پشتیوان كەریم – زاری كرمانجی :
ماوەی چەند ڕۆژێكە نرخی نەوت لە بازاڕەكانی ئیدارەی سۆران ڕووی لە دابەزین كردووە، فرۆشیارێكی نەوت لە سەنتەری قەزای ناوەندی سۆران لەبارەی دابەزینی بەهای نەوت هۆكارەكەی بۆ زاری كرمانجی ئاشكرا دەكات و دەڵێت “ئەمڕۆ چوارشەممە، نرخی نەوتی سپی لە بازاڕەكانی نەوت فرۆشاندا بە بەراورد بە هەفتەی ڕابردوو بڕی دە هەزار دینار دابەزیوە.”
مەغدید ئۆمەراوەی نەوت فرۆش، ئەوەشی خستە ڕوو “لە ئێستادا نرخی یەك بەرمیل نەوتی بەسڕە لە 160,000 هەزار دینارەوە دابەزیوە بۆ 150,000 هەزار دینار و یەك بەرمیل نەوتی مووسڵ لە 155,000 دینارەوە بووە بە 145,000 هەزار دینار، بۆ هەر لیترێك نەوتی سپی لە 800 دینار دابەزیوە بۆ 680 دینار، بەمەش هەر بەرمیلێك بڕی دە هەزار دینار ڕووی لە دابەزین كردووە .
مەغدید ئۆمەراوەی، هۆكاری دابەزینی نەوتی ئاشكرا كردو ڕاگەیاند “حكومەتی هەرێمی كوردستان دەستپێشخەرییەكی باشی كرد كە بە زوو نەوتی سپی بەسەر هاووڵاتییان دابەش كرد، هاوكات بڕیارە لە ناوەڕاستی ئەم مانگە لەلایەن حكومەتی ناوەندییەوە نەوت بۆ هەرێمی كوردستان بێت و دابەشی سەر بریكارەكان بكرێت بەنرخی 50,000 هەزار دینار، ئەمەش وای كردووە نرخی نەوت زیاتر داببەزێت، هەروەها پێشبینی داكەتنی زیاتری بەهای نەوتی سپیش دەكرێت لە بازاڕ دا.”
