محەممەد محموود- سۆران :
لە چوار چێوەی پڕۆژەکانی وەبەرهێنان لە گشت کەرتە جیاوازەکان لە سنووری ئیدارەی سەربەخۆی سۆران چەند پڕۆژەیەک کەوتوونەتە واری جێ بەجێ کردن، بەشێکیشیان لە چاوەڕوانی وەرگرتنی مۆڵەتدان و بەمەش دەرفەتی کار زیاتر کراوەتەوە لە بەردەم هاووڵاتییان.
دلڤان عومەر، بەڕێوەبەری گشتی وەبەرهێنانی سۆران بە زاری کرمانجی راگەیاند” چەند پڕۆژەیەکی وەبەرهێنان لە ساڵی ٢٠٢٣ مۆڵەتی کار کردنیان وەرگرتووەو کەوتنە بواری کارکردن، بەشێکیشیان لە قۆناغەکانی کۆتایی موڵەت پێدانن”.
لە بارەی پڕۆژەی شکۆی زانست ، بەڕێوەبەری گشتی وەبەرهێنانی سۆران ، ئاماژەی بەوەکرد” ئەو پڕۆژەیە کەرتی تایبەت ئەنجامی دەدات و تایبەتە بە کەرتی پەروەردە، پێک دێت لە کۆمەڵگەیەکی گەورەی پەروەردەیی، خۆی دەبینێتەوە لە باخچەی منداڵان ، قوتابخانەی بنەڕەتی ،قوتابخانەی دواناوەندی و ئامادەیی ، چەندین هۆڵی تاقیگەو پشوودانی قوتابییان “
دلڤان عومەر، گوتیشی” ئەو پڕۆژەیە مۆڵەتی کارکردنی وەرگرتووەو لە سەرەتای کار کردندایە، ئەو پڕۆژەیە دەکەوێتە قەزای ناوەندی سۆران و لە چەند رۆژی داهاتوو بەفەرمی بەردی بناغەی دادەندرێت،جگە لەوەی دەستپێکردنی کارەکانی ئەو پڕۆژەیە بۆ چەندین کەس هەلی کار دەرەخسێنێت، بەتەواو بوونیشی دەیان دەرەفەتی کار بۆ دەرچووانی زانکۆ لە پسپۆرییە جیاجیاکان دروست دەبێت.
