردستان سەردانی دووەمی بۆ لای محەممەد حەلبووسی، سەرۆكی پارتی تەقەدووم بوو. لە كۆبوونەوەكەدا باسیان لە دۆخی سیاسی و ئەمنیی عێراق، پەیوەندییەكانی هەولێر ـ بەغدا و گفتوگۆی چارەسەركردنی كێشەكانی نێوانیان كرد و تیشكیان خستە سەر هەڕەشە و مەترسییەكانی تیرۆر و دۆخی ناوچەكە بەگشتی. “هەردوولا هاوڕا بوون لەسەر گرنگیی هاریكاریی لایەنە سیاسییەكان بۆ بەرەنگاربوونەوەی ئاڵنگارییەكانی ئێستا و پاراستنی سەقامگیریی سیاسیی وڵات و دوورگرتنی لە لێكەوتەكانی دۆخی ئاڵۆزی ناوچەكە.

نێچیرڤان بارزانی و فالح فەییاز: نابێت عێراق بكەوێتە نێو ئاڵۆزییەكانی ناوچەكەوە

نێچیرڤان بارزانی، سەرۆكی هەرێمی كوردستان و فالح فەییاز، سەرۆكی دەستەی حەشدی شەعبی لە بەغدا كۆبوونەوە و سەرۆكایەتیی هەرێمی كوردستان رایگەیاند، دۆخی ئەمنیی عێراق و هەڕەشە و مەترسییەكانی تیرۆر و چەند پرسێكی دیكە تاوتوێ كران.

سەرۆكایەتیی هەرێمی كوردستان رۆژی یەكشەممە، 14-01-2024، لە راگەیێندراوێكدا دەڵێت، “لە كۆبوونەوەكەدا دۆخی ئەمنیی عێراق و هەڕەشە و مەترسییەكانی تیرۆر و هێرش و پەلامارەكانی داعش بۆ سەر هێزە چەكدارەكان و هێزە ئەمنییەكانی عێراق و هاووڵاتییان، دوایین پێشهاتەكانی شەڕ و ئاڵۆزییەكان و كاریگەری و لێكەوتەكانی بەسەر ناوچەكەوە، تاوتوێ كران.”

بەگوێرەی راگەیێندراوەكە، هەردوولا جەختیان لەوە كردەوە كە دەبێت عێراق نەكەوێتە نێو ئاڵۆزییەكانی نێوچەكەوە و پاراستنی ئارامی و سەقامگیری و بەرژەوەندیی باڵای وڵات، ئەولەویەتی هەمووان بێت.

هەروەها سەرۆكایەتیی هەرێمی كوردستان ئاماژەی بەوەشكردووە، كە سەرۆكی هەرێمی كوردستان و سەرۆكی دەستەی حەشدی شەعبی هاوڕا بوون كە “بەئامانجگرتنی پێشمەرگە و هێرشە درۆنییەكان لەسەر هەرێمی كوردستان، زیان بە ئارامی و سەقامگیریی عێراق و هەرێمی كوردستان دەگەیەنێت.”

نێچیرڤان بارزانی و حەیدەر عەبادی پەیوەندییەكانی هەولێر و بەغدا تاوتوێ دەكەن

بەیانیی ئەمڕۆ 14-01-2024، سەرۆكی هەرێمی كوردستان لەگەڵ سەرۆكی هاوپەیمانیی نەسر لە بەغدا كۆبووەوە و بەپێی راگەیێندراوی سەرۆكایەتیی هەرێمی كوردستان، “دۆخی عێراق و پەیوەندییەكانی هەولێر و بەغدایان تاوتوێ كردووە و هەردوولا هاوڕابوون كە هاووڵاتییان نابێت باجی كێشە سیاسییەكان بدەن.”

سەرۆكایەتیی هەرێمی كوردستان رۆژی 14-01-2024، لەبارەی نێوەڕۆكی كۆبوونەوەی نێچیرڤان بارزانی، سەرۆكی هەرێمی كوردستان و حەیدەر عەبادی، سەرۆكی هاوپەیمانیی نەسر راگەیێنداوێكی بڵاوكردەوە، بە گوێرەی سەرۆكایەتیی هەرێمی كوردستان، هەردوولا داكۆكییان لە پێوستیی پاراستنی عێراق لە لێكەوتەكانی دۆخی ئاڵۆزی ناوچەكە و گرنگیی هاریكاریی لایەنە سیاسییەكان و پێكهاتەكانی عێراق كرد بۆ تێپەڕاندنی ناكۆكییەكان و چارەسەركردنی كێشەكان بە گفتوگۆ و لێكتێگەیشتن.

هەروەها لە راگەیێندراوەكەدا هاتووە، سەرۆكی هەرێمی كوردستان و سەرۆكی هاوپەیمانیی نەسر لەبارەی دۆخی عێراق و پەیوەندییەكانی هەولێر ـ بەغدا بیروڕیان گۆڕییەوە و تیشكیان خستە سەر دوا پێشهاتەكانی ناوچەكە.

هەروەها هەریەك لە نێچیرڤان بارزانی و حەیدەر عەبادی “هاوڕابوون كە نابێت هاووڵاتییان لە ژیان و گوزەر‌انی خۆیان، باجی كێشە سیاسییەكان بدەن.”

سەرۆكایەتیی هەرێمی كوردستان دەڵێت، تاوتوێكردنی مەترسییەكانی تیرۆر و هەڕەشەی داعش لەسەر ئارامی و سەقامگیریی وڵات، تەوەرێكی دیكەی دیدارەكە بوو.

سەرۆكی هەرێمی كوردستان و جێگری سەرۆكی پەرلەمانی عێراق گفتوگۆی كێشەكانی هەولێر و بەغدا دەكەن

لە درێژەی كۆبوونەوەكانیدا سەرۆكی هەرێمی كوردستان لە بەغدا لەگەڵ جێگری سەرۆكی پەرلەمانی عێراقدا كۆبووەوە و باسیان لە دۆخی سیاسی و ئەمنی و رۆڵی سەرۆكایەتیی ئەنجوومەنی نوێنەران لە چارەسەركردنی كێشەكانی عێراق كرد.

رۆژی یەكشەممه، 14-01-2024، سەرۆكایەتیی هەرێمی كوردستان رایگەیاند، نێچیرڤان بارزانی، سەرۆكی هەرێمی كوردستان و موحسین مەندەلاوی، جێگری یەكەمی سەرۆكی ئەنجوومەنی نوێنەرانی عێراق كۆبوونەوە و تاوتوێی كێشەكانی هەولێر و بەغدا و رۆڵی پەرلەمانی عێراق لە چارەسەرەكاندا كرد.

بەگوێرەی راگەیێندراوەكە، هەردوولا جەختیان لەوە كردەوە كه ئارامی و سەقامگیریی عێراق پێكەوە بەستراوەتەوە و تێكچوونی سەقامگیریی هەر بەشێكی عێراق، كاریگەری لەسەر ئارامی و سەقامگیریی تەواوی وڵات هەیە. دەبێت هەمووان لە عێراق كار بكەن بۆ پاراستنی ئارامی و سەقامگیری.

لە كۆبوونەوەكەدا “دۆخی سیاسی و ئەمنی و ڕۆڵی سەرۆكایەتیی ئەنجومەنی نوێنەران لە چارەسەركردنی كێشەكانی وڵاتدا، بەتایبەتی كێشەكانی هەولێر ـ بەغدا و پرۆسەی هەڵبژاردنی سەرۆكی نوێی ئەنجوومەنی نوێنەرانی عێراقیان تاوتوێ كرد.

نێچیرڤان بارزانی و هادی عامری: پێویستە شایستە داراییەكان و مووچەی مووچەخۆرانی هەرێمی كوردستان بدرێت

هەروەها نێچیرڤان بارزانی، سەرۆكی هەرێمی كوردستان لە درێژەی دیدار و كۆبوونەوەكانیدا لەگەڵ هادی عامری، سەرۆكی رێكخراوی بەدر كۆبووەوە، بەگوێرەی راگەیێندراوی سەرۆكایەتیی هەرێمی كوردستان، دۆخی ئەمنی و سیاسیی عێراق و ئاڵۆزییەكانی ناوچەكەیان تاوتوێ كردووە.

سەرۆكایەتیی هەرێمی كوردستان رۆژی یەكشەممە، 14-01-2024، رایگەیاند، نێچیرڤان بارزانی، سەرۆكی هەرێمی كوردستان و هادی عامری، سەرۆكی رێكخراوی بەدر داكۆكییان لە پێویستیی پاراستنی سەقامگیریی عێراق و نەبوونی بە بەشێك لە كێشە و ئاڵۆزییەكانی ناوچەكە كردەوە.

سەرۆكی هەرێمی كوردستان و سەرۆكی رێكخراوی بەدر هاوڕابوون “كە دەبێت ماف و شایستە دارایییەكان و مووچەی مووچەخۆرانی هەرێمی كوردستان بدرێت و ژیان و گوزەرانی هاووڵاتییان پارێزراو بێت.”

هەروەها لە راگەیێندراوەكەدا هاتووە، تاوتوێكردنی كێشەكانی هەولێر ـ بەغدا و گرنگیی چارەسەركردنیان بە گفتوگۆ و ‌لێكگەیشتن، تەوەرێكی دیكەی دیدارەكە بوو.

نێچیرڤان بارزانی و عەممار حەكیم جەخت لە چارەسەركردنی كێشەكانی هەولێر-بەغدا دەكەنەوە

نێچیرڤان بارزانی، سەرۆكی هەرێمی كوردستان لە بەغدا لەگەڵ عەممار حەكیم، سەرۆكی رەوتی حیكمه كۆبووەوە. سەرۆكایەتیی هەرێمی كوردستان دەڵێت، “لەبارەی كێشەكانی هەولێر ـ بەغدا و گرنگیی بەردەوامیی گفتوگۆی نێوانیان بۆ لێكگەیشتن و چارەسەری، بیروڕایان گۆڕییەوە.”

بەگوێرەی راگەیێندراوەكەی سەرۆكایەتیی هەرێمی كوردستان، “هەردوولا هاوڕا بوون كە دەبێ كێشەكان لەسەر بنەمای دەستوور چارەسەر بكرێن و ماف و شایستەی هەموو پێكهاتەكانی عێراق پارێزراو بن، هەروەها هاووڵاتییان بە قووت و گوزەرانی خۆیان، باجی كێشە سیاسییەكان نەدەن.”

وەكو لە راگەیێندراوەكەدا هاتووە، “دەربارەی كێشەكان و دۆخی ئاڵۆزی ناوچەكە، هەردوولا جەختیان لەوە كردە‌وە كە دەبێ بەرژەوەندیی باڵا و پاراستنی ئارامی و سەقامگیریی وڵات بەر لە هەموو شتێك بێ و بە هیچ شێوەیەك عێراق نەبێتە بەشێكی كێشە و ئاڵۆزییەكان.”

دۆخی سیاسیی وڵات و گرنگیی پشتگیری لە بەرنامەی كاری حكومەتی عێراق و سەرخستنی، تەوەرێكی دیكەی دیدارەكە بوو.