چراخان ئەحمەد ـ رواندز:
یەكەمین جارە لە مێژوودا یانەی رواندز بەشداری دەكات لە خولی یانە پلە یەكەكانی كوردستان، لە پاڵ شازدە یانەی تر كێبڕكێ دەكات، لە ئێستادا ئەم یانەیە سەرقاڵی مەشق و راهێنانەكانیەتی دەیانەوێت ئەنجامێكی باش لە خولەكە بەدەست بهێنن و یانەكە بگەیەنن لوتكە لەسەر ئاستی هەرێمی كوردستان.
یانەی رواندز بەهاوەڵی یانەی هەڵۆ نوێنەرایەتی ئیدارەی سەربەخۆی سۆران دەكەن لەخولی یانە پلە یەكەكانی كوردستان.
سەرهەد سەلام، سەرۆك و سەرپەرشتیاری تیپی تۆپی پێ یانەی رواندز، لە میانەی دیدارێكی بۆ زاری كرمانجی دەربارەی ئامادەسازییەكانی یانەكەی بۆ خولی یانە پلەیەكەمەكانی كوردستان دەڵێت: “ماوەی چەند رۆژێكە یاریزانەكانمان هاتوونەتە ناو یاریگە و لەلایەن ستافی راهێنەرانەوە بەباشترین شێوە مەشقیان پێ دەدرێت و ئامادەدەكرێن بۆ چونە نێو ركابەرییەكان”.
گوتیشی:” ئامانجی ئێمە تەنها بەشداری كردن نیە، بەڵكو كار لەسەر توانای لاوان دەكەین بۆ ئەوەی لەساڵانی ئایندە 90% ـی پێكهاتەی سەرەكی یانەكەمان یاریزانی خۆماڵی بـن.”
لەسەر بنەمای ئەزموون و لێهاتوویی راهێنەری یانەكەمان هەڵدەبژاردووە
ئەو دەڵێت:” ستافی راهێنەرانمان پێشتر چەندین كاری جوان و نایابیان كردووە ژمارەیەك یاریزانی باشیان پێگەیاندووە، ئەم ستافەی ئێستا بەشێوەیەكی ئەكادیمی كار لەسەر تیمەكەیان دەكەن و بەشێوەی زانستی رێنمایی بەیاریزانەكان دەدەن.”
یاریگەی یانەكە بۆ وەرزی ئەمساڵ دیاردەكات.
سەرهەد هێمای بۆئەوەكرد:” بەهۆی نۆژەنكردنەوەی یاریگەی “بانەزێوك” یارییەكانی ئەم وەرزەمان لە یاریگەی “گەردەگەرد” ئەنجام دەدرێن. یاریگەی بانەزێوك ساڵی 2007 دەست كرا بە دروستكردنی، بەڵام دواتر بەنیوەچڕی جێهێڵدرا بەهۆی لەئێستادا لەلایەن سەرپەرشتیاری ئیدارەی سەربەخۆی سۆران كاك هەڵگورد ـەوە بڕیاری تەواوكردنی یاریگەكە دراوە، نۆژەنكردنەوەی بەشێوەیەكی تەواو جیاواز دەبێت چیمەنی سروشتی لێ دەچێندرێت.”
سەبارەت بە پێكھاتەی یانەكەی كە ئایا هیچ یاریزانێكی وەرزی رابردوو یانەكەی جێهێشتووە سەرۆكی یانەی رواندز، روونكردنەوە دەدات: “وەرزی رابردوو لە قۆناخی تەواوی پێكهاتەكەمان یاریزانانی نێوەخۆی سۆران و دەورووبەری بوون، بەڵام لە قۆناخی دووەم ركابەرییەكە بەهێزتر بوو لە توانای یانەكەی ئێمە دانەبوو بۆیە چەند یاریزانێكمان لەدەرەوەی سۆران هێنا، لەئێستادا ئەو یاریزانانە پەیوەستن بە یانەكانی خۆیانەوە.”
“چەند گرێبەستێكی گرنگ رادەگیێنین”
لەپەراوێزی ئاخاوتنەكانیدا سەرپەرشتیاری تیپی تۆپی پێی یانەی رواندز رایگەیاند:” لەچەند رۆژی داهاتوو كۆمەڵێك گرێبەستی گەورە ئاشكرا دەكەین، كە هەوادارانی وەرزشی دەڤەرەكە شۆك دەكات.”
درێژەی پێدا،” وەرزی رابردوو تیپی لاوانی یانەكەمان سەرپەرشتی كرد بۆ بەشداریكردن لەركابەری خولی نایاب و لەوێ كۆمەڵێك لاوێكی دەڤەرەكە درەوشانەوە ئەمساڵ 5 یاریزان لەتیپی یەكەم یاریی دەكەن. بەردەوام دەبین لە هاوكاری و پاڵپشتی تیپی لاوان، لەپێناو ئەوەی لەساڵانی ئایندە رێژەی یاریزانە خۆماڵییەكان لەتیپی یەكەمی یانەكە زیاتر بكەن.
ئاشكراشی كرد،” لەپلانماندایە بۆ دوو وەرزی داهاتوو رێژەی 80% ـی تیپی تۆپی پێی یانەكە لەیاریزانانی رواندز و دەوروبەری بێت، دەمانەوێ بەیاریزانی خۆماڵییەوە كێبڕكێی زلهێزەكانی كوردستان بكەین.”
سەرۆكە گەنجەكە نیشانی ئەوەشی كرد:” بۆ ئەوەی بتوانین زیاتر پەرە بە یانەكەمان بدەین، پێویستمان بە قوتابخانە و شوێنی ئەكادیمی هەیە بۆ دروست كردنی یاریزانی لێهاتوو، بە خۆشحاڵییەوە خاوەن ئەكادیمیایەكی پێشكەوتووین لە رواندز، ستافەكەمان بەشێوەیەكی جیدی و رێك و پێك كارەكانیان بەرێوە دەبەن زیاتر لە 100 بەهرەمەند لە ئەكادیمیاكەمان رۆژانە مەشق و راهێنانی نوێ وەرەگرن. دەمانەوێ ساڵانە بەشداری بكەن لە چالاكی ئەكادیما و خولی لاوان، چونكە دەمانەوێت سەدا سەدی یاریزانەكانی یانەی رواندز یاریزانی خۆجێی خۆمان بێت.
سەرپەرشتیاری یانەی رواندز ئەوەشی گوت سەرەتای دەست بەكار بوونمان لەگەڵ ئەو ستافەی راهێنەرایەتی یانەكەمان دەكەن، بڕیارمان لەسەر ئەوە داوە كە پێكهاتەیەكی تۆكمە ئامادە بكەین، تاوەكو بتوانین ركابەرایەتی سەرجەم یانەكانی تر بكەین لە یاریگا.”
لەدوا گوتەكانیدا داوای هاوكاری لە خەڵكی دەڤەرەكەی دەكات: ” داواكارم لە لایەنەكان یاخود هەر كەسێكی دەسترۆیشتوو، كە وەك هاوكارییەك بتوانێت ھاوكاری یانەكەمان بكات، لەرووی داراییەوە بارودۆخی یانەكەمان باش نییە و قەرزی ساڵی پارمان هێشتا لەسەر ماوە. ئامانجی دوور و تیژمان هەن، لەوانە بەشداری بكەین لە كێبركێی خولی عێراق، بەڵام بە هۆی نەبوونی سەرچاوەی دارایی هەنگاوەكانمان سست بوونە.”
