دلۆڤان شێروانی
ئۆپۆزیسیۆن بریتییە لەو چینە بەرهەڵستكارەی كە لە دژی سیستەمی بەڕێوەبردنی وڵاتە لەلایەن دەسەڵاتدارانی حكومەت، پێیان وایە لە كاتی هاتنیان بۆ دەسەڵات ئەوان كێشە و گەندەڵییەكان بنبڕ دەكەن.
خۆی لە بنەڕەتدا بوونی ئۆپۆزیسیۆنێكی تەندروست و شارستانیەت، كارێكی باشە و چاودێرێكی گرنگە بەسەر كاروبارەكانی حكومەتەوە، هەروەها فاكتەرێكی بەهێزە بۆ ئەوەی چینی دەسەڵات خۆی لە هەندێك هەڵە بە دوور بخات.
لە زۆربەی وڵاتانی جیهان ئۆپۆزیسیۆن بەشداری ناكات لە هەڵبژاردنەكان و هیچ ئەندامێكیان وجوودیان نابێت لە پێكهێنانی حكومەت؛ ئەوەش وەك جۆرێك لە هەڵوێستی ناڕازییان بەرامبەر بەو پارتانەی كە دەسەڵاتدارن و لە حكومەتدان.
هەبوون و هاتنە پێشی كێشە لە سیستەمی دیموكراسی و سیاسەتدا شتێكی ئاسایییە و زۆربەی وڵاتانی جیهان كە پرۆسەی هەڵبژاردن و دیموكراسی تێیدا بەرقەرارە ئەم ئاستەنگان و ئاڵنگارییانە دێنە پێش.
بەڵام كێشەی هەرە گەورە بۆ خەڵك و حكومەت لەوەدایە كاتێك خەڵكانێكی بەرژەوەندیخواز كە لە سەنگەر و كەمیندان بەناوی “ئۆپۆزیسیۆن”ەوە و دێن كێشە بۆ حزبە سیاسییەكان و حكومەت دروست دەكەن، لە لایەكی ترەوە تۆی ناكۆكی و دووبەرەكی و پڕوپاگەندەی ژەهراوی بە مەبەست لەناو كۆمەڵگادا بڵاو دەكەنەوە !
ئەمەی چەند ڕۆژێك لەمەوبەر لە كەركووك ڕوویدا هیچ كەمتر نەبوو لە خیانەتە شوومەكەی 16 ی ئۆكتۆبەر، كە ئەویش لەدەستدانی ڕێژەیەكی زۆری دەنگی چەندین دەنگدەری خەڵكی كوردی ئەو ناوچەیە بوو، كە بێگومان هەموو ئەمانەش بەهۆی سیاسەتە شكست خواردووەكەی حزبی بەناو ئۆپۆزیسیۆنی (نەوەی نوێ)وە هاتە كایەوە.
ئاشكرایە كە لە ماوەی ساڵانی ڕابردوو زۆر حزب و لایەن و بەرەی جیاجیا لە كوردستان بوونیان هەبووە و ویستوویانە بە شێوازێكی ئۆپۆزیسیۆن ئاسا لە مەیدانی سیاسی وڵاتدا ڕۆڵ بگێڕن، بەڵام بەداخەوە هیچ كام لە مانە نەیان توانیوە وەك ئۆپۆزیسیۆنێكی ساغلەم ڕۆڵ بگێڕن و بە شێوازێكی ستراتیژی و دیموكراسییانە ڕەخنە لە كاروبارەكانی حكومەت و حزبە سیاسییەكانی ناو حكومەت بگرن، بەڵكوو هەمیشە خەڵكیان هانداوە بۆ ئاژاوەگێڕی و بەرژەوەندی تایبەتی خۆیان.
كەواتە لە كۆتاییدا دەتوانین بڵێین: ئەو ئۆپۆزیسیۆنەی ئێستا لە هەرێمی كوردستان بوونی هەیە، زیاتر بەڵایەكە بۆ خەڵك وەك لەوەی چاودێرێك بێت بەسەر حكومەت.
