مەهدی محەممەد – زاری كرمانجی :
هەردوو دوورگەی (یونبیۆنگ و بانگیوندۆ) ی كۆریای باشوور، لەلایەن تۆپخانەكانی كۆریای باكوور بۆردوومان كران و حكومەتی كۆریای باشوور هۆشداری بە هاووڵاتییانی دەدات .
ئەمڕۆ هەینی 5ی كانوونی دووەمی 2024، كۆریای باكوور بە 200 گوللە تۆپ هەر دوو دوورگەی (یونبیۆنگ و بانگیوندۆ) ی كۆریای باشووری بۆردوومان كرد و حكومەتی كۆریای باشوور داوا لە دانیشتووانی ئەو دوو دوورگەیە دەكات بە درێژایی 10 كم ناوچەكە چۆڵ بكەن.
ماوەیەك بەر لە ئێستا وەزارەتی بەرگریی كۆریای باشوور لە ڕاگەیاندراوێكدا بۆردوومانكردنی خاكی وڵاتەكەی لەلایەن كۆریای باكوور پشتڕاست كردەوە و هێرشەكەی بە ڕەفتارێكی شەڕانگێزانە ناو برد و ڕاگەیاند حكومەت بە مەبەستی پاراستنی گیانی هاووڵاتییانی داوای كردووە بە درێژایی 10 كیلۆمەتر هاووڵاتییان لە ناوچە سنوورییەكان دوور بكەنەوە.
كۆریای باكوور دوێنێ پێنجشەممە ئیدانەی ئەو مانۆڕە سەربازییەی كرد كە كۆریای باشوور لە ساڵی نوێ ئەنجامیدا و چەند ڕۆژێك بەر لە بۆردوومانە كیم جۆنگ ئون، ڕێبەری كۆریای باكوور سەردانی شوێنی تایبەت بە دروستكردنی مووشەكی بالیستی كیشوەربڕی كردووە و داوای لە هێزەكانی كردبوو ئامادەكاریی تەواو بكەن بۆ ڕووبەڕووبوونەوەی دوژمنان، بۆیە چاودێرانی سیاسی لە ناوچەكە پێشبینی بۆردوومانێكی لەم شێوەیان كردبوو، چونكە كۆریای باكوور ساڵی 2010 بەهەمان شێوە لە ڕێگەی 170 گوللە تۆپەوە هەمان دوورگەكانی كۆریای باشووری بۆردوومان كرد و ئەو كات ڕاگەیاند ئەمە تەنیا پەیامێك بوو.
لە ئێستادا پەیوەندییەكانی نێوان هەردوو كۆریای باكوور و باشوور لە خراپترین ئاستیدایە.
