زياتر له 53 ههزار كهس له ههرێمى كوردستان بهشدارى له دهنگدانى تايبهت دهكهن
مەهدی محەممەد – زاری كرمانجی :
ئەمڕۆ كاتژمێر 7 ی بەرەبەیانی 16ـی كانوونی 2023، پرۆسەی دەنگدانی تایبەت بۆ هەڵبژاردنی پارێزگاكانی عێراق دەستی پێكرد و یەك ملیۆن و دوو هەزار و 393 دەنگدەر لە هێزە چەكدارەكان و دەزگا ئەمنییەكان مافی دەنگدانیان هەیە.
كۆمسیۆنی باڵای سەربەخۆی هەڵبژاردنەكانی عێراق رایگەیاند “565 بنكەی دەنگدان كراوەتەوە و دوو هەزار و 367 وێستگەی دەنگدان لە خۆ دەگرن، هەروەها 48 هەزار و 260 ئاوارە لە پرۆسەی دەنگدانی تایبەت مافی بەشداریكردنیان هەیە كە 35 بنكەی هەڵبژاردنیان بۆ ئامادەكراوە و 120 وێستگەی دەنگدان لەخۆدەگرێت.”
كۆمسیۆنی باڵای سەربەخۆی هەڵبژاردنەكانی عێراق دەشڵێت ” 500 رێكخراوی نێودەوڵەتی و ناوخۆیی، بەشداری لە چاودێریكردنی هەڵبژاردنی ئەنجومەنی پارێزگاكانی عێراق دەكەن و زیاتر لە 420 هەزار فەرمانبەر لە هەردوو پرۆسەی دەنگدانی تایبەت و گشتی لە هەڵبژاردنی ئەنجومەنی پارێزگاكانی عێراق بەشدار دەبن.”
هاوكات لە سێ پارێزگای هەرێمی كوردستان(هەولێر و سلێمانی و دهۆك) زیاتر لە 53 هەزار كەس مافی دەنگدانی تایبەتیان هەیە.
لە پارێزگای هەولێر 15 هەزار 492 چەكدار و كارمەندی هێزە ئەمنییەكان مافی دەنگدانیان هەیە و 12 بنكەی دەنگدان كراونەتەوە كە 36 وێستگە لەخۆ دەگرێت، هەروەها پێنج هەزار و 23 ئاوارە لە هەولێر مافی دەنگدانیان هەیە و 7 بنكەی دەنگدانیان بۆ كراوەتەوە و 13 وێستگە لەخۆ دەگرێت.
لە پارێزگای سلێمانی 23 هەزار و 402 دەنگدەر مافی دەنگدانیان هەیە، لە 15 بنكەی دەنگدان كە 56 وێستگە لە خۆدەگرێت، هاوكات سێ هەزار و 815 ئاوارە مافی دەنگدانیان هەیە پێنج بنكەی دەنگدانیان بۆ كراوەتەوە 11 وێستگە لە خۆدەگرێت.
لە پارێزگای دهۆك 14 هەزار و 788 دەنگدەر دەتوانن لە 11 بنكە دەنگ بدەن كە پێكهاتووە لە 35 وێستگە،و 39 هەزار و 422 ئاوارەش لەو پارێزگایە مافی دەنگدانیان هەیە 23 بنكەی دەنگدانیان بۆ كراوەتەوە كە 96 وێستگە لە خۆ دەگرێت.
كاتژمێر 6 ی ئێوارەی ئەمڕۆ دەنگدانی تایبەت كۆتایی دێت و رۆژی 18ـی ئەم مانگەش هەڵبژاردنی گشتی بۆ ئەنجوومەنی پارێزگاكانی عێراق بەرێوەدەچێت.
