دكتۆر یوسف دۆسكی
بەداخەوە زۆربەی هەوڵەكانی حكومەت لەم بوارە گرنگەنەدا تەنها لە قاڵبێكی تیئوریدا قەتیس دەمێنتەوە، زۆربەی لەبەر ئەوەیە ستراتیژییەتی كارەكانیان بۆ رازی كردنی ڕای گشتییە لە سۆشیال میدیا و سەرنج راكێشان و چەپلەی ئەم پۆپۆلیزمە نەخۆشەیە كە خەریكە كۆمەڵگەكەمان لە واقیعی ڕاستەقینەی ژیان دوور دەخاتەوە.
دواجار هەنگاوەكانی دەزگاكانی میری و بەڕێوەبرن تەنها لە دەرهێنانێكی شانۆگەڕایانە دەچێت كە بۆپەخشكردنی سەر مۆنیتۆری ئامرازە ئەكیكترۆنییەكانی دەستی هاوڵاتیانمان بەرگەم هاتوون وە هەنگاو ناهاوێژێت بۆ حاڵەتی پراكتیكی ناو ژیانی واقیعیدا. بۆ ئازیزانمان لە كەرتە جیاوازەكانی حكومی لە ئیدارەی سەربەخۆی سوارن چەند تێبیینیێك دەخەمە ڕوو:
١. ئەم ئازیزانەی كە لە كاری ئاگركۆژێنەوەو ڕزگاری كردنی ژیان و گیانی هاونیشتیمانییەكان خزمەت دەكەن تا چەند لە ڕووی توانای جەستەیی و وەرزشی خویان ئامادە كردووە؟ هەفتانە بە بەردەوامی چەند كاتژمێر وەرزش دەكەن؟ كەڵوپەل و جڵی كارەكانیان تا چەند بەردەستن وە لە كاتی تەنگانە و لێدانی زەنگی مەترسی چەند چركە ئامادە دەبن؟ ئایا ڕۆژانە كەڵوپەلەكانیان دەپشكنن و دڵنیان لە كاركردنیان لە كاتی تەنگانە؟
٢. ستافی پزیشكی و تەندروستی تا چەند كەڵ و پەلی پێوست پزیشكیان بەردەستە و هەفتانە پشكنین بۆ ئۆكسیجن و مەوادە زەرۆرەكان دەكەن؟ ناوەكانی پزیشك و ستافی ئێشكگری تیمی وەڵامدانەوی خێرا لە كوێ دەنووسڕێت و چەندە بەردەستن و بەرپرسیار؟
٣. هێزی ئەمنی تا چەند قەرەبالغ و خەلكی ناپێویست لە جۆگرافیای شوێنی كارەساتەكان و نەخۆشخانەكان و گب عدلی و… دوور دەخاتەوە؟ ئایا بە دانانی پەرژێن و نیشانەكانی پەیوەست بەم كارەو هەروەها دەركردنی فرمانی جدی و ڕاستەوخو سەربازی شوێن بۆ كاری تیمەكانی ڕزگاركەر و پزیشكی چۆڵ دەكەن؟ یان ژمارەیەكی زۆر لە هاونیشتیمانیان بە واسیتە و مەحسوبییەت خۆیان لە شوێنی كارەساتەكان و دەورووبەری هەڵدەقۆتێنن وە تەنها ئەركە بێسوودەكەیان گرتنی وێنەی سلفی و پەیدا كردنی خوراكە بۆ سۆشیال میدیا شەسخی خویان و خودەرخستنە لە گۆرپانی پۆپۆلیزمی نەخۆشی باشوور؟
٤. ئایا هاولاتیانمان چەندە وشیارن لەم بوارەدا تا لە كاتی ئەم كارەساتانە بوار بدەن بە تیمەكانی پەیوەندیدار وە خویان لەم ویستە سەیروسەمەرەی مرۆڤی كورد بۆ خو بە پاڵەوانكردن و پاڵەوان نیشاندان بپارێزن و ئەم كارەساتانە وە دەرفەتێك بۆ پیشاندانی و قارەمانی و زەبەڵاحی و ماقۆڵی و دڵسۆزی خویان نەزانن؟ هەرچەندە ئەگەر دەزگاكانی حكومی لە ئیدارەدانی كارەساتەكان ئیفلیج و دەستەوەستان بێت وە كارەكانیان لە چاوی خەلك وەكۆ نواندنێك و نومایشێكی شەخسی ببینڕێت، ئنجا هێزی ئاماتۆر و ڕانهێنڕاوی میللی خوی دێتە مەیدان.
٥. ئایا ئەم كارەساتانە دەرفەتێكە بۆ نواندن و خۆدەرخستن و نومایەشی بەرپەسەكان لەسەر ئەم ژمارە زۆرەی شاشەی تی ڤی و پەیج و سناپ و ….؟ زۆربەی خەلك وا هەست دەكات كە ئەم مەرگەساتانە دەرفەتێكی دەگمەن و خواپێداوی بۆ كۆمەلێك بەرپرسێكی پێنەگەیشتوو لە ڕووی سایكۆلۆژی و كەسایەتییەوە دەرەخسێنێت كە چێژێك بە لەزەتێكی تاڵ وەربگرن لەم هەموو مایكانەی لەبەردەمیان وە ئەم هەموو كامیرایانەی ڕووبەروویان، وە ئەم هەموو پرسیارانەی كە ئاراستەیان دەكرێت.
٦. بەداخەوە زۆربەی دەزگاكانی ئیعلام و پەیجەكانی كەسی و گشتی و خێلی و گوندی …. ئەم كارەساتە تاڵانە وەكۆ هەننگوێنێكی شیرین لە ناو دارە بەروویێك دەقۆزنەوەو بە سەدان شاڵاو دێنن بۆ شوێنی مەرگی هاوشاریانمان … ئایا هێزی ئەمنی و شارستانی شار سنوورێك دادەنێن بۆ هەلپەرەستی ئەم ژمارە زوورەی مایك و كامیرا بەدەستە ؟
گیانی قوربانیان ئاگركەوتنەوەی باڵەخانەكەی سوران لە ئاشتی و ئارامی بێت
