حكومەتی هەرێم لە ئاست ئەو دەست درێژیانە چی بكات؟

ئیسماعیل ئیبراهیم
چەندین ساڵە هێزە سەربازییەكان توركیا و ئێرانی داگیركەر لە ناو خاكی هەرێمی كوردستان بە هەموو جۆرە چەكێك و كاری تیرۆرستی چ لە شاخ یا لە ناو شارەكان كوردانی رۆژهەڵات و باكوور دەكەنە ئامانج، لە لایەكی دیكەشەوە حكومەتی ناوەندی بەغدای بە ناو فیدڕاڵی بەردەوامە لە هەر جۆرە دژایەتییەكی هەرێم كە بۆی بڵوێت.
بە دڵنیاییەوە هیچ حزبێكی باشوور، بەدەستەڵاتیشەوە بەو رەفتارە قێزەوونانەی ئەم وڵاتانە ئاسوودە نیین، بەپێچەوانەوە زۆریش دڵگرانن.
مامەلە كردن لەگەڵ ئەو رەفتارانەی ئەم وڵاتانە كارێكی ئاسان نییە و ژیرییەكی سیاسی زۆری دەوێت، لەبەر ئەوەی نە لە رووی ئابوورییەوە نە سەربازییەوە باشوور لە دۆخێكدا نییە لەگەڵ ئەم وەڵاتانە بچێتە گۆڕەپانی شەڕەوە، ئەم وەڵاتانەش بەدوای هەڵوێست یا كاردانەوەیەكی حكومەتی هەرێم دەگەرێن تا بیكەنە بیانووی پەلاماردان و نەهێشتنی ئەم كیانە، كە تا هیوای كوردانی جیهانە. ئەگەر وەڵاتانی جیهانی لە هەولێر نەبوونایە و كیانی سیاسی رەهەندێكی یاسایی و جیهانی وەرنەگرتبایە، بێ گومان دەمێك بوو وەك 16 ئوكتەبەر هێرشیان دەكرد سەر هەولێر و تا سەر سنوورەكان نەدەوەستان.
هەندێك قەڵەم بەدەست ناهۆشیار و رەنگە قین لەدڵ لە ئاست هەندێك لە حزبەكانی باشوور و زۆر بە تایبەتیش پارتی، دەیانەوێت پارتی و حكومەت بە پێی دونیا بینینی ئەوان بچێتە ناو شەڕێكی وێرانكەر و خۆ كووژییەوە، ئەوانە ئێستا دەنەی دەستەڵات دەدەن بۆ شەڕ و هەڵوێستی توند كە جگە لە ناهۆشیاری سیاسی لە دۆخی ئێستای ناوچەكە، دەیانەوێت وەك هەموو جار رەخنە لە پارتی و حكومەت بگرن، ئەگەریش پارتی و حكومەت لەم ئاڵۆزیانە بگڵێن هەر ئەو قەڵەمانەن دیسان رەخنە دەگرنەوە كە بۆچی تەداخۆڵی ئەم شەڕەیان كرد و نەتەوەی كوردیان لە باشوور بەرەو جەنگێك برد كە سەركەوتنی تێدا نییە.
بێ خەبەرن لەوەی حكومەت لە رێگەی كەناڵەكانی خۆی لە ئاستی جیهانی ئەوەی دەكەوێتە سەر شانی دەیانكات و كردوویەتی.
وڵاتێكی زلهێزی وەك ئەمریكا، كەنەدا، فەرنسا و رێكخراوی مافی مرۆڤی جیهانی و چەند وەڵاتی دیكە تەنها ئیدانەی رەفتارەكانی وەڵاتانی داگیركەری كوردستانیان كردووە، واتە زەمینەی دەستوەردانی مەیدانی و راستەوخۆ ناهاتووتە كایەوە، رەنگە پەیوەندی بەوە هەبێت هێشتا كاتی نییە، بۆیە ناشێ حكومەتی هەرێم بە عەقڵێكی كورت بینی هەندێك نووسەر كە مەرامی سیاسی و رقی لەپشتە سەرەدەری لەگەڵ ئەم دۆخە بكات و تاكە قەڵای كوردان لە هەموو جیهان بخاتە بەردەم دۆخێكی مەترسییداری زۆر جددی.