درۆن و مووشەک وەک جێگرەوەى مافەدەستورییەکانى کوردستان

رێبوار حەمەلاو شوانى

لاپەرەکانى مێژوو و کردەوەکانى عێراق دەرخەرى ئەو راستییەن کە لەو کاتەوەى کە کورد و کوردستان بە زۆرە ملێ پێوە لکێنراوە ، هەمیشە رووبەڕووى پەڵاماردان و ستەمکارى و وێرانکارى بێ وێنە بۆتەوە کە تەنها لە مێژووى دەستەڵاتە زۆردار و نامرۆڤەکاندا دەبینرێت ، بەڵام هەمیشە گەلى کورد بە ئیرادەیەکى پۆڵاین و باوەربوون بە خاک و نیشتیمان و دۆزە رەواکەى خۆڕاگرانە و بوێرانە پارێزگارى لە ئیرادە و بوونى گرتووە و درێژەى داوە بە خەبات لە پێناو بەدەستهێناوەى مافەرەواکانى .
لە قۆناغى دواى رووخانى رژێمى بەعس لەگەڵ ئەوەى گەلى کورد لە پێناو سرینەوەى رووخسارى قێزەوەنى عێراقى دیکتاتۆرى قوربانیی وهەوڵى زۆرى دا لەگەڵ ئەوانەى کە سەردەمانێک خۆیان بە ستەملێکراو دیکتاتۆرى دەزانى ، بەڵام زۆرى نەخایاند کە دیکتاتۆرێک بووە چەندین دیکتاتۆر و یاسا و دەستوور و هاوبەشى و دیموکراسى و پێکەوەژیان و ماف بوونە ، پەراوێزخستن و تیرۆر و میلیشیا و دڕۆنى بۆمبڕێژکرا و مووشەکى باڵستیک بە فەرمان وکارنامەى وڵاتانى هەرێمى پەڵامارى کورد وکوردستان دەدەن ، لەگەڵ ئەوەشدا بە سیاسەتێکى ستەمکارانە و بەکارهێنانى دادگە و گەمارۆدان و نەناردنى ماف و شایستە دەستوورییەکانى هەرێمى کوردستان کارێکى قێزەوەن و دڕندانە دژى کوردستان جێبەجێ دەکەن و هەروەها لە ڕێگەى بەکارهێنانى هەندێک کەس ولایەنى ناوخۆیی دەستوەردان بۆ تێکدانى ئاسایشى نیشتیمانى و نەتەوەیی و دروستکردنى ئاڵۆزى دەکەن ، بەتایبەتى لەم چوارساڵەى دواییدا زۆرترین کۆسپ و تەگەرەیان لە بەردەم هەنگاوەکانى کابینەى نۆیەمى حکوومەتى کوردستان کە لە هەموو بوارەکانى چاکسازى وئابوورى و ئاشتى کۆمەڵایەتى و ژیانێکى بەختەوەر دروستکرد لە پێناو زیانگەیاند بە قەوارەى هەرێمى کوردستان دەبێت دوژمن و داگیركەرانی كوردستان باش لەو راستییە تێبگەن حوکمڕانی حکومەتی هەرێمی كوردستان و ئیرادەی گەلی كوردستان.زۆر لەوە بەهێزترە بەو کردەوە تیرۆریستییە ترسنۆکانە بترازێت.دوژمنان و خیانەتکارانی کورد هەرگیز ماندوونابن لە كوشتوبڕ کردنی كورد چونکه دەبینن هەموو ئەو بەرەوپێشچوونەی هەرێمی كوردستان لە رابردوو ئێستادا بەدەستی هێناوە، هەروەها ئەو ئاسایش و سەقامگیرییەی هەیەتی، بەهێزیی پێگەكەی لە دیپلۆماسییەتدا، وە لەسەر ئاستی ناوخۆ و دەرەوە نموونەیەكی جوانی ئازادی و پێكەوەژیانی لە حوكمڕانیدا پێشان داوە ،وە وڵاتانی زلهێز بایەخی پێ دەدەن بۆیە چاوی ناحەزان و تێكدەرانی هێندەی تر كوێر كردووە
چونکە حكومەتی كوردستان و بەرهەمی خۆێنی شەهیدان و قەڵاو پشتی كورد لەناوچەكەدا ئەزموونێكی نەتەوەیی گەورەی كوردە و لەدەستێكی بەهێزو خۆڕاگری پڕ لە عەقیدەی كوردایەتی بارزاندایە، خۆڕاگری و بەهێزی مەسرور بارزانی سەرۆكی حكومەتی هەرێمی كوردستان لەم كابینەیەدا بە پاڵپشتی خەڵكی دڵسۆزی كوردستان و پێشمەرگە قارەمانەكان ڕێگای نەدا گەمارۆو بڕینی بودجە و دروستكردنی كێشە بۆ موچەخۆران و كۆرۆنا و دابەزینی بەهای نەوت و وشكەساڵی و دەیان رووداوو كارەساتی دیكە رێگر بێت لەبەردەم پاراستنی سەلامەتی گیانی خەڵكی كوردستان و درز بخرێتە نێو ئەو سەقامگیری و ئارامییەی كە باڵی بەسەر هەرێمی كوردستاندا كێشاوە. هەر ئەوەشە کە نەیاران و دوژمنانی ئەم نیشتیمانە لە نانەوەی كێشە و گرفت بۆ ئەم كابینەیە بێ ئومێدو هیوا بووبن، بۆیە دەیانەوێت ئەمجارە لە رێگەی درۆن و موشەكەوە هێرشەكانیان چڕتر بكەنەوە دژ بە ئەزموونی هەرێمی كوردستان و زیان زیاتر بە ئابووری و قووتی خەڵكی بگەیەنن هەروەكو چۆن لەگەرمەی یادەكانی سەری ساڵ و جەژن و خۆشی میللەتی كورد و هاتنی دەیان هەزار گەشتیار ئەوان بەهەوڵە لەرزۆكەكانیان بەدرۆن هێرشیان كردە سەر دوو سەرچاوەی گرنگی نەتەوەیی كە خۆی لە هێزەكانی پێشمەرگەی كوردستان و فرۆكەخانەی نێودەوڵەتی هەولێر دەبینیەوە ، تاوەكو زیان بە سەقامگیری سیاسی و سەربازی و ئابووری بگەیەنن . دەبێ نەیاران و بەکرێگیراوەکانیان پەند لەمێژو وەڕبگرن لەو کردەوە لاوازو ترۆسناکانەیان بەرامبەر بە گەلی کورد دەکەن ، خۆ درۆن كاریگەرتر نییە لە ئەنفال و زیندەبەچاڵ و کۆمەڵکوژی و كیمیاباران ، لە بەرامبەر ئەوەشدا دوژمن كەوتە ژێر خاك و كورد سەركەوت، ئەم وانەیە و ئەم پەیامەم بۆ هەموو دوژمنان و خیانەت کاران و داگیركەرانە وە زۆر روونە بۆ ئەوەی فێربن و دەرسی لێ وەرگرن ؛ هەموو ئەم پەڵامارە موشەكی و درۆنییە جارێكی دیكە ئەو پرسیارەی هێنایەوە پێشەوە ؛ ئایا عێراق دەوڵەتێكی مەدەنی و دەستووری و یاساییە و هەموو پێكهاتەكانی كورد و سوننە و شیعە و كریستیان و ئاین و ئاینزاكانی دیكەی جێگا دەبێتەوە؟ بێگومان وەڵامەكە بەنەخێر دەبێت؛ چونكە هەرگیز وڵاتێك و گروپێكی خۆسەپێن گەمارۆ و شەڕی ئابووری و ئابڵوقەو بڕینی بودجە و مووچەخۆرانی كردبێتە كارتێكی گوشار ناتوانێت لە ئیدعای یەكپارچەیی خاك و رەوایی حوكمڕانی سەركەوتوو بێت ، عێراقێك کە بەدرێژایی مێژوو هەمیشە کارى لەسەر كۆمەڵكوژی و لەناوبردنی گوندو ئازاردانی گەلى کورد دابێ و بەئەمڕۆشەوە ئامادەیی لێبووردن و قەرەبووكردنەوەی کەسوکارى ئەنفالکراوان و كیمیابارانکراوەکان و تێكدانی گوندەكان و بێسەروشوێنكردنی لاوانى کورد نەبێت، ئیتر چۆن دەستبەرداری خۆسەپاندن و ئەم میراتییەی دژە كورد دەبێتەوە ، ئەوەتا حكومەتی هەرێمی كوردستان نەوتی رادەست كرد و داهاتی ناوخۆ و لیستی موچەخۆرانی پێشكەشكردن و بە شاهیدی دیوانی چاودێری فیدراڵ پابەندییەكانی جێبەجێ كرد، كەچی گروپێكی خۆسەپێن و مەزهەبی فاشیزمى توند لەسەر قەوانەكەی خۆیان بەردەوامن و هەرجارەی گرفت و ئاستەنگێك بۆ ئاسایبوونەوەی دۆخەكە دروست دەكەن ، كاتی ئەوە هاتووە كورد لە كۆمەڵگەی نێودەوڵەتی و لەلای ئەمەریكا و هاوپەیمانەكانی سنوورێك بۆ پێشێلكردنی سەرپێچی و كردەوەى میلیشیا تیرۆرستییەكان دابنێت ، بۆیە ئیتر کاتى ئەوە هاتووە کە پرسى کورد و مافەرەوا دەستووریەکانى نەک لە عێراق بەڵکو لە سەر ئاستى نێودەوڵەتیی یەکڵابکرێتەوە، چونکە سنووربەزاندن و ستەمکارییەکانى ئەو عێراقى میلیشیایی بە فەرمانى دەرەکى دژ بە کوردوکوردستان گەیشتوونەتە لووتکە و هیچ پاساوێکیش هەڵناگرێت ، بە ئاسانى هەموو ماف و شایستەداراییەکانى کوردستانیان بڕیووە و خەون ومەرامى سەرەکییان شکاندنى ئیرادە و تێکدانى قەوارەى هەرێمى کوردستانە کە ئەمڕۆ وەک دوورگەکى ئاڕام و سەقامگیرە نەک بۆ هەموو کوردێک بەڵکو بۆ هەموو پێکهاتە و ئایین و ئایینزاکانى نێویدا ، ناکرێت چیتر لە جیاتى وەڕگرتنى ماف و شایستەداراییەکانى کوردستان چاوەروانى دڕۆن ومووشەکى بەغداى ژێر کۆنتڕۆڵى میلیشیاتیرۆریستەکانى تاران بکەین . بۆیە، دەبێ حكوومه‌تی عێراقی فیدراڵ و کۆمەڵگای نێودەوڵەتی كارى ڕژد له‌سه‌ر ئه‌و ده‌ستدرێژی و پەڵاماردانانە بكه‌ن و هه‌وڵه‌كانی خۆیان چڕ بكه‌نه‌وه‌ بۆئه‌وه‌ی چیتر ڕێگه‌ نه‌درێت ده‌ستدرێژی بكرێته‌ سه‌ر سه‌ره‌وه‌ریى خاکی پیرۆزی کوردستان و ئاسایش و ئارامییەکەى.